އޭނާ ނިޔާވެފައިވަނީ އަންގާރަ ދުވަހު ހެނދުނު
ޑރ. މުހައްމަދު ފައިޝަން
ހޯމަ ދުވަހުގެރޭ އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) އަށް ގެންދިޔަ ބިދޭސީ މީހާ ނިޔާވެފައިވަނީ ސިކުނޑިއަށް ލޭ އެޅިގެން ކަމަށް ނެޝަނަލް އިމަރޖެންސީ އޮޕަރޭޝަން ސެންޓަރ(އެންއީއޯސީ)އިން ބުނެފިއެވެ.
ކޮވިޑް-19 އާ ގުޅޭ އެންމެ ފަހުގެ މަޢުލޫމާތު ހިއްސާ ކުރުމަށް އަންގާރަ ދުވަހު ބޭއްވި ނޫސްވެރިންގެ ބައްދަލުވުމުގައި އައިޖީއެމްއެޗްގެ ޑޮކްޓަރ، ޑރ މުހައްމަދު ފައިޝާން ވިދާޅުވީ އޭނާ އައިޖީއެމްއެޗުން ސީޓީ ސްކޭން ހެދިއިރު ސިނުޑިއަށް ލޭ އަރާފައިވާ ކަމަށާއި، ފިޓް ޖެހުމާއި ކަންކަން ދިމާވެފައި ވަނީ ސިކުނޑިއަށް ލޭއެރުމުން ލިބުނު ގެއްލިުމުގެ ސަބަބުންވީ ކަމެއްގެގޮތުގައި ބެލެވޭކަމަށެވެ.
އެހެން އެކަން ދިމާވީ ކުރިންވެސް ހުރި ބައްޔެއްގެ ސަބަބުންކަން ސީޓީ ސްކޭނަށް ބެލުމުން ދެނެގަނެވިފައިވާކަމަށެވެ.
ކޮވިޑް-19 ގެ ސަބަބުން ބައެއް ފަހަރަށް ލޭ ހޮޅިތައް ބެދޭ ކަމަށާއި، ނަމަވެސް މަރުވި ބިދޭސީ މީހާއަށް ދިމާވެފައި ވަނީ ލޭހޮޅިތައް ހަލާކުވެގެން ނުވަތަ ލޭ ހޮޅިއެއް ފަޅައިގެން ގޮސްގެން ސިކުނޑިއަށް ލޭ އަރާފައި ހުރުން ކަަމަށެވެ.
ފިޓް ޖެހިގެން ޙާލު ބޮޑުވެ ގެންދެވުނު ބަންގްލަދޭޝްގެ އުމުރުން 33 އަހަރުގެ މި ބަލިމީހާ ކޮވިޑް-19 އަށް ޓެސްޓްކުރިއިރު ޕޮޒިޓިވްވެފައިވާއިރު، އޭނާ މަރުވެފައިވަނީ އަންގާރަ ދުވަހުގެ ވަގުތެއްގައެވެ. އޭނާ ވަޅުލުމުގެ ކަންކަން ކުރިއަށް ގެންދިއުމަށް ޓަކައި އެމްބަސީއަށް އަންގާފއިވާ ކަމަށާއި އެމްބަސީގެ ފަރާތުން އޭނާގެ ޢާއިލާއާ ވާހަކަ ދައްކާފައިވާކަމުގެ މަޢުލޫމާތު ލިބިފައިވާ ކަމަށް ޓާސްކްފޯސްގެ ތަރުޖަމާން މަބްރޫކް އަޒީޒް ވިދާޅުވިއެވެ.
އަދި ރާއްޖޭގައި އޭނާ ވަޅުލުމުގެ ކަންކަން އެސްއޯޕީތަކުގައި ހަަމަޖެހިފައިވާ ގޮތަށް ކުރިއަށް ގެންދިއުމަށް ޢާއިލާއިން ބުނެފައިވާ ކަމަށް މަބްރޫކް ވިދާޅުވިއެވެ.
