ކައުންސިލްތަކުގެ މައްސަލައަށް ހައްލެއް ގެނެވެންއޮތީ ގާނޫނުއާސާސީ އިސްލާހުކޮށްގެން: ޝިޔާމް
4 މެއި 2020 | ހޯމަ 12:07ޝިޔާމާއި އިދިކޮޅު އެއްވެސް މެމްބަރަކު އެބިލް ވޯޓު ދެއްވާފައެއް ނުވޭ
ނައިފަރު ދާއިރާގެ މެމްބަރު އަދި އިދިކޮޅު ޕީޕީއެމްގެ ނައިބު ރައީސް އަހުމަދު ޝިޔާމް
ލޯކަލް ކައުންސިލްތަކުގެ އިންތިހާބު ބޭއްވެން ނެތްއިރު، މިހާރު ހިނގަމުންދާ ކައުންސިލްތަކުގެ ދައުރު ދިގު ދައްމާލެވެން އޮތީ ގާނޫނުއަސާސީ އިސްލާހު ކޮށްގެން އެކަނިކަމަށް ރައްޔިތުންގެ މަޖިލީހުގެ ނައިފަރު ދާއިރާގެ މެމްބަރު އަދި އިދިކޮޅު ޕީޕީއެމްގެ ނައިބު ރައީސް އަހުމަދު ޝިޔާމް ވިދާޅުވެއްޖެ އެވެ.
ރައްޔިތުންގެ މަޖިލީހުގެ ހެންވޭރު ހުޅަނގު ދާއިރާގެ މެންބަރު ޙަސަން ލަޠީފް ހުށަހަޅުއްވާފައިވާ، "ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުން ކަށަވަރު ކުރުމުގެ ޚާއްޞަ ބިލް 2020" އަށް ބަހުސް ކުރައްވަމުން ޝިޔާމް ވިދާޅުވީ، ގާނޫނަކުން މިމައްސަލައަށް ހަލެއް ގެނެވެން ނެތް ކަމަށެވެ.
ޝިޔާމް ވިދާޅުވީ، ގާނޫނުއަސާސީ އިސްލާހު ކުރުމަށް މިހާރުވެސް ހުރަހެއް ނެތް ކަމަށެވެ. މިހާރުވެސް މިޖަލްސާތައް ބާއްވާގޮތަށް ބާއްވައިގެން ގާނޫނުއަސާސީ އިސްލާހު ކުރެވިދާނެ ކަމަށާއި، ގާނޫނުއަސާސީ އިސްލާހު ކުރުމަކީ މި ހިނގާ 19 ވަނަ މަޖިލީހަށް އާކަމެއް ވެސް ނޫންކަަށް ޝިޔާމު ވިދާޅުވި އެވެ.
ޝިޔާމު ވިދާޅުވީ މިހާރު މިއޮތީ ގާނޫނުއަސާސީގައި ބުނާ ކުއްލި ނުރައްކަލުގެ ހާލަތެއް ނޫން ކަމަށެވެ. އަދި މިހާރު ހިނގަމުންދާ 19 ވަނަ މަޖިލީހަކީ މިހާތަނަށް ގާނޫނުއަސާސީއަށް އެންމެގިނަ އިސްލާހުތައް ގެނެސްފައިވާ މަޖިލިސް ކަމަށް ވެސް ޝިޔާމް ވިދާޅުވި އެވެ.
ހަސަން ލަތީފް ހުށަހެޅުއްވި "ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުން ކަށަވަރު ކުރުމުގެ ޚާއްޞަ ބިލް 2020" މަޖިލީހަށް ބަލައިގަތުމަށް އިދިކޮޅު ޕީޕީއެމް-ޕީއެންސީގެ އެއްވެސް މެމްބަރަކު ވޯޓު ދެއްވާފައެއް ނުވެއެވެ.
މި ބިލަކީ، މިހާރު ހިނގަމުންދާ ކައުންސިލްތަކުގެ ދައުރު އަންނަ ޖޫން މަހުގެ 3 ވަނަ ދުވަހުގެ ނިޔަލަށް ހަމާވާތީ، ކައުންސިލްތައް ޤާނޫނީ ހުސްކަމެއް، ނުވަތަ، އިދާރީ ދާއިރާތައް ލާމަރުކަޒީ އުޞޫލުން ހިންގުމަށް ޤާނޫނީ ހުސްކަމެއް އަންނާތީ، އެކަމަށް ޤާނޫނީ ފަރުވާއެއް ހޯދުމަށް ހުށަހަޅާފައިވާ ޚާއްޞަ ބިލެކެވެ.
މި ބިލުގެ މައިގަނޑު މަޤްޞަދަކީ ޖޫން މަހުގެ 3 ގެ ފަހުން، އަދި ކައުންސިލްތަކުގެ އިންތިޚާބު ބޭއްވި، ކައުންސިލަރުން މަޤާމާ ހަވަލުވުމާހަމައަށް، މިހާރު ހިނގަމުންދާ ކައުންސިލަރުން ބޭއްތިއްބުމަށާއި ޤާނޫނުއަސާސީގައި ރާއްޖެ ހިންގަންޖެހޭނީ ލާމަރުކަޒީ އުޞޫލުންކަމަށްބުނާތީ، އެ މަފްޙޫމް ދެމެހެއްޓުމަށްޓުމުގެ މަޤްޞަދުގައި ހުށަހަޅާފައިވާ ޚާޢްޞަ ބިލެކެވެ.
