ތުރުކީ ލީގު ޖޫން 12 ގައި ފަށަން ނިންމައިފި

ތުރުކީގެ ފުރަތަމަ ޑިވިޝަން ކަމަށްވާ ޓަރކިޝް ސުޕަރ ލީގު ޖޫން މަހުގެ 12 ވަނަ ދުވަހު އަލުން ފަށަން ނިންމައިފިއެވެ.

ޓަރކިޝް ފުޓްބޯލް ފެޑެރޭޝަނުގެ ރައީސް ނިހާތު އޮޒްދެމިރު ވަނީ ބުދަ ދުވަހު ލީގު އަލުން ފަށާނެ ތާރީޚެއް އިޢުލާނުކުރައްވާފައެވެ. ޖޫން މަހުގެ 12 ވަނަ ދުވަހު ތުރުކީ ލީގު އަލުން ފަށަން ނިންމިއިރު، ލީގު މެދުކަނޑާލާފައިވަނީ މަރޗު މަހުގެ 18 ވަނަ ދުވަހެވެ. ތުރުކީ ލީގަކީ ކޮރޯނާވައިރަސް (ކޮވިޑް-19) އާ ގުޅިގެން ޔޫރަޕުން މެދުކަނޑާލީ އެންމެ ފަހު ލީގެވެ. އަދި ތުރުކީ ލީގަކީ ކޮވިޑް-19 އާ ގުޅިގެން މެދުކަނޑާލި ލީގުތަކުގެ ތެރެއިން ކުޅުން އަލުން ފަށާނެ ތާރީޚު އިޢުލާނުކުރި ފުރަތަމަ ލީގެވެ.

ޓަރކިޝް ފުޓްބޯލް ފެޑެރޭޝަނުގެ ރައީސް ނިހާތު އޮޒްދެމިރު ވިދާޅުވީ ތުރުކީގެ ރައީސް ރަޖަބު ތައްޔިބު އުރުދުޣާންގެ އިރުޝާދުގެ ދަށުން އެ ގައުމުން މިސާލު ދައްކަމުންދާ ކަމަށާއި، ކޮވިޑް-19 އާ ދެކޮޅަށް އެ ގައުމުން ރަނގަޅު ފިޔަވަޅުތަކެއް އަޅަމުން އަންނަ ކަމަށެވެ. އެގޮތުން އެންމެ ފުރަތަމަ އެ ގައުމުން ކޮވިޑް-19 އަށް މީހަކު ޕޮޒިޓިވްވުމާއެކު މާޗު މަހުގެ 11 ވަނަ ދުވަހުން ފެށިގެން ލީގުގެ ކުޅުން ކުރިއަށް ގެންގޮސްފައިވަނީ ސަޕޯޓަރުން ނުވައްދައި ކަމަށް ވިދާޅުވިއެވެ.

ޖޫން މަހުގެ 12 ވަނަ ދުވަހު ތުރުކީ ލީގު އަލުން ފެށުމަށް ނިންމާފައިވާއިރު، އެ ގައުމުގެ ދަށް ޑިވިޝަނުގެ ލީގުތައްވެސް ޖޫން މަހު ފެށުމަށް ވަނީ ނިންމާފައެވެ. އެކަމަކު ލީގު އަލުން ފަށާއިރު، މެޗުތައް ކުޅޭނީ ސަޕޯޓަރުން ނުވައްދައި ކަމެއް އަދި ކަނޑައަޅާފައެއް ނުވެއެވެ.

ނިހާތު އޮޒްދެމިރު ވިދާޅުވީ މެޗުތައް ކުޅޭނެ ވަކި ގޮތެއް ކަނޑައަޅާނީ ހެލްތު މިނިސްޓްރީ އާއި ސައިންޓިފިކް ކޮމިޓީން ކަމަށާއި، އެ އިދާރާތަކުން ނިންމާ ގޮތަކަށް ފުޓްބޯލް ފެޑެރޭޝަނުން އަމަލުކުރާނެ ކަމަށެވެ.

ތުރުކީ ލީގު އަލުން ފަށާނެ ތާރީޚު އިއުލާނުކުރި އިރު، މީގެ ކުރިން ޔުއެފާ އިން ވަނީ ލީގުތަކާ މެދު އަމަލުކުރާނެ ގޮތެއް މެއި މަހުގެ 25 ކުރިން އެ އިދާރާ އަށް އަންގަން ބުނެފައެވެ. ލީގުތައް ކެންސަލް ކުރުމުގެ ހުއްދަ ދިނުމާއެކު ނެދަލެންޑްސް ލީގާއި ފްރެންޗު ލީގު ވަނީ ކެންސަލް ކޮށްފައެވެ.