މާލޭގައި ތާށިވެފައިތިބި 147 މީހަކު ކަރަންޓީން ފެސިލިޓީތަކަށް ބަދަލުކޮށްފި
5 މެއި 2020 | އަންގާރަ 18:0614 ދުވަސް ހަމަކުރުމުން ރަށަށް ދެވޭނެ
ލޮކްޑައުން ކުރުމާ ގުޅިގެން ގިނަ ބަޔަކު މާލޭގައި ވަނީ ތާށިވެފައި
މާލެ ސިޓީ ލޮކްޑައުން ކުރުމާ ގުޅިގެން ތާށިވި މީހުންގެ ތެރެއިން، 147 މީހުން ކަރަންޓީން ފެސިލިޓީތަކަށް ލެވިފައިވާ ކަމަށް ކޮވިޑް-19 ޓާސްކް ފޯހުން ބުނެފި އެވެ.
އަންގާރަ ދުވަހުގެރޭ ނޭޝަނަލް އިމަރޖެންސީ އޮޕަރޭޝަންސް ސެންޓަރ (އެންއީއޯސީ)ގައި ބޭއްވި ނޫސްވެރިންގެ ބައްދަލުވުމުގައި ކޮވިޑް-19 ޓާސްކްފޯހުގެ ތަރުޖަމާނު މަބްރޫކު އަޒީޒް ވިދާޅުވީ، ލޮކްޑައުން ކުރުމާ ގުޅިގެން މާލެއަށް ކުރު މުއްދަތުތައް އައިސް ތިބި ގިނަ ބަޔަކު މާލޭގައި ތާށިވެފައިވާ ކަމަށެވެ.
އެމީހުން ރަށަށް ގެންދިއުމަށް ކުރާ މަސައްކަތުގެ ތެރެއިން މިހާރު 147 މީހުން އެކިއެކި ކަރަންޓީން ފެސިލިޓީތަކަށް ފޮނުވާލެވިފައިވާ ކަމަށާއި، އެތަންތަނުގައި 14 ދުވަސް ހަމަކުރުމަށްފަހު އަނބުރާ ރަށަށް ދެވޭނެ ކަމަށް މަބްރޫކް ވިދާޅުވި އެވެ.
އޭޕްރީލް 15 ގައި މާލެސިޓީ ލޮކްޑައުން ކުރުމާއި ގުޅިގެން ބޭސްފަރުވާއަށާއި، އަދިވެސް އެހެނިހެން ބޭނުންތަކަށް މާލެއަށް އައިސް ތިބި ގިނަ ބަޔަކު ވަނީ ރަށްރަށް ނުދެވި ތާށިވެފަ އެވެ. އެކަމުގެ ސަބަބުން އެމީހުންގެ އަތުން ގިނަ އަދަދަކަށް ފައިސާ ޚަރަދުވެ ތިބޭނެ ގޮތެއް ނެތުމުގެ ދަތިކަން ގިނަ ބަޔަކަށް ކޮށްފައިވާތީ އެކަމުގެ ޝަކުވާތައް ވަނީ ވަރަށް ބޮޑުވެފަ އެވެ. އަދި ބައެއް މީހުން ޙާލުގައި ޖެހުމާއި ގުޅިގެން ޖެންޑަރ މިނިސްޓްރީން ވަނީ އެ މީހުންނަށް ވަގުތީ ހިޔާވަހިކަންވެސް ފޯރުކޮށްދީފަ އެވެ.
އޭގެ އިތުރުން، ބައެއް ރަށްރަށުގެ ކައުންސިލުތަކުން މާލޭގައި ތާށިވެފައި ތިބި މީހުން ރަށަށް އެރުވުމަށް ދެކޮޅު ހަދަމުންދާ މައްސަލަތަކެއްވެސް ފާއިތުވި ދުވަސްތަކުގައި ފެންމަތިވެފައި ވެއެވެ.
