ޙާލު ސީރިއަސްވެގެން އަންގާރަ ދުވަހު ނިޔާވި 33 އަހަރުގެ ބަންގުލަދޭޝް މީހާ ވަޅުލައިފިއެވެ.

މޯލްޑިވްސް ނޭޝަނަލް ޑިފެންސް ފޯރސް(އެންއެންޑީއެފް) އިން ބުނީ އެމީހާ ވަޅުލާފައިވަނީ ހުޅުމާލޭ ސަހަރާގައި ކަމަށެވެ. އަދި ކަށުކަމާ ކެމީގެ ކަންކަމުގައި ޙަރަކާތްތެރިވީ އެމްއެންޑީއެފްގެ ފިރިހެން ޖަމާޢަތްތެރިން ކަމަށެވެ.

މިއީ ކޮވިޑް-19 އާއި ގުޅުން ހުރި ރާއްޖެއިން މަރުވި ދެވަނަ މީހާއެވެ. މިދިޔަ މަހުގެ 29 ވަނަ ދުވަހު 83 އަހަރުގެ ދިވެހި އަންހެނަކު ވެސް ވަނީ ކޮވިޑް-19 ޖެހިގެން ނިޔާވެފައެވެ.

ހޯމަ ދުވަހުގެރޭ އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) އަށް ގެންދިޔަ ބިދޭސީ މީހާ ނިޔާވެފައިވަނީ ސިކުނޑިއަށް ލޭ އެޅިގެން ކަމަށް އައިޖީއެމްއެޗުން ވަނީ ބުނެފައެވެ.

ކޮވިޑް-19 އާ ގުޅޭ އެންމެ ފަހުގެ މަޢުލޫމާތު ހިއްސާ ކުރުމަށް އަންގާރަ ދުވަހު ބޭއްވި ނޫސްވެރިންގެ ބައްދަލުވުމުގައި އައިޖީއެމްއެޗްގެ ޑޮކްޓަރ، ޑރ މުހައްމަދު ފައިޝާން ވިދާޅުވީ އައިޖީއެމްއެޗުން ނިޔާވި މީހާގެ ސީޓީ ސްކޭން ހެދިއިރު ސިނުޑިއަށް ލޭ އަރާފައިވާ ކަމަށާއި، ފިޓް ޖެހުމާއި ކަންކަން ދިމާވެފައި ވަނީ ސިކުނޑިއަށް ލޭއެރުމުން ލިބުނު ގެއްލިމުގެ ސަބަބުންވީ ކަމެއްގެގޮތުގައި ބެލެވޭކަމަށެވެ.

އެހެން އެކަން ދިމާވީ ކުރިންވެސް ހުރި ބައްޔެއްގެ ސަބަބުންކަން ސީޓީ ސްކޭނަށް ބެލުމުން ދެނެގަނެވިފައިވާކަމަށް ޑޮކްޓަރު ވިދާޅުވިއެވެ. ކޮވިޑް-19 ގެ ސަބަބުން ބައެއް ފަހަރަށް ލޭ ހޮޅިތައް ބެދޭ ކަމަށާއި، ނަމަވެސް މަރުވި ބިދޭސީ މީހާއަށް ދިމާވެފައި ވަނީ ލޭހޮޅިތައް ހަލާކުވެގެން ނުވަތަ ލޭ ހޮޅިއެއް ފަޅައިގެން ސިކުނޑިއަށް ލޭ އަރާފައި ހުރުން ކަމަށް ޑޮކްޓަރު ފާހަގަ ކުރެއްވިއެވެ.