ހުޅުމާލޭގައި ބިދޭސީންތިބުމަށް ހަދާ ފެސިލިޓީތައް މިމަހުގެ 18ށް ނިންމަނީ
3 ކުންފުންޏަކުން އަންނަނީ މިތަންތަން ހެދުމުގެ މަސައްކަތް ކުރަމުން
ހުޅުމާލޭ ފޭސް ޓޫ ގައި ބިދޭސީންނަށް ވަގުތީ ބޯހިޔާވަހިކަން ހޯދައިދިނުމަށް އަޅަމުންދާ ބައެއް ތަންތަން
ހުޅުމާލޭގައި 2684 ބިދޭސީންނަށް ވަގުތީ ބޯހިޔާވަހިކަން ހަމަޖައްސައިދިނުމަށް މިހާރު ހަދަމުންދާ ތަންތަން މިމަހުގެ 18 ވަނަ ދުވަހަށް ނިންމާލާނެކަމަށް ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ)ން ބުނެފިއެވެ.
ކޮވިޑް-19 ރާއްޖޭގައި މިހާރު ފެތުރެމުންދާއިރު އަދި މިވައިރަސް އަށް ގިނަ އަދަދެއްގެ ބިދޭސީން ޕޮޒިޓިވް ވަމުންދިޔުމާއި ގުޅިގެން މާލެ ސިޓީގައި ތޮއްޖެހިގެން ދިރިއުޅޭ ބިދޭސީންނަށް ވަގުތީ ބޯހިޔާވަހިކަން ހޯދައިދިނުމަށް ސަރުކާރުން އަންނަނީ މަސައްކަތް ކުރަމުންނެވެ. އެގޮތުން ބިދޭސީންނަށް އަމާޒުކޮށްގެން ހުޅުމާލެ ފޭސް ޓޫގައި އަންނަނީ ވަގުތީ ބޯހިޔާވަހިކަން ދިނުމަށް ތަންތަން ހަދަމުންނެވެ. އެޗްޑީސީން ވަނީ ހުޅުމާލޭގައި ބިދޭސީންނަށް ބޯހިޔާވަހިކަން ޤާއިމު ކޮށްދިނުމަށް ބޭނުންވާ ފަރާތްތަކަށް އެކަން ކުރުމުގެ ފުރުސަތު ހުޅުވާލާފަ
އެވެ. މިތަންތަން ހަދަމުން އަންނަނީ ސަރުކާރު ހިއްސާވާ ކުންފުނިތަކުންނެވެ.
އެގޮތުން މިހާރު 3 ކުންފުންޏަކުން އަންނަނީ މިތަންތަން ހެދުމުގެ މަސައްކަތް ކުރަމުންނެވެ. މި މަސައްކަތް ކުރިޔަށް ގެންދަނީ ތިން ޕްރޮޖެކްޓަކަށް ބަހާލައިގެން ކަމަށް އެޗްޑީސީން ބުނެއެވެ.
ޗައިނާގެ ސްޓޭޓް ކޮންސްޓްރަކްޝަން އިންޖިނިއަރިންގ ކޯޕަރޭޝަން ލިމިޓެޑުން އެހީވެދީގެން ހަދަމުންދަނީ 800 މީހުންގެ ޖާގައިގެ ތަނެކެވެ. މިތަނުގައި 6 ބިލްޑިންގ ބްލޮކް ހެދުމުގެ މަސައްކަތް އަންނަނީ ކުރަމުންނެވެ. މިބިލްޑިންގ ބޮލްކްގައި 84 ފާޚަނައާއި، އެއްފަހަރާއި 175 މީހުންނަށް ބޭނުންކުރެވޭނެ ކެންޓީނެއް ހިމެނެއެވެ.
އެސްޓީއޯ ހިޔާގެ ވަގުތީ ހިޔާތައް ހެދުމުގެ މަސައްކަތުގައި އެހީތެރިވެދެނީ ޖައުސާއާއި ޗައިނާގެ ބީޔޫސީޖީ ކިޔާ ކުންފުންޏެކެވެ. މިއީ 1292 މީހުންގެ ޖާގައިގެ ދެ ބިލްޑިންގ ބްލޮކް އަންނަނީ ހަދަމުންނެވެ.
އެމްޕީއެލް އިން ހަދަމުން އަންނަނީ 592 މީހުންގެ ޖާގައިގެ ތަނެކެވެ. މިތަންތަން ހަދަމުންދަނީ އެމްޕީއެލްއާއި އެސްޖޭ ގްރޫފާއި، ފެޑޯ ގުޅިގެންނެވެ.
މީގެކުރިން އެޗްޑީސީންވަނީ ބިދޭސީންނަށް ބޯހިޔާވަހިކަން ފޯރުކޮށްދިނުމަށް ހުޅުމާލޭގައި 667 އެނދުގެ ފެސިލިޓީއެއްގެ މަސައްކަތް ނިންމާފައެވެ.
