ރޯދަ ހިފަންވީ ހަމައެކަނި ކެއިންބުއިމުން މަނާވެގަތުމަކަށް ނޫން: ހުކުރު ޚުތުބާ
8 މެއި 2020 | ހުކުރު 08:03ރޯދަމަަހަކީ މާތް އަޅުކަމެއްގެ އިތުރުން ޖިސްމަނީ ދުޅަހެޔޮކަން ގެނެސްދޭ މައްސަރެއް
ކޮވިޑް-19ގެ ޙާލަތައި ގުޅިގެން ރާއްޖޭގައި ވަނީ ޖަމާޢަތުގައި ހުކުރުކުރުން މެދުކަނޑާލާފައި
ރޯދަ ހިފަންވީ ހަމައެކަނި ކެއިން ބުއިމުން މަނާވެގަތުމަށް ނޫންކަމަށް ހުކުރު ޚުޠުބާގައި ބުނެފިއެވެ.
ޚުޠުބާގައި ބުނެފައިވަނީ ރޯދަހިފަންވީ ހުރިހާ ގުނަވަަނަކުން ކަމަށެވެ. ރޯދަހިފަންވާނީ ކެއިންބުއިމުން މަނާވެގަންނަ ފަދައިން ޙަރާމްވެގެންވާ އެންމެހާ ކަންކަމުންވެސް ދުރުހެލިވެގެންކަމަށެވެ.
ބަރަކާތްތެރި ރަމަޟާންމަހަކީ އަޅުކަމުގެ މައްސަރެގެ އިތުރުން، ޖިސްމާނީ ދުޅަހެޔޮކަން ގެނެސްދޭ މައްސަރެއް ކަމަށާއި އަދި ރޫޙާނީ ބާރެއްވެސް ގެނެސްދޭ މައްސަރެެއްކަމަށް ހުކުރު ޚުޠުބާގައި ބުނެފައިވެއެވެ. އަދި ހިވާގިވުމާއި ކެތްތެރިވުމާއި ޢަޒުމް ވަރުގަދަ ކުރުމާއި، ވަގުތުތައް ރާވާ އެވަގުތުތަކަށް ކެމޭހިތުމާއި، އެންމެން އެއްބައިވަންތަވެ އެކަކު އަނެކަކަށް އެހީތެރިވުމުގެ މައްސަރެއް ކަމަށެވެ. އެއްވެސް ޙާލެއްގައި ނިދުމާއި، ޢަރާމުކުރުމާއި، ކަންނެތް ވުމާއި، ދެއަތް އުރާލައިގެން ތިބުމުގެ މައްސަރެއް ނޫންކަމަށާއި، ހަޤީގަތަކީ ރޯދަމަހަކީ ހެޔޮކަންތައްތަކުގެ މައްޗަށް މުސްލިމުން ހާނުވައި އެންމެ ރިވެތި އަޚްލާޤީ ސިފަތަކުން މުސްލިމުން ތަހުޒީބު ކޮށްދޭ އެންމެ ބޮޑު ތަރުބަވީ މަދަރުސާއެއް ކަމަށް ޚުތުބާގައި ވެއެވެ.
ޚުތުބާގައި ބުނެފައިވަނީ ތަނަވަސްކަމުގެ އަހުލުވެރިން ރޯދަ ހިފާނީ ވިޔަފާރީގައި މަކަރާއި ހީލަތް ހެދުން އެއްކިބާވުމާއި، ޙާލަތުގެ ނާޖާއިޒު ބޭނުން ހިފާ މުދަލުގެ އަގު ބޮޑުކުުރުން ފަދަ ނުބައިކަންކަމުން ދުރުވެ ތިބެގެންްކަމަށެވެ. އަދި މީސްތަކުންނަށް ދީލަތިވުމާއި ހެޔޮފޯރުވުމާއި އިހުސާންތެރިވުމުންނެވެ. އެކިއެކި މުވައްޒަފުން ރޯދަ ހިފަންވާނީ ވަޒީފާއަށް މަކަރު ހެދުމާއި، ވަގުތަށް ފަރުވާކުޑަ ކުރުމާއި، ސާހިބުންނަށް ނުކިޔަމަންތެރިވުމާއި ޢާންމުންނަށް ފޯރުކޮށްދޭންޖެހޭ ޚިދުމަތްތަކުގައި ފަރުވާކުޑަކުރުންފަދަ އެންމެހާ ކަންކަމުން ދުރުހެލިވެ ތިބެގެންކަމަށެވެ. އަދި، ކަންކަމާއި ޙާވާލުވެ ތިބި އިސްވެރިން ރޯދަ ހިފަންވާނީ ޚިޔާނާތްތެރިވުމާއި ފަސާދައާއި އަމިއްލަ މަޞްލަޙަތުން ދުރުވެތިބެ ޒިންމާ ފުރިހަމައަށް އަދާކުރުންމަތީ ދެމިތިބެގެންނެވެ.
