ރަށްރަށަށް މިހުން ފޮނުވުމުގައި އިސްކަންދޭ އުސޫލު އާއްމުކޮށްފި
5 މެއި 2020 | އަންގާރަ 22:4714 ދުވަހުގެ ކަރަންޓީނުގެ މުއްދަތު ފުރިހަމަ ކުރަން ޖެހޭ
މާލެ ބަނދަރު މަތީގައި އޮތް ލޯންޗަކަށް ބަޔަކު އަރަނީ
މާލެ ލޮކްޑައުން ކުރުމާއި ގުޅިގެން އެކިއެކި ބޭނުންތަކަށް މާލެ އައިސް އެނބުރި ރަށަށް ނުދެވި ތިބި ފަރާތްތައް އަނބުރާ ރަށަށް ފޮނުވުމުގައި އިސްކަންދޭނެ ތަރުތީބެއް ޖެންޑަރ މިނިސްޓްރީން އާއްމުކޮށްފިއެވެ.
އެ މިނިސްޓްރީން ބުނީ، ރަށްރަށަށް ނުދެވި ތިބި ފަރާތްތައް އަނބުރާ ރަށަށް ފޮނުވުމުގައި އަމަލު ކުރާނެ ގޮތްތަކުގެ މިންގަނޑު (އެސް.އޯ.ޕީ) އެއް އެކުލަވާލާފައިވާ ކަމަށެވެ
އެ އެސް.އޯ.ޕީގެ ތިން ވަނަ ނުކުތާއާ ހަވާލާދީ މިނިސްޓްރީން ވަނީ ރަށަށް ފޮނުވުމުގައި އިސްކަންދޭނެ ތަރުތީބުތައް ކަނޑައަޅާފައެވެ.
ޖެންޑަރ މިނިސްޓްރީން ބުނީ، އިސްކަންދޭ ތަރުތީބުގެ ދަށުން، ރަށަށް ފޮނުވުމުގައި އެންމެ ފުރަތަމަ ބެލެވޭނީ އޭޕްރިލް މަހުގެ އެކެއް ނުވަތަ އޭގެ ފަހުން އެކިއެކި ބޭނުންތަކަށް މާލެ އައިސް އެނބުރި ރަށަށް ނުދެވި ތިބި ފަރާތްތަކަށް ކަމަށެވެ. ރަށްރަށަށް ދިއުމަށް ހުށަހަޅާ ފަރާތްތަކުގެ ތެރެއިން ލިސްޓުގައިވާ ކަންކަމަށް ރިއާޔަތްކޮށް ތަރުތީބުކުރެވި އިސްކަންދެވޭ ފަރާތްތައް ސަރުކާރުން އަންގާ ގޮތުގެ މަތިން 14 ދުވަހުގެ މުއްދަތުގެ ކަރަންޓީން ފުރިހަމަކުރަން ޖެހޭނެ ކަމަށް މިނިސްޓްރީގެ އެސްއޯޕީގައި ވަނީ ބަޔާން ކޮށްފައެވެ.
ކައުންސިލުތަކަށް ރިޕޯޓު ކޮށްފައިވާ ފަރާތްތަކުގެ ތެރެއިން، ލިސްޓުގައިވާ ކަންކަމަށް ރިއާޔަތްކޮށް ތަރުތީބުކޮށް ރަށަށް ފޮނުވާނެ ފަރާތްތަކުގެ ލިސްޓު ކަނޑައަޅާނީ އެ ރަށެއްގެ ކައުންސިލާއި ލޯކަލް ގަވަރމަންޓް އޮތޯރިޓީންނެވެ. އެގޮތަށް ނިންމާ ފަރާތްތައް ކަރަންޓީނު ކުރާނީ ކައުންސިލުތަކުން އެރަށެއްގައި ކަނޑައަޅާ، އަދި ކައުންސިލުގެ ބެލުމުގެ ދަށުން ބަލަހައްޓާ ފެސިލިޓީތަކެއްގައި ކަމަށްވެސް މިނިސްޓްރީން ބުންޏެވެ.
