ގައުމީ ވޮލީ ލީގު: މިފަހަރުގެ ޗެމްޕިއަންއަކީ މޯލްޑިވިއަން

ގައުމީ ވޮލީ ލީގުގެ މިފަހަރުގެ ޗެމްޕިއަންކަން މޯލްޑިވިއަން ސްޕޯޓްސް އެންޑް ރެކްރިއޭޝަނުން ހޯދައިފިއެވެ.

މޯލްޑިވިއަންއިން ޗެމްޕިއަންކަން ކަށަވަރު ކުރީ ލީގުގެ ޗެމްޕިއަންކަން ލިބޭ ޓީމެއް ކަނޑައެޅުމަށް ކުޅުނު އެންމެ ފަހު މެޗުގައި ތިން ސެޓު އެއް ސެޓުން ދިވެހި ސިފައިންގެ ކްލަބް ބަލިކޮށްގެންނެވެ. މި މެޗުގެ ފުރަތަމަ ސެޓު 25-22 އިން މޯލްޑިވިއަން ގެންދިޔައިރު ސިފައިންގެ ކްލަބްއިން ވަނީ 21-25 އިން ދެވަނަ ސެޓު ގެންގޮސް މެޗުގެ ނަތީޖާ ހަމަހަމަ ކޮށްފައެވެ. އެހެން ނަމަވެސް މޯލްޑިވިއަން އިން ފަހުން ކުޅުނު ދެ ސެޓު 25-22 އަދި 25-23 އިން ގެންގޮސް މުބާރާތުގެ ތަށި ކަށަވަރުކޮށްފައެވެ.

މި މޮޅާއެކު މޯލްޑިވިއަންއިން ލީގުގެ އެއްވަނަ ކަށަވަރު ކުރީ 20 ޕޮއިންޓާއެކުއެވެ. މިދިޔަ އަހަރުގެ ޗެމްޕިއަން ސިފައިންގެ ކްލަބްއަށް ދެވަނަ ލިބެނީ 15 ޕޮއިންޓާއެކުއެވެ. ތިންވަނައިގައި އަށް ޕޮއިންޓާއެކު ސީލައިފް ސްޕޯޓްސް ކްލަބް އޮތްއިރު ހަތަރުވަނައިގައި ހަތަރު ޕޮއިންޓާއެކު އޮތީ ޕޮލިސް ކްލަބްއެވެ.

މި މުބާރާތުގެ އެންމެ މޮޅު ކުޅުންތެރިންގެ މައްޗަށް އެކުލެވުނު ޑްރީމް ޓީމުގައި ހިމެނެނީ މޯލްޑިވިއަންގެ އިސްމާއިލް ސާޖިދު (ކުޑަކާއްޓޭ) އާއި ހުސައިން ވިޝާމް (ބުޅިކެ) އާއި ފައިރޫޒް އަދި ސީލައިފްގެ އަލީ ހުޒާމްގެ އިތުރުން ސިފައިންގެ ކްލަބްގެ އަނިލް ނަސީރު އާއި އަހުމަދު އަބްދުލް ކަރީމް (ލޯންގޭ) އަދި މުހައްމަދު މިމްރާހުއެވެ.

މި ޑިވިޝަނުގެ އެންމެ މޮޅު ކުޅުންތެރިޔަކަށް ހޮވިފައިވަނީ މޯލްޑިވިއަންގެ ބިދޭސީ ކުޅުންތެރިޔާ މުރާދް ޖެހާންއެވެ. ފިރިހެން ޑިވިޝަނުގެ އެންމެ އުއްމީދީ ކުޅުންތެރިޔަކަށް ހޮވިފައިވަނީ މާޒިޔާގެ ހުސައިން ރައްޒާންއެވެ. އެންމެ މޮޅު ކޯޗަކަށް ސިފައިންގެ ކޯޗު މުމްތާޒު އަލީ ހޮވުނުއިރު މުބާރާތުގެ ފެއާޕްލޭ ޓީމަކަށް ހޮވިފައިވަނީ މޯލްޑިވިއަން ސްޕޯޓްސް އެންޑް ރެކްރިއޭޝަންއެވެ.

އަންހެން ޑިވިޝަންގެ ޗެމްޕިއަންކަން މިސްކިތްމަގު އެންމެންގެ ގުޅުމުން ހޯދިއިރު މި ޑިވިޝަނުގެ އެންމެ މޮޅު ކުޅުންތެރިޔަކަށް ހޮވިފައިވަނީ އެ ޓީމުގެ ނިރްމަލާއެވެ. އެންމެ އުއްމީދީ ކުޅުންތެރިޔަކަށް ޕޮލިސް ކްލަބްގެ އައިމިނަތު ރިޔާޝާ ހޮވުނުއިރު އެންމެ މޮޅު ކޯޗަކަށް ހޮވުނީ އިސްމާއިލް ރިފާއުއެވެ. ހަމައެހެންމެ ފެއާޕްލޭ ޓީމަކަށް ހޮވުނީ ޕޮލިސް ކްލަބްއެވެ.

އަންހެން ޑިވިޝަންގެ ޑްރީމް ޓީމުގައި ހިމެނެނީ މިސްކިތްމަގުގެ އައިމިނަތު އަރީޝާއާއި ހައްވާ ސާހާއާއި މަރިޔަމް އަޒީފާއާއި ފާތިމަތު ޖޫޒާން އަދި ސިލްމާ ޒާހިރުގެ އިތުރުން ޕޮލިސް ކްލަބްގެ ހައްވާ ރާޝިދާއާއި އައިޝަތު މާޖިދާއެވެ.

ގައުމީ ލީގުގެ ކުޅުން ނިމިފައިވާއިރު ދެން ފެށިގެންދާނީ ގައުމީ މުބާރާތުގެ ކުޅުމެވެ.