މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީލްގެ) އަށް ދިގު މުއްދަތަކަށް ޚިދުމަތްކޮށްދެއްވި މުހައްމަދު ސޯލިހު ނިޔާވެއްޖެއެވެ.
މުހައްމަދު ސޯލިހު ނިޔާވީ ބަލިވެ އުޅުމަށްފަހު ހާލު ގޯސްވެގެން އާދިއްތަ ދުވަހުގެރޭ އައިޖީއެމްއެޗުގައި އެޑްމިޓްކުރި ފަހުން، ހޯމަ ދުވަހުގެ ހެނދުނުގެ ވަގުތެއްގައެވެ. ނިޔާވިއިރު އުމުރަކީ 63 އަހަރެވެ.
ނިޔާވިިއިރު މުހައްމަދު ސޯލިހު ހުންނެވީ އެމްއޭސީއެލްގެ ޑެޕިއުޓީ ޗީފް އޮފިސަރުގެ މަގާމުގައެވެ.
1978 ވަނަ އަހަރުން ފެށިގެން، ރާއްޖޭގެ އެއާޕޯޓްގައި ވަރަށް ބޮޑެތި ޚިދުމަތްތަކެއް ކޮށްދެއްވާފައިވާ މުހައްމަދު ސޯލިހު ނިޔާވުމާ ގުޅިގެން އެމްއޭސީއެލުން ވަނީ މަސައްކަތުގެ އަގުވަޒަންކޮށް އާއިލާއަށް ތައުޒިޔާ ފޮނުވާފައެވެ. މުހައްމަދު ސޯލިހުގެ ވަކިވެދިއުމަކީ ކުންފުންޏާއި، ގައުމަށް ލިބުނު ފޫނުބެއްދޭ ވަރުގެ ބޮޑު ގެއްލުމެއްގެ ގޮތުގައި އެމްއޭސީއެލުން ސިފަކޮށްފައިވެއެވެ.
މުހައްމަދު ސޯލިހް ނިޔާވުމާއި ގުޅިގެން ކުރީގެ ރައީސް މުހައްމަދު ނަޝީދު ކުރެއްވި ޓުވީޓެއްގައި ވިދާޅުވީ ގަނޑުވަރު އަހުމަދު ސޯލިހް އަލީ ދީދީގެ މުހައްމަދު ސޯލިހަކީ އޭވިއޭޝަން ދާއިރާގެ ތަޖުރިބާކާރު ހިދުމަތްތެރިއެއް ކަމަށެވެ. އަދި ސޯލިހަކީ އަބަދުވެސް އިސްލާހީ މަސައްކަތަށް ތާއީދުކުރައްވާ، ހާއްސަކޮށް ލާމަރުކަޒީ ނިޒާމް ގެނައުމަށް ބާރު އެޅުއްވި ބޭފުޅެއްކަމަށް ރައީސް ނަޝީދު ވިދާޅުވި އެވެ.
