ތަމްރީނު ލިބިފައިވާ ފަރާތްތައް ސިއްހީ ހިދުމަތްތެރިންގެ ސަފުތަކާ ގުޅެން ރައީސް އެދިވަޑައިގެންފި
4 މެއި 2020 | ހޯމަ 12:52ރާއްޖޭގައި ތިއްބެވި ޞިއްޙީ ޚިދުމަތްތެރިންނަކީ މާ ގިނަ ބައެއް ނޫން
ރައީސް ސޯލިހު ގައުމާއި މުހާތަބްކުރެއްވުން
ކޮވިޑް-19 ގެ ސަބަބުން، ރާއްޖެ މިވަނީ ވަރަށް ބޮޑަށް ސިއްހީ ހިދުމަތްތެރިންނަށް ބޭނުންވެފައިވާކަމަށާއި ހިދުމަތުން ރިޓަޔަރކުރައްވައިގެން ތިއްބެވި ބޭފުުޅުންނާއި ހިދުމަތާ ދުރަށް ޖެހިވަޑައިގެން އުޅުއްވާ ބޭފުޅުންގެ އެހީތެރިކަން ބޭނުންވާކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
ގައުމާ މުހާތަބުކޮށް ދެއްކެވި ވާހަކަފުޅުގައި ރައީސް ސޯލިހު ވިދާޅުވީ، ކޮވިޑް-19 ގެ ސަބަބުން، ރާއްޖެ ވަރަށް ބޮޑަށް ސިއްހީ ހިދުމަތްތެރިންނަށް ބޭނުންވެފައިވާކަމަށާއި ހިދުމަތުން ރިޓަޔަރކުރައްވައިގެންނާއި ވަގުތީ ގޮތުން ހިދުމަތާ ދުރަށް ޖެހިވަޑައިގެން އުޅުއްވާ ބައެއް ބޭފުޅުންވެސް އެބަތިބިކަމަށެވެ.
ރައީސް ވަނީ އެބޭފުޅުން އެނބުރި ހިދުމަތަށް ވަޑައިގަންނަވަން އިލްތިމާސްކުރައްވާފައެވެ. ރައީސް ވިދާޅުވީ ޤައުމު މިއަދު ސިއްހީ ހިދުމަތްތެރިންގެ ޚިދުމަތަށް ނުހަނު ބޮޑަށް ބޭނުންވާކަމަށެވެ.
ރައީސް އިތުރަށް ވިދާޅުވީ، ރާއްޖޭގައި ތިއްބެވި ސިއްހީ ހިދުމަތްތެރިންނަކީ މާ ގިނަ ބައެއް ނޫންކަމަށާއި ނަމަވެސް އެއީ ކަމުގެ ޢިލްމާއި ތަޖުރިބާ ލިބިވަޑައިގެން ތިއްބެވި، އަދި ގައުމީ ރޫހުގައި މަސައްކަތްކުރެއްވުމަށް ވަރަށް ހުޝިޔާރު ބޭފުޅުންކޮޅެއްކަމަށެވެ. އަދި ކުރިން އަންދާޒާކުރި ހަލުވިމިނުގައި، މި ބަލި ރާއްޖޭގައި ނުފެތުރި މިއޮތީ، މާތް ﷲގެ ވާގިފުޅާއެކު، ސިއްހީ ހިދުމަތްތެރިން ދެއްވާ ލަފަޔާ އެއްގޮތަށް ސަރުކާރުން އެޅި ފިޔަވަޅުތަކާއި، ސިއްހީ ޚިދުމަތްތެރިންގެ އިރުޝާދުތަކަށް ރައްޔިތުން ދެއްވި އެއްބާރުލުމުގެ ސަބަބުންކަމަށެވެ.
މިހާރު ދިމާވެފައިވާ އުނދަގޫތައް ތަޙައްމަލްކުރައްވައި، ކެތްތެރިކަމާއެކު ރައްޔިތުން ދެއްވާ އެއްބާރުލެއްވުމަށް، ރައީސް ވަނީ ޝުކުރު އަދާކުރައްވާފައެވެ. އަދި، ރާއްޖެއިން މި ބަލިި ނައްތައިލުމަށް، ރެޔާއި ދުވާލު އެއްވެސް ވަރުބަލިކަމެއް ނެތި، ޢާއިލާއާއި އަނބިދަރިންނާ ދުރުގައި މަސައްކަތް ކުރައްވާ ވަރަށް ގިނަ ބަޔަކު ތިބިކަން ފާހަގަކުރައްވައި ރައީސް އެފަރާތްތަކަށް ޝުކުރު އަދާކުރެއްވިއެވެ.
