ކަނދުފައްޗެއްގައި ލ. ކުނަހަންދޫ އަށް އެރި ތިން މީހަކު ހައްޔަރުކޮށްފި އެވެ.

މި ހާދިސާއާ ގުޅޭގޮތުން މައުލޫމާތު ދެމުން ފުލުހުން ބުނީ, މެއި މަހުގެ 3 ވަނަ ދުވަހުގެ މެންދަަމު 1:16 ހާއިރު ހުއްދަ ނެތި ލ. ކުނަހަންދޫ އަށް ސިއްރުން އަރައިގެން ރަށުތެރޭގައި އުޅެނިކޮށް ތިން މީހަކު ފުލުހުންގެ ބެލުމުގެ ދަށަށް ގެންގޮސްފައިވާ ކަމަށެވެ.

ލ. މާމެންދޫއިން ފުރައިގެން މި ތިން މީހުން ގޮސްފައިވަނީ އެއްކަނދުފައްޗެއްގަ އެވެ. މި މައްސަލައިގައި ހައްޔަރުކޮށްފައިވަނީ އުމުރުން 43 އަހަރާއި، 38 އަހަރު އަދި 29 އަހަރުގެ ދިވެހި ފިރިހެނުންނެވެ.

ތިން މީހުންގެ ބަންދާއި މެދު ގޮތެއް ނިންމުމަށް އާދިއްތަ ދުވަހު ލ. ގަން މެޖިސްޓްރޭޓް ކޯޓަށް ގެންދިއުމުން، ކޯޓުން ވަނީ އެ ތިން މީހުންގެ ބަންދަށް 15 ދުވަސް ޖަހައިދީފަ އެވެ.