ކޮވިޑް-19 އަށް ޓެސްޓް ކުރުމަށްޓަކައި އެއް އަހަރުނުވާ ދިވެހި ތުއްތު ކުއްޖެއްގެ ސާމްޕަލް ދިނުމަށް ކުއްޖާގެ މައިންބަފައިން ދެކޮޅު ހެދުމުން، ސާމްޕަލް ނެގުމުގެ ޢަމުރެއް ސިވިލް ކޯޓުން ނެރެފިއެވެ.

ބުރާސްފަތި ދުވަހު ސިވިލް ކޯޓުން ބުނީ، ކޮވިޑް-19 އަށް ޓެސްޓް ކުރުމަށްޓަކައި އެއް އަހަރުނުވާ ދިވެހި ތުއްތު ކުއްޖެއްގެ ސާމްޕަލް ދިނުމަށް އެކުއްޖާގެ މައިންބަފައިން ދެކޮޅު ހަދާފައިވާތީ، އެކުއްޖާގެ ސާމްޕަލް ނެގުމަށް ފަހިކޮށްދީ، ހުރަސް ނޭޅުމަށް، އެކުއްޖާގެ މައިންފައިންގެ މައްޗަށް ބުދަ ދުވަހުގެ ރޭ އެކޯޓުން ޢަމުރެއް ނެރެފައިވާ ކަމަށެވެ.

މީގެއިތުރުން، އެކުއްޖާގެ ސާމަޕްލް ނެގުމަށްޓަކައި ޑިރެކްޓަރ ޖެނެރަލް އޮފް ޕަބްލިކް ހެލްތު ކޮށްފައިވާ ޢަމުރު ތަންފީޒު ކުރުމަށް އެކަމުގައި ޝާމިލުވާ ފަރާތްތަކަށާއި ފުލުހުންގެ މައްޗަށް އެ ޢަމުރުގައި ޢަމުރުކޮށްފައި ވެއެވެ.

މީގެ އިތުރުން ވެސް، ކޮވިޑް-19 އަށް ޓެސްޓް ކުރުމަށް ސާމްޕަލް ދޭން ދެކޮޅުހެދި ހަތަރު ފަރާތެއްގެ މައްޗަށް ސިވިލް ކޯޓުން ބުދަ ދުވަހުގެ ރޭ ޢަަމުރެއް ނެރެފައިވެއެވެ. މީގެއިތުރުންވެސް ސާމްޕަލް ދިނުމަށް ދެކޮޅުހެދި، އަދި ކަރަންޓީނަށް ދާން ދެކޮޅު ހެދި ބައެއް ފަރާތްތަކުގެ މައްޗަށް ސިވިލް ކޯޓުން ޢަމުރުތަކެއް މީގެކުރިން ނެރެފައިވެއެވެ.

ދުނިޔޭގައި ހަލުވިކަމާއެކު ފެތުރެމުންދާ ކޮވިޑް-19 ރާއްޖޭގައި ފެތުރެން ފެށުމާއި ގުޅިގެން، މާލެ ޞަރަޙައްދު ވަނީ ފުރަބަންދު ކޮށްފައެވެ. އަދި ހުއްދައާ ނުލާ މީހުން ދިރިއުޅޭ އެއްވެސް ރަށަކުން ލަފާފުރުން މަނާކޮށްފަ އެވެ. މާލެ ޞަރަޙައްދުގެ އިތުރުން، މެދު ރާއްޖެތެރެ އާއި އުތުރުގެ ރަށްތަކަކުން ވަނީ މި ވައިރަސް ފެނިފަ އެވެ.

ކަރަންޓީނަށް ދިއުމާއި ސާމްޕަލްތައް ނަގަން ދެކޮޅު ހެދުމަކީ ޢާންމު ޞިއްޙަތު ރައްކާތެރި ކުރުމުގެ ޤާނޫނުގެ ދަށުން ކުށެކެވެ. ކަރަންޓީނަށް އެމީހަކު ގެންދިއުމުގެ ޢަމުރުތައް ނެރުމުގެ ބާރުވެސް ކޯޓުތަކަށް ލިބިގެން ވެއެވެ. އަދި މިފަދަ ޢާންމު ޞިއްޙަތުގެ ކުއްލި ނުރައްކަލުގެ ޙާލަތުގައި ތެދު މަޢުލޫމާތު ހާމަކުރުމަކީ ހުރިހާ ފަރާތްތަކަށް ވެސް އެޤާނޫނުން ލާޒިމުކުރާ ކަމެކެވެ.