ށ. ނަރުދޫން ކޮވިޑް-19އަށް ޓެސްޓުކުރުމަށް ނެގި 29 ސާމްޕަލްއެއްގެ ނަތީޖާ ނުލިބޭކަމަށް އެ ރަށު ޓާސްކްފޯސްގެ ޗެއަރ މުޞްޠަފާ މޫސާ ވިދާޅުވެއްޖެއެވެ.

ކޮވިޑް-19 އާ ގުޅިގެން ރާއްޖެޓީވީން ގެނެސްދޭ ޚާއްޞަ ކަވަރޭޖަށް ދެއްވި ފޯން އިންޓަވިއުއެއްގައި މުޞްޠަފާ ވިދާޅުވީ ނަރުދޫން މިހާތަނަށް 52 ސާމްޕަލް ނަގާފައިވާއިރު އޭގެ ތެރެއިން 11 ސާމްޕަލްގެ ނަތީޖާ ޕޮޒިޓިވްވެފައިވާ ކަމަށެވެ. އަދި 12 ސާމްޕަލްގެ ނަތީޖާ ނެގެޓިވްވެފައިވާއިރު 29 ސާމްޕަލެއްގެ ނަތީޖާ އަދި ނުލިބޭކަމަށް އޭނާ ވިދާޅުވިއެވެ.

މޮނީޓަރިންގ ގެ ޙާލަތުގައި 12 ތަނެއްވާކަން ފާހަގަކުރައްވާ މުޞްޠަފާވިދާޅުވީ އެއީ އަމާޒު ބޯޓު ހިމަނައިގެން ކަމަށެވެ.

ޞިއްޙީ އާލާތްތައް ބޭނުންވާ ވަރަށް ރަށުގައި އެބަހުރި ކަމަށާއި، އެހެންނަމަވެސް ރަށުގެ ހުރިހާ ރައްޔިތުން ބޭނުންވާ މިންވަރަށް މާސްކް ނެތްކަމަށް މުޞްޠަފާ ވިދާޅުވިއެވެ. އެހެންނަމަވެސް ހެޔޮ އެދޭ ގިނަ ފަރާތްތަކުން ހަދިޔާކޮށްފައިވާ ފޮތި މާސްކުތަކެއް މިހާރު ރައްޔިތުން ބޭނުން ކުރަމުންދާ ކަމަށް އޭނާ ވިދާޅުވިއެވެ.

ރައްޔިތުންގެ ޙާލަތު ކައިރިން ބަލަމުންދާކަން ފާހަގަކުރައްވާ މުޞްޠަފާ ވިދާޅުވީ ރޯގާގެ އަލާމާތެއް ފެނިއްޖެނަމަ ހެލްތު ސެންޓަރަށް ގުޅާ އެ މަޢުލޫމާތު ހިއްސާ ކުރުމަށް ވަކި ނަންބަރެއް ޤާއިމުކުރެވިފައިވާ ކަމަށެވެ. އަދި އެ ނަންބަރަށް ގުޅުމުން ކަންތައްތައް ދެން ކުރަންވީ ގޮތުގެ އިރުޝާދު ލިބިގެންދާނެ ކަމަށް ވެސް އޭނާ ވިދާޅުވިއެވެ.

ވައިރަސް އިތުރަށް ފެތުރިގެން ގޮސްދާނެ ކަމަށް ރައްޔިތުން ކަންބޮޑުވާ ކަމަށާއި، ޓާސްކްފޯސްއާއި، ރަށު ކައުންސިލްގެ އިރުޝާދަށް ހުރިހާ ރައްޔިތުން ވެސް ކިޔަމަންވާ ކަމަށް މުޞްޠަފާ ވިދާޅުވިއެވެ.

އެ ރަށުން ވައިރަސްއަށް ޕޮޒިޓިވްވި ގިނަ މީހުންގެ ހަށިގަނޑުގައި ބަލީގެ އެއްވެސް އަލާމާތެއް ނެތްކަން ވެސް އޭނާ ވަނީ ފާހަގަކުރައްވާފައެވެ.