ކައުންސިލްތަކުން ޚިދުމަތް ހޯދަން މިހާރު ގޭގަ ތިބެގެންވެސް ފައިސާ ދެއްކޭނެ
7 މެއި 2020 | ބުރާސްފަތި 12:09ރައީސުލްޖުމްހޫރިއްޔާ އޮފީހުން އަންގަވާފައިވާ ގޮތަށް އަމަލުކުރުމަށް މަސައްކަތް ކުރެވޭ
ބުރާސްފަތި ދުވަހުގެ ނޫސްވެރިންގެ ބައްދަލުވުމުގައި، ރައްޔިތުންނަށް ދެމުންދާ ޚިދުމަތްތައް މެދުނުކެނޑި ފޯރުކޮށްދިނުމަށް ގިނަ މަސައްކަތްތަކެއް ކުރަމުންދާކަން ފިނޭންސް މިނިސްޓަރު އަމީރު ވަނީ ފާހަގަކުރައްވާ
ކައުންސިލްތަކުން ރައްޔިތުންނަށް ދެމުންދާ ޚިދުމަތް ހުއްޓާނުލާ ގެންދިއުމަށް މަގުފަހިކޮށްދިނުމުގެ ގޮތުން، ރައްޔިތުން ޚިދުމަތްދޭއިރު، ގޭގައި ތިބެގެން ފައިސާގެ މުޢާމަލާތް ކުރެވޭނެ އިންތިޒާމު ހަމަޖައްސައިދީފިއެވެ.
ބުރާސްފަތި ދުވަހު ނޭޝަނަލް އިމަރޖެންސީ އޮޕަރޭޝަން ސެންޓަރ (އެންއީއޯސީ)ގައި ބޭއްވި ނޫސްވެރިންގެ ބައްދަލުވުމުގައި ފިނޭންސް މިނިސްޓަރު އިބްރާޙިމް އަމީރު ވިދާޅުވީ ކޮވިޑް-19އާ ގުޅިގެން ސަރުކާރު އޮފީސްތަކާއި، ރައީސުލްޖުމްހޫރިއްޔާގެ އޮފީހުން އަންގާފައިވާ ގޮތަށް ޢަމަލުކުރުމަށް މަސައްކަތްތައް ކުރަމުންއަންނަ ކަމަށެވެ.
އެގޮތުން، ދައުލަތުގެ ޕަބްލިކް އެކައުންޓިން ސިސްޓަމް މެދުވެރިކޮށް ކުރަންޖެހޭ ކަންކަން ކުރުމަށް މަގުފަހިކޮށްދިނުމުގެ އުޞޫލަށް ގެންނަން ޖެހޭ ބައެއް ބަދަލުތައް މިހާރު ގެނެސްފައިވާކަމަށް މިނިސްޓަރު އަމީރު ވިދާޅުވިއެވެ.
މިނިސްޓަރު އަމީރު ވިދާޅުވީ ޚިދުމަތްދޭ އިރު ހިނގާ އިދާރީ ކަންތައްތަކާއި، ކައުންސިލްތަކުން އެރަށެއްގެ ރައްޔިތުންނަށާއި، އެހެން ފަރާތްތަކަށް ޚިދުމަތްތައް ދޭއިރު، ގޭގައި ތިބެގެން ފައިސާގެ މުޢާމަލާތްތައް ކުރެވޭނެ އިންތިޒާމު ހަމަޖައްސާފައިވާކަމަށެވެ.
މިނިސްޓަރު އަމީރު ވިދާޅުވީ ސަރުކާރު އޮފީސްތަކުން ފައިސާއާ ގުޅުން ހުރި އިދާރީ ބައެއް ކަންކަމަށް ވެސް ހައްލު ހޯދަދީފައިވާ ކަމަށެވެ. އަދި އޮޑިޓަރ ޖެނަރަލް އޮފީހާއެކު މަސައްކަތް ކުރެވި އޮފީސްތަކުން މާލިއްޔަތުގެ ގަވާއިދާ އެއްގޮތަށް މަސައްކަތް ކުރުމަށްޓަކައި މަސައްކަތުގެ ޕްރޮސަސް ތަކަށް ވާނީ ބަދަލު ގެނެސްފައިވާކަން މިނިސްޓަރު ފާހަގަކުރެއްވިއެވެ.
