މާލޭގައި ތާށިވެފައި ތިބި މީހުން ރަށްރަށަށް ގެންދިއުމާމެދު ކައުންސިލުތަކުގެ ހިޔާލު ހޯދަނީ
3 މެއި 2020 | އާދީއްތަ 17:50ކައުންސިލުތަކުން އެކަމުގައި އަމަލުކުރަން ބޭނުންވާ ގޮތުގެ ހިޔާލު ހޯދަމުންދޭ
ކޮވިޑް-19 ޓާސްކްފޯހުގެ ތަރުޖަމާނު މަބްރޫކު އަޒީޒް
މާލޭގައި ތާށިވެފައި ތިބި މީހުން ރަށްރަށަށް ގެންދިއުމާމެދު ރަށު ކައުންސިލުތަކުގެ ހިޔާލު ހޯދަމުންދާކަމަށް ނޭޝަނަލް އިމަރޖެންސީ އޮޕަރޭޝަންސް ސެންޓަރ (އެންއީއޯސީ)އިން ބުނެފިއެވެ.
އާދިއްތަ ދުވަހުގެރޭ ނޭޝަނަލް އިމަރޖެންސީ އޮޕަރޭޝަންސް ސެންޓަރ (އެންއީއޯސީ)ގައި ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ކޮވިޑް-19 ޓާސްކްފޯހުގެ ތަރުޖަމާނު މަބްރޫކު އަޒީޒް ވިދާޅުވީ، ރަށްރަށުން މާލެ އައިސް މާލޭގައި ތާށިވެފައި ތިބި މީހުން އެނބުރި ރަށަށް ދިއުމާމެދު އުސޫލެއް އެކުލަވާލަމުންދާކަމަށެވެ. އެގޮތުން އެ އުސޫލު އާންމު ކުރުން ލަސްވަނީ އިތުރަށް ބަލަންޖެހޭ ކަންކަން ހުރުމުންކަން ފާހަގަކުރައްވައި މަބްރޫކު ވިދާޅުވީ، އުސޫލު އެކުލަވާލުމުގެ ކުރިން ރަށު ކައުންސިލްތަކާއި މަޝްވަރާކޮށް ކައުންސިލުތަކުން އެކަމުގައި އަމަލުކުރަން ބޭނުންވާ ގޮތުގެ ޙިޔާލު ހޯދަމުންދާ ކަމަށެވެ. އަދި އިތުރު މަޝްވަރާތަކަކަށްފަހު ވަރަށް އަވަހަށް އުސޫލު އެކުލަވާލެވޭނެކަމަށް މަބްރޫކު ވިދާޅުވިއެވެ.
މަބްރޫކު އެހެން ވިދާޅުވެފައިވާއިރު، އޭޕްރީލް 15ގައި މާލެސިޓީ ލޮކްޑައުން ކުރުމާއި ގުޅިގެން ބޭސްފަރުވާއަށާއި، އަދިވެސް އެހެނިހެން ބޭނުންތަކަށް މާލެއަށް އައިސް ތިބި ގިނަ ބަޔަކު ވަނީ ރަށްރަށް ނުދެވި ތާށިވެފައެވެ. އެކަމުގެ ސަބަބުން އެމީހުންގެ އަތުން ގިނަ އަދަދަކަށް ލާރި ޚަރަދުވެ ތިބޭނެ ގޮތެއް ނެތުމުގެ ދަތިކަން ގިނަ ބަޔަކަށް ކޮށްފައިވާތީ އެކަމުގެ ޝަކުވާތައް ވަނީ ވަރަށް ބޮޑުވެފައެވެ. އަދި ބައެއް މީހުން ޙާލުގައި ޖެހުމާއި ގުޅިގެން ޖެންޑަރ މިނިސްޓްރީން ވަނީ އެމީހުންނަށް ވަގުތީ ހިޔާވަހިކަންވެސް ފޯރުކޮށްދީފައެވެ.
އޭގެ އިތުރުން، ބައެއް ރަށްރަށުގެ ކައުންސިލުތަކުން މާލޭގައި ތާށިވެފައި ތިބި މީހުން ރަށަށް އެރުވުމަށް ދެކޮޅުހަދަމުންދާ މައްސަލަތަކެއްވެސް ފާއިތުވި ދުވަސްތަކުގައި ފެންމަތިވެފައިވެއެވެ.
މާލެ ސިޓީ ފުރަބަންދުކުރުމާއި ގުޅިގެން މާލޭގައި ތާށިވެފައި ތިބި އެހެނިހެން ރަށްރަށުގެ މީހުން ރަށަށް ދެވޭނެ އިންތިޒާމުތައް ހަމަޖެއްސުމާ ގުޅޭ ގޮތުން ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙުވެސް ވަނީ ޓާސްކްފޯހުގެ މެމްބަރުންނާ މަޝްވަރާ ކުރައްވާފައެވެ.
