ކޮވިޑް-19ގެ ބަލިމަޑުކަމަށްފަހު، ފުރަތަމަ ފަހަރަށް ހޫބޭގެ ސްކޫލުތައް ހުޅުވާލައިފި

ކޮވިޑް-19ގެ ބަލިމަޑުކަމަށްްފަހު، އެންމެ ފުރަތަމަ އެ ވައިރަސް ފެނުނު ޗައިނާގެ ހުބެއި ޕްރޮވިންސްގެ ސުކޫލުތައް އަލުން ހުޅުވާލައިފިއެވެ.

ޗައިނާގެ ކަމާބެހޭ ފަރާތްތަކާ ޙަވާލާދީ ބީބީސީގައި ރިޕޯޓުކޮށްފައިވާ ގޮތުން ހުބެއި ޕްރޮވިންސްގައި ބަލި ފެތުރުން ކޮންޓްރޯލް ކޮށްފައިވާއިރު، ބުދަ ދުވަހު އެޕްރޮވިންސްގެ ބައެއް ސުކޫލުތައްވެސް ވަނީ ހުޅުވާފައެވެ. އެގޮތުން ސުކޫލުތައް ހުޅުވިނަމަވެސް ގިނަ ދަރިވަރުން ކިޔަވާނީ ގޭގައި ކަމަށާއި، ސުކޫލަށް ދާނީ ޚާއްޞަ އިމްތިޙާނުތަކަކަށް ތައްޔާރުވާން ޖެހޭ ގްރޭޑްތަކުގެ ދަރިވަރުންކަމަށް ރިޕޯޓުތައް ބުނެއެވެ.

އޭގެ އިތުރުން، ދަރިވަރުން ސުކޫލަށް ވަނުމުގެ ކުރިން ކޮވިޑް-19 އަށް ސްކްރީންކުރަން ޖެހޭނެ ކަމަށާއި، އިޖުތިމާޢީ ގައިދުރުކަން ދެމެހެއްޓުމަށްވެސް ވަކި އުޞޫލުތަކެއް ކަނޑައަޅާފައިވާނެ ކަމަށް ޗައިނާގެ ދައުލަތުގެ މީޑިއާއާ ޙަވާލާދީ ބޭރުގެ މީޑިއާތަކުން ރިޕޯޓުކޮށްފައިވެއެވެ.

ވައިރަސް އެންމެ ފުރަތަމަ ފެނުނު ހުބެއި ޕްރޮވިންސް ކޮވިޑް-19ގެ ޙާލަތާއި ގުިޅިގެން ފުރަބަންދުކޮށްފައި އޮތް ނަމަވެސް، ވައިރަސް ފެތުރުން ކޮންޓްރޯލް ކުރެވުމާއެކު މަރޗް މަހުގެ 25 ވަނަ ދުވަހުން ފެށިގެން ފުރަބަންދުގެ މުއްދަތުވަނީ އުވާލާފައެވެ.

ޗައިނާގައި ހަލުވިކަމާއެކު ފެތުރުނު ކޮރޯނާވައިރަސް އެންމެ ފުރަތަމަ ފެނުނުކަމަށް ރިޕޯޓުކޮށްފައިވަނީ ހުބެއި ޕްރޮވިންސްގެ ވުހާން ސިޓީންނެވެ. އޭގެފަހުން ޗައިނާގައި ވައިރަސް ޖެހިފައިވާ މީހުންގެ ޢަދަދު 82,883ށް އަރާފައިވާއިރު، އެޤައުމުގައި މަރުވީ މީހުންގެ ޢަދަދު 4633ށް އަރައެވެ.