އަމިއްލައަށް ފައިސާ ދައްކާ ގޮތަށް ކަރަންޓީނުވާން ލަންކާއިން ހޮޓާތައް ދޫކުރަނީ

ބޭރުގެ ގައުމުތަކުގައި ތިބި ލަންކާ މީހުންގެ ތެރެއިން އެގައުމަށް އަންނަ މީހުން ކަރަންޓީނުވުމަށް ހޮޓާތައް ހަމަޖައްސާފައިވާ ކަމަށާއި، ހޮޓަލަށް ފައިސާ ދައްކަން ޖެހޭނީ އަމިއްލަ ހަރަދުގައި ކަމަށް ސްރީލަންކާގެ ޗީފް އޮފް ޑިފެންސް ސްޓާފް އަދި ކޮމަންޑަރ އޮފް ދަ އަރމީ ޝަވެންދްރަ ސިލްވާ ވިދާޅުވެއްޖެއެވެ.

ހިތް ހަމަޖެހިލައިގެން އަރާމުކޮށް ކަރަންޓީނު މުއްދަތު ފުރިހަމަ ކުރަން ހޮޓާތަކުގައި ތިބެން ބޭނުންވާކަމަށް ލަންކާއިން ބޭރުން އަންނަ އެގައުމުގެ ބައެއް މީހުން ވަނީ ބުނެފައެވެ.

ސަރުކާރުން ބުނީ، ހޮޓަލުން އާއްމުކޮށް ރޫމްތަށް ދޫކުރާ ވަރަށް ވުރެ ދަށް އަގެއްގައި ރޫމްތައް ހަމަޖައްސައިދޭނެ ކަމަށެވެ. ބައެއް ހޮޓާތަކުން އެކަން ސަރުކާރަށް އަންގާފައިވާކަމަށެވެ.

ސިލްވާ ވިދާޅުވީ، ހޮޓާތަކުގައި ކަރަންޓީނުވާން ބޭނުންވާ ފަރާތްތަކަށް އެ ފުރުސަތު ބައެއް ހޮޓާތަކުން ހުޅުވާލާފައިވާ ކަމަށެވެ. އޭނާ ވިދާޅުވީ، ތިން ގަޑިއިރުގެ ކެއުން ހިމެނޭ ގޮތަށް ރޫމްތައް ދޫކުރަނީ ދުވާލެއްގެ މައްޗަށް 20،000 އާއި 40،000 ދެމެދު ރުޕީސް އަށް ކަމަށެވެ.

ވަކިން ރޫމް ނަގަން ބޭނުންވާ މީހުންނަށް ރޫމް ދޫކުރުމަށް ހަމަޖެހިފައިވަނީ ދުވާލެއްގެ މައްޗަށް 7،500 (614.51 ރުފިޔާ) ރުޕީސް އަށެވެ. އޭނާ ވިދާޅުވީ، ތިން އިރުގެ ކެއުމާއި އެހެނިހެން ހިދުމަތް ކުޑަ އަގުގައި ދިނުމުން ހޮޓާތަކުގެ ވެރިންނަށް އެއްވެސް ފައިދާއެއް ނުލިބޭނެ ކަމަށެވެ.

ސިލްވާ ވިދާޅުވީ، ހޮޓަލުގައި ތިބެން ހަމައެކަނި ފުރުސަތު ދޭނީ ކަރަންޓީނުވާން ޖެހޭ މީހުން އެކަނި ކަމަށެވެ. އަދި ހޮޓާތަކުގައި ނުވަތަ ސަރުކާރުން ގާއިމުކޮށްފައިވާ ކަރަންޓީނު ސެންޓަރުތަކުގައި ކަރަންޓީނުވާން ނިންމުމަކީ ބޭރުން ލަންކާ އަށް އަންނަ މީހުންގެ އަތްމަތީގައި އޮންނަ ކަމެއް ކަމަށް އޭނާ ވިދާޅުވިއެވެ.