ޑޮކްޓަރުންނާއި ޞިއްޚީ ޚިދުމަތްތެރިން ރޯދަހިފާނީ ބަލިޙާލުގައިވާ މީހުންގެ ވޭނާ އުދާސްތައް ފައިސާ ހޯދުމުގެ ވަޞީލަތަކަށް ހެދުމުގެ ބަދަލުގައި އެމީހުންނަށް އަޅާލުމާއި ފަރުވާ ދިނުމުގައި އިޚްލާޞްތެރިވުމާއި، ތަފާތު ކުރުމެއް ނެތި މުޅިއި ންސާނިއްޔަތަށް ޚިދުމަތްކުރާ ދަރުމަވެރިންގެ ގޮތުގައި ތިބެގެންކަމަށްވެސް ހުކުރު ޚުޠުބާގައިވެއެވެ. އަދި މައިންބަފައިން ރޯދަ ހިފާނީ ދަރިންގެ ޙައްޤުތަކަށް ރައްކާތެރިވެ ދަރިންނަށް ހެޔޮ ނަޞޭޙަތާއި މަތިވެރި ތަރުބިއްޔަތު ދިނުމަށްކަމުގައެވެ.
ރޯދައަކީ އެންމެހާ ފާފަތަކުން މީހާ ދުރުހެލިކުރުވުމަށް ލިބޭ ބާރެއް ކަމަށާއި ވަރަށް ވަރުގަދަ އައްޑަނައެއް ކަމަށް ޚުތުބާގައި ބުނެފައި ވެއެވެ. ޙަޤީގީ މާނައިގައި ރޯދަ ހިފުމުން ދުންފަތުގެ އިސްތިޢުމާލު ކުރުންފަދަ ޞިއްޙަތަށް ގެއްލުންދޭ އާދަތަކާއި ދުރުހެލިކޮށްދޭ ކަމަށާއި ރުޅި އިސްކުރުމާއި އަރައިރުންވުން ފަދަ އިޖްތިމާޢީ ފޭރާން ވީދިގެންދާ އެންމެހާ ނޭދެވޭ ސިފަތަކާއި މާތް ﷲ ޙަރާމްކުރައްވާފައިވާ އެންމެހާ ފާފަތަކުން ދުރުހެލިވުމުގެ މައްޗަށް ކެތްތެރިކަން އިސްކުރަން ދަސްކޮށްދޭ ކަމަށެވެ.
ރޯދައިގެ ވަގުތުގައި ކެއިންބުއިމުން ދުރުވެ ހުރުމުން ދުރުހެލިވުމުން ލިބިދޭ އަނެއް ތަރުބަވީ ފިލާވަޅަކީ މުޖުތަމަޢުގަިއ ބަނޑުހައި ހޫނުކަން ތަޙައްމަލު ކުރަމުންދާ ނިކަމެތި ފަޤީރުންނާއި ޚާޢްޞަ އެހީއަށް ބޭނުންވާ ފަރާތްތަކުގެ އިހުސާސްތައް ހިތައްވެރިވެ ހިތްތައް މަޑުމޮޅިވެ ރަހުމާއި ހަމްދަރުދީއާއި ކުލުނުވެރިކަން ރޯދަވެރިންގެ ހިތްތަކުގައި އުފެދިގެން ދިއުން ކަމަށެވެ.
އޭގެ ސަބަބުން މުޖުތަމަޢުގައި ބޭނުން ޖެހިގެންވާ މީހުނަށް އެހީފޯރުވުމަށް ރޯދަވެރިޔާގެ ނަފްސު ގޮވާލާ ކަމަށާއި މީސްތަކުންނަށް އޯގާތެރިވުމުގެ މާތް ސިފަ ހިތުގައި އަށަގަންނަވައިދޭ ކަމަށް ޚުތުބާގައި ބުނެފައި ވެއެވެ.
ޚުޠުބާގައި އިތުރަށް ބުނެފައިވަނީ ރޯދައަށް ތިބުމުން ލިބޭ އެންމެ ބޮޑު ތަރުބަވީ ފިލާވަޅަކީ ކަންކަން ކުރުމުގައި ވަގުތުތައް ކަނޑައެޅުމާއި އެވަގުތުތަކަށް އިހުތިރާމް ކުރުމުގެ މުހިއްމުކަން ދަސްކޮށްދިނުމެވެ. އެވަގުތުތަކުގައި ކެއިންބުއިމާއި އިންސާނާގެ ނަފްސު އެދޭ އެންމެހާ ނޭއްގާނީ ސިފަތަކުން އެ ނަފްސު ދުރުހެލިކުރުމުން ލިއްބައިދޭ ފިލާވަޅަކީ، ނަފްސު ކޮންޓްރޯލްކޮށް ދިމާވާ ދަތިތަކާއި އުނދަގޫތަކުގެ މައްޗަށް ކެތްތެރިވުމުގެ ފިލާވަޅެވެ.
އަދި ހަމަހަމަ އެއާއި އެކު މުޖުތަމަޢުގައިވާ ނިކަމެތިންނާއި ފަޤީރުންގެ ޙާލަތު ވަޒަންކޮށް އެންމެންނަކީ ހަމަހަމަ ބައެއްކަން އިޙުސާސް ވުމުގެ ޢިބްރަތްތެރި ފިލާވަޅުކަމަށް ޚުތުބާގައި ބުނެފައިވެއެވެ.
