އައްޑޫ ސިޓީ ޕީޖީ އޮފީހުގެ އަޑުއެހުންތައްވެސް ވީޑިއޯ ކޮންފަރެންސް މެދުވެރިކޮށް!
ބަންދު މައްސަލަތަކާއި އަޑުއެހުންތައް ދެން ކުރިއަށްދާނީ މި ސިސްޓަމް މެދުވެރިކޮށް
ޕީޖީ އޮފީހުން ވީޑިއޯ ކޮންފަރެންސް މެދުވެރިކޮށް ކުރިއަށްގެންދިޔަ ފުރަތަމަ ޝަރީއަތުގެ މަންޒަރެއް
އައްޑޫ ސިޓީ ހިތަދޫގައި ހުންނަ ޕްރޮސެކިއުޓަރ ޖެނަރަލް (ޕީޖީ) އޮފީހުގައިވެސް ވީޑިއޯ ކޮންފަރެންސް މެދުވެރިކޮށް ޝަރީޢަތްތައް ކުރިއަށްގެންދެވޭނެ އިންތިޒާމު ހަމަޖައްސައިފިއެވެ.
ހޯމަ ދުވަހު ޕީޖީ އޮފީހުން ކުރި ޓްވީޓެއްގައި ބުނީ، އައްޑޫގައި ހުންނަ ޕީޖީ ގޮފީގައި ވީޑިއޯ ކޮންފަރެންސް ފެސިލިޓީ ޤާއިމު ކުރެވިފައިވާ ކަމަށާއި، ބަންދު މައްސަލަތަކާއި އަޑުއެހުންތައް ދެން ކުރިއަށްދާނީ މި ސިސްޓަމް މެދުވެރިކޮށް ކަމަށެވެ. އަދި މި ސިސްޓަމް މެދުވެރިކޮށް އައްޑޫގެ އިތުރުން ފުވައްމުލަކުގެ އަޑުއެހުންތައްވެސް ކުރިއަށް ގެންދެވޭނެކަމަށް ޕީޖީ އޮފީހުން ބުނެފައިވެއެވެ.
އެގޮތުން ހޯމަ ދުވަހު ވަނީ މި ސިސްޓަމް މެދުވެރިކޮށް އައްޑޫ ސިޓީ ހިތަދޫ ކޯޓުގައި ފުރަތަމަ އަޑުއެހުން ކުރިއަށްގެންގޮސްފައެވެ.
އެކަމާ ގުޅޭގޮތުން "ރާއްޖެއެމްވީ"އަށް މަޢުލޫމާތުދެއްވަމުން ޕީޖީ ހުސައިން ޝަމީމް ވިދާޅުވީ، އައްޑޫސިޓީގައި ޤާއިމު ކުރެވިފައިވާ ވީޑިއޯ ކޮންފަރެންސް ސިސްޓަމްގެ އިތުރުން، ކުރިއަށް އޮތް ތަނުގައި ކުޅުދުއްފުށީ ސީޓިގައިވެސް ސިސްޓަމެއް ޤާއިމުކޮށް ޝަރީޢަތްތައް ކުރިއަށްގެންދެވޭނެ އިންތިޒާމުތައް ރާވަމުންދާ ކަމަށެވެ. އެގޮތުން ފުރަބަންދު ނިމުމާއެކު ސިސްޓަމް ޑެލިވަރ ކުރުމުގެ މަސައްކަތް ކުރައްވާނެކަމަށް ޕީޖީ ވިދާޅުވިއެވެ.
ކޮވިޑް-19 އާއި ގުޅިގެން ސުޕްރީމް ކޯޓުން އެކުލަވާލި ޚާއްޞަ ޤަވާއިދެއްގެ ދަށުން، ވީޑިއޯ ކޮންފަރެންސް މެދުވެރިކޮށް ޝަރީޢަތް ކުރުމުގެ ނިޒާމަކީ ޢަދުލުގެ ނިޒާމަށް ލިބިގެންދިޔަ އިތުރު ކުރިއެރުމެއް ކަމަށާއި، އެއީ ޚަރަދު ކުޑަވާނެ ކަމެއްކަންވެސް ޕީޖީ ވަނީ ފާހަގަކުރައްވާފައެވެ.
ވީޑިއޯ ކޮންފަރެންސް މެދުވެރިކޮށް ޝަރީޢަތްތައް ކުރިއަށް ގެންދިއުމަށް ބޭނުންވާ 6 ސިސްޓަމް މާލޭގައި ހުންނަ ޕީޖީ އޮފީހުގައިވެސް މިހާރު ވަނީ ޤާއިމު ކުރެވިފައެވެ.
