މަރަށް މަރު ހިފަންވީ، އެކަމަކު އޭގެ ކުރިން އަދުލްއިންސާފު ގާއިމުވާންޖެހޭ: ޑރ. މަޖީދު

ގިޞާސް ހިފުމަކީ އިސްލާމީ ޝަރީއަތުގެ ހުކުމެއް ކަމަށާއި މަރަށް މަރު ހިފުމަކީ ކުރަންޖެހޭ ކަމެއް ކަމަށާއި ނަމަވެސް އޭގެ ކުރިން އަދުލްއިންސާފު ގާއިމު ކުރަންޖެހޭ ކަމަށް ރާއްޖޭގެ ފުރަތަމަ އިސްލާމިކް މިނިސްޓަރު އަދި މަޝްހޫރު ދީނީ އިލްމުވެރިޔާ ޑރ. އަބްދުލްމަޖީދު އަބްދުލްބާރީ ވިދާޅުވެއްޖެ އެވެ.

ގުޅިފައިވާ ސިޔާސީ ޕާޓީތަކުން މ. ކުނޫޒުގައި ބޭއްވި ޖަލްސާގައި ވާހަކަ ދައްކަވަމުން ޑރ. މަޖީދު ވިދާޅުވީ ޖިނާއީ ބޮޑެތި މައްސަލަތައް ހާއްސަކޮށް މަރުގެ މައްސަލަތަކުގައި މަރުގެ ހުކުމެއް މީހެއްގެ މައްޗަށް ކުރާއިރު އެއްވެސް ޝައްކެއްނެތް މިންވަރަށް ސާބިތުވާންޖެހޭ ކަމަށެވެ.

"އަޑަށް ބާރުލާފައި އަޅުގަނޑުމެން ގަތުލުގެ ހުކުމް ތައްފީޒު ކުރާނަމޭ ވިދާޅުވިނަމަވެސް، ގަތުލުގެ ހުކުމް ތަންފީޒު ކުރުމަކުން އަދުލްއިންސާފު ފުރިހަމައަށް ލިބެނީކީ ނޫން. ޑރ. އަފްރާޝީމް އަލީގެ ގާތިލަކީ ހުމާމު ކަމުގައި ފަހަރުގައި ވެދާނެ. އެހެންނަމަވެސް ހުމާމާއި އަފްރާޝީމާއި ދޭތެރޭ އޮތީ ކޮން އަދާވާތްތެރިކަމެއްތޯ. މަހުފޫޒު ސައީދުގެ ގަޔަށް ވަޅިޖެހި މީހާއާއި އޭނާއާ ދެމެދު އޮތީ ކޮން އަދާވާތްތެރިކަމެއްތޯ. އަލްހާން ފަހުމީގެ ގަޔަށް ވަޅިޖެހި މީހާއާއި އޭނާއާ ދެމެދު އޮތީ ކޮން އަދާވާތްތެރިކަމެއްތޯ. އެހެންވީމާ މި މީސްމީހުންގެ މައްޗަށް ހުކުމް ތަންފީޒު ކުރުމަކުން އަދުލްއިންސާފު ގައިމު ކުރެވެނީކީ ނޫން. ހުމާމު މަރާލުމުން ފަހަރުގައި އޭގަ އެކުލެވިގެންވާ އެތައްބައިވަރު ހެއްކެއް ފޮރުވިގެން އެ ދިޔައީކަމަށްވެސް ވެދާނެ. އެހެންވީމާ އަދުލްއިންސާފު ގާއިމު ކުރުމަށްޓަކައި ސަރުކާރުން ކުރަންވީކަމަކީ ޝަރުއީ ނިޒާމަށް ނުފޫޒު ފޯރުވުން ހުއްޓާލުން،" މަޖީދު ވިދާޅުވި އެވެ.

މަޖީދު ވިދާޅުވީ ގިޞާސް ހުކުމް ތަންފީޒު ކުރެވެންޖެހޭނެ ކަމަށާއި ނަމަވެސް އޭގެކުރިން ކުރަންހުރި ކަންތައްތައް ކުރަންޖެހޭ ކަމަށެވެ.

"އަދުލްއިންސާފު ކަށަވަރު ކުރުމަށްޓަކައި ކުރަންޖެހޭ ކަންތައްތައް އަޅުގަނޑުމެން އެބަ ކުރަންޖެހޭ. އުމަރުގެފާނު ވިދާޅުވެފައިވޭ، އެއްވެސް ކަހަލަ ޝައްކެއް އޮވެގެން މީހެއްގެ މައްޗަށް ހައްދެއް ގާއިމު ކުރުމަށްވުރެ، ތިމަންނާގާތުގައި އެމީހާގެ މައްޗަށް މައާފު ދިނުމަށްފަހު ދޫކޮށްލުންވެސް މާހެޔޮވެގެންވޭ،" މަޖީދު ވިދާޅުވި އެވެ.

މީގެއިތުރުން މަޖީދު ވިދާޅުވީ ރާއްޖޭގެ ޝަރުއީ ނިޒާމަށް ނުފޫޒު ފޯރުވުން ހުއްޓާލުމަށްފަހު، ޝަރުއީ ދާއިރާ ރަނގަޅު ކުރުމަށް މަސައްކަތް ކުރުން މުހިއްމު ކަމަށެވެ. އަދި ޝަރުއީ ދާއިރާ ހިނގަނީ އަދުލްވެރިކަމާއި އިންސާފްވެރިކަމާއެކު ކަމަށް ކަށަވަރުކުރުން މުހިއްމު ކަމަށެވެ.