ކޮވިޑް19 އާއި ގުޅިގެން ހިންގޭ ޕްރޮކިއުމަންޓުތަކުގައި ކޮރަޕްޝަންގެ ހިރާސް ކުޑަކުރުމަށް އަމަލުކުރާނެ ޚާއްސަ އުސޫލެއް ފިނޭންސް މިނިސްޓްރީން ކަނޑައަޅައިފިއެވެ.

ފިނޭންސް މިނިސްޓްރީން ދައުލަތުގެ މުއައްސަސާތަކަށް ފޮނުވި ސާކިއުލަރގައި ބުނީ ދައުލަތުން ޚަރަދުކުރަން ޖެހޭ ކަންކަން ނިންމުމުގެ ބާރާއި، މުޠުލަޤު ބާރުތައް އެކަކުގެއަތުގައި ނުބޭއްވުމާއި، މަސައްކަތްތަކާ ގުޅޭ އެކި ޒިންމާތައް ވަކިކުރެވި އެކި ފަރާތްތަކާ ހަވާލުކުރެވިފައި ހުންނަންޖެހޭ ކަމަށެވެ.

ސާކިއުލަރގައި ބުނީ ކޮވިޑް-19 އާ ގުޅިގެން ނިންމާ ނިންމުންތަކާ ގުޅޭ ތަފުސީލުތައް ލިޔެ ކިޔުމުން ފެންނަން އޮންނަން ޖެހޭ ކަމަށެވެ. އެގޮތުން އެފަދަ ނިންމުންތައް ނިންމާ ސަބަބުތަކާއި، ނިންމުން ނިންމާ ފަރާތްތަކާއި، ނިންމުމާ ގުޅުންހުރި މުހިންމު އިތުރު ކަންކަން ހިމަނަންޖެހޭ ކަމަށް ބުނެފައިވެއެވެ. އަދި، މިފަދަ ލިޔެކިޔުން އެކަށީގެންވާ ފެންވަރެއްގައި، ހާލަތު ނިމުމަށްފަހު ވެސް، އިދާރާތަކުން ބަލަން ބޭނުންވެއްޖެނަމަ ބެލޭނެ ފަދަ ގޮތަކަށް ރައްކާތެރިކުރަމުން ގެންދަންޖެހޭނެކަމަށްވެސް ފިނޭންސްގެ މިސާކިއުލަރގައި ބުނެފައިވެއެވެ.

ސާކިއުލަރގައި ބުނީ ކޮވިޑް-19 އާ ގުޅޭގޮތުން ކުރަމުންގެންދާ ޚަރަދުތަކުގެ ތަފުސީލު، މިނިސްޓްރީއަށް ރިޕޯޓުކުރަން ޖެހޭ ކަމަށެވެ. އަދި ގަވާއިދުން ރިޕޯޓު ކުރެވެމުންދާކަން އެއިދާރާއެއްގެ ފައިނޭންސް އެކްޒެކެޓިވް ކަށަވަރުކުރަން ޖެހޭ ކަމަށެވެ.

މީގެ އިތުރުން ފިނޭންސް މިނިސްޓްރީން ސާކިއުލަރގައި ބުނީ ދައުލަތުގެ މާލިއްޔަތުގެ ގަވާއިދުގައި ކަނޑައަޅާފައިވާ އިމަޖެންސީ ޕްރޮކިއުމަންޓުގެ ހާލަތްތަކުގެ ދަށުން ޕްރޮކިއުކުރާއިރު، އެކަންކަން ކުރެވެނީ ކަނޑައަޅާފައިވާ އެންމެހައި އުސޫލުތައް ފުރިހަމައަށް ތަންފީޒު ކޮށްގެންކަން ކަށަވަރުކުރަން ޖެހޭ ކަމަށެވެ. އެގޮތުން އިމަޖެންސީކޮށް ހަދަންޖެހޭ އެއްބަސްވުންތައް ހަދާ ހާލަތްތަކުގައި ވެސް، އެފަދަ އެއްބަސްވުންތަކުގައި ހުންނަންޖެހޭނެ ކަމަށް ދައުލަތުގެ މާލިއްޔަތުގެ ގަވާއިދުގެ 10.52 ވަނަ މާއްދާގައި ބަޔާންކޮށްފައިވާ އެންމެ އަސާސީ މިންގަނޑުތައް އެ އެއްބަސްވުންތަކުގައި ހިމެނުމާއެކު، ކުރާ މަސައްކަތެއްގެ މަގުސަދު ހާސިލުކުރެވޭނެ ފަދަބަޔަކު މަސައްކަތް ހަވާލުކުރުމާއި، ރައްޔިތުންނަށާއި ދައުލަތުގެ މާލިއްޔަތަށް އެންމެ މަންފާ ބޮޑު ގޮތެއްގައި އެފަދަ މަސައްކަތްތައް ކުރުމަށް ސާކިއުލަރގައިވެއެވެ.

އެކި މަސައްކަތްތަކުގައި ޒިންމާވާ ފަރާތްތައް ސާފުކޮށް ކަނޑައެޅި ލިޔެވިފައި ހުރުމާއި، އެކި ނިންމުންތައް ނިންމާއިރު، އެނިންމުމެއް ނިންމުނު ސަބަބު ރެކޯޑުކުރެވި ލިޔުމުން ފެންނަން ހުންނަންޖެހޭ ކަމަށް ސާކިއުލާގައި ބުނެފައިވެއެވެ. އަދި މަސައްކަތް ޙަވާލުކުރެވޭ ކުންފުނިތަކާއި ފަރާތްތަކަކީ، އެ ފަރާތުގެ އަސްލީ މަސައްކަތުގެ އިޚްތިސާސްގައި އެފަދަ މަސައްކަތް ހިމެނޭ ފަރާތެއްކަން ޔަގީންކުރުމާއި، އަދި އެފަރާތަކީ، އެ ހަވާލުކުރެވޭ މަސައްކަތް ފަންނީ ނުވަތަ މާލީ ގޮތުން ކުރުމުގެ ގާބިލްކަން ލިބިގެންވާ ފަރާތެއްކަން ވެސް ޔަގީން ކުރަންޖެހޭ ކަމަށް ބުނެފައިވެއެވެ. މަސައްކަތް ކުރަމުންގެންދާއިރު، މަސައްކަތް ކުރިއަށްދާވަރު ބަލައި ރަނގަޅަށް ސުