ނުފުރިފައި ތިބި ތައިލެންޑްގެ 131 މީހަކު އަނބުރާ ގައުމަށް!
4 މެއި 2020 | ހޯމަ 12:03މީގެކުރިން 55 މީހަކު ވަނީ ގައުމަށް ގެންގޮސްދީފައި
ރާއްޖޭގައި ތިބި ތައިލެންޑްގެ ރައްޔިތުން ގައުމަށް ގެންގޮސް ދިނީ ރާއްޖޭގެ ގައުމީ އެއަރލައިނުން
ކޮވިޑް-19 ގެ ސަބަބުން ނުފުރިފައި ތިބި 131 މީހަކު އަނބުރާ ގައުމަށް ފޮނުވައިލައިފި އެވެ.
ހޯމަ ދުވަހު ރާއްޖޭގައި ގާއިމްކޮށްފައިވާ ތައި ކޮންސިއުލޭޓުއިން ކޮށްފައިވާ ޓުވީޓެއްގައި ބުނެފައިވަނީ، ތައި އެމްބަސީ އަދި ކޮންސިއުލޭޓު ގުޅިގެން، ކޮވިޑް-19 މި ހާލަތުގައި އަނބުރާ ގައުމަށް ދާން ބޭނުންވެފައި ތިބި 131 މީހަކު މޯލްޑިވިއަންގެ ޗާޓަރު ފްލައިޓެއްގައި ފޮނުވާފައިވާކަމަށެވެ.
މޯލްޑިވިއަނުން ވަނީ އޭޕްރީލް މަހުގެ 18 ގައި ރާއްޖޭގައި ތިބި ތައިލެންޑުގެ 55 މީހުން، ގައުމަށް ގެންގޮސްދީފަ އެވެ. މިފްލައިޓަކީ އެގައުމުގައި ތިބި ދިވެހިންނަށް ފޮނުވި ކެއާ ޕެކޭޖުތަކާއެކު ދިޔަ ފްލައިޓެކެވެ. މި ފްލައިޓުގައި ރާއްޖޭގައި ތިބި ތައިލެންޑުގެ ފަތުރުވެރިންނާއި ވޯކް ޕާމިޓް ހޯލްޑަރުން ހިމެނެއެވެ.
ކޮވިޑް-19 އާ ގުޅިގެން ވައިގެ ދަތުރުފަތުރުތައް ހުއްޓުމަކަށް އައިސްފައިވާއިރު، އަނބުރާ ގައުމަށް ނުދެވި ގިނަ އަދަދެއްގެ ފަތުރުވެރިންނާއި ބިދޭސީ މުވައްޒަފުން އެބަތިއްބެވެ. އަދި މިހާރު ވެސް ރާއްޖޭގައި ތާށިވެފައިތިބި ފަރާތްތައް ފޮނުވާލުމުގެ މަސައްކަތް ކުރިއަށްދާ ކަމަށް ވަނީ މައުލޫމާތު ލިބިފައި އެވެ.
