ބަޔާން މިއުނިކްގެ އެސިސްޓަންޓް ކޯޗަކަށް އެޓީމަށް ކުރިން ކުޅުނު މިރޮސްލާވް ކްލޯސާ ހަމަޖައްސައިފި އެވެ.

ފީފާ ވަރލްޑް ކަޕްގެ ތާރީޚުގައި އެންމެ ގިނަ ލަނޑު ޖަހާފައިވާ ފޯވަރޑް ޖަރުމަންގެ ކްލޯސާ ބަޔާން މިއުނިކްގެ އެސިސްޓެންޓް ކޯޗަކަށް ހަމަޖައްސާފައިވަނީ އަންނަ ސީޒަނުން ފެށިގެންނެވެ.

ޖަރުމަންގެ ގިނަ ކްލަބްތަކަށް މީގެ ކުރިން ކުޅެފައިވާ އުމުރުން 41 އަހަރުގެ ކްލޯސާ ފުޓްބޯޅަ ކުޅުން ހުއްޓާލީ 2016 ވަނަ އަހަރެވެ. އޭނާ ބަޔާން މިއުނިކަށް ކުޅެފައިވަނީ 2007ން 2011ށެވެ.

ބަޔާންގެ އެސިސްޓަންޓް ކޯޗުގެ މަގާމާ ކްލޯސާ ހަވާލުވިއިރު، މީގެ ކުރިން އޭނާ ވަނީ އެސިސްޓަންޓް ކޯޗެއްގެ ގޮތުގައި ޖަރުމަން ގައުމީ ޓީމާއެކު ވެސް މަސައްކަތްކޮށްފައެވެ.

ރިޕޯޓުތައް ބުނާ ގޮތުން ބަޔާނުން ކްލޯސާ އެޓީމަށް ގެނައީ އެ ޓީމުގެ ކޯޗު ހަންސީ ފްލިކްގެ އެދުމުގެ މަތިންނެވެ. ކްލޯސާ ހިމެނިގެން ޖަރުމަން ގައުމީ ޓީމުން 2014 ވަނަ އަހަރުގެ ފީފާ ވަރލްޑް ކަޕް ކާމިޔާބުކުރި ޓީމުގެ އެސިސްޓަންޓް ކޯޗަކީ ފްލިކް އެވެ.

ދާދި ފަހުން ބަޔާނުން ވަނީ ފްލިކްގެ އެއްބަސްވުން 2023 ވަނަ އަހަރުގެ ޖޫން މަހުގެ ނިޔަލަށް އާކޮށްފައެވެ. މިހާތަނަށް ފްލިކްގެ އިރުޝާދުގެ ދަށުން ބަޔާނުން 21 މެޗު ކުޅެފައިވާއިރު، 18 މެޗުން ވަނީ މޮޅުވެފައެވެ.

ނޮވެލް ކޮރޯނާވައިރަސް (ކޮވިޑް-19) ގެ ސަބަބުން މެދުކަނޑާލި ޖަރުމަން ލީގު މިމަހުގެ 16 ވަނަ ދުވަހު އަލުން ފަށާއިރު، އެންމެ ފަހުގެ ޗެމްޕިއަން ބަޔާން އޮތީ ތާވަލުގެ އެއްވަނައިގައި 55 ޕޮއިންޓާއެކު އެވެ. ދެވަނައިގައި އޮތް ބޮރޫޝިއާ ޑޯޓްމުންޑަށް ލިބިފައިވަނީ 51 ޕޮއިންޓެވެ.