އިންތިހާބު ލަސްކުރަނީ ރައްޔިތުން ފޫހިކުރަން: މުހައްމަދު އަބްދުލްކަރީމް
ލާމަރުކަޒީ ނިޒާމަކީ އެމްޑީޕީން ގެނެސްފައިވާ ނިޒާމެއް
ހެންވޭރު ދެކުނު ދާއިރާގެ ކަންމަތީ ބައްދަލުވުމުގައި މުހައްމަދު އަބްދުއް ކަރީމް ވާހަަކަދއްކަވަނީ
ސަރުކާރުން އިންތިހާބު ލަސް ކުރަނީ ރައްޔިތުން ފޫހިކޮށްލުމަށް ކަމަށް ހެންވޭރު ދެކުނު ދައިރާގެ މެންބަރު މުހައްމަދު އަބްދުލްކަރީމް ވިދާޅުވެއްޖެ އެވެ.
ހެންވާރު ދެކުނު ދައިރާގެ ކައުންސިލް ކެމްޕެއިންގެ ތެރެއިން ބޭއްވި، ކަންމަތީ ޖަލްސާގައި ވާހަކަދައްކަވަމުން މުހައްމަދު އަބްދުލްކަރީމް ވިދާޅުވީ، ރާއްޖޭގައި ޑިމޮކްރެޓިކް ނިޒާމެއް ގާއިމްކޮށްފައި އޮތް ނަމަވެސް ވެރިކަމުގައި ހުންނެވީ ހުދުމުހުތާރު ވެރިއެއް ކަމަށެވެ. އަދި ހުދުމުހުތާރު ވެރިކަމެއްގައި ރައްޔިތުންނަށް އެމީހުން ބޭނުންވާ ކަންކަން ކުރުމަށް ހިޔާލު ފާޅު ކުރެވޭނީ ނަގާ އާއްމު ވޯޓުން ކަމަށް އޭނާ ވިދާޅުވި އެވެ.
"މިއީ އަޅުގަނޑުމެންނަށް ލިބޭ ވަރަށް މުހިއްމު ފުރުސަތެއް، ރައްޔިތުންނަށް ނިކުމެ، މާފިޔާ ގޭންގެއް ގޮތަށް ހިންގަމުންދާ ސަރުކާރަށް ނޫނެކޭ ބުނުމަށް. މިއީ ލިބޭ ވަރަށް މަދު ފުރުސަތެއް. މި ފުރުސަތުގެ ބޭނުން ރައްޔިތުން ބޭނުން ކުރަންޖެހޭ." މުހައްމަދު އަބްދުލް ރަހީމު ވިދާޅުވި އެވެ.
މުހައްމަދު އަބްދުލްކަރީމް ވިދާޅުވީ، ރައީސް ނަޝީދުގެ ސަރުކާރުން ގެނައި ލާމަރުކަޒީ ނިޒާމަކީ ވަރަށް ފުރިހަމަ ނިޒާމެއް ކަމަށާއި އެނިޒާމުގެ ތެރެއިން ރައްޔިތުންގެ ވެރިކަމެއް ހިންގުމަށް ފަހި ފުރުސަތުތަކެއް ލިބިގެންދާނެ ކަމަށެވެ. މުހައްމަދު އަބްދުލް ކަރީމް ވިދާޅުވީ، މި ނިޒާމު ހަރުދަނާ ކުރުމަށް ރައީސް ނަޝީދު ސަރުކާރަށް ލިބުނު މަދު ދުވަސްކޮޅުގައި ގިނަ މަސައްކަތްތަކެއް ކުރެވިގެން ދިޔަ މަންޒަރު ރައްޔިތުންނަށް ފެނިގެންދާނެ ކަމަށެވެ. އެހެން ނަމަވެސް މިސަރުކާރުން ނިޒާމުގެ ތެރެއިން ވަރަށް ގިނަ ފުރުސަތުތަކެއް ހަނިކޮށްފައިވާ ކަމަށް އޭނާ ވިދާޅުވި އެވެ.
އަބްދުލްކަރީމް ވަނީ ގުޅިފައިވާ ސިޔާސީ ޕާޓީތަކުން އެކުވެގެން ފަށާފައިވާ އިސްލާހީ މަސައްކަތްތައް ކާމިޔާބު ކުރުމަށްޓަކާއި ކުރިއަށް އޮތް ކައުންސިލް އިންތިހާބު މުހިއްމުކަން ފާހަގަކުރައްވާފަ އެވެ. އަދި ހުރިހާ ރައްޔިތުންވެސް ވޯޓުލުމުގެ ހައްގު އެންމެ ފުރިހަމަ އަށް ބޭނުން ކުރުމަށް އޭނާ ވަނީ ގޮވާލައްވާފަ އެވެ.
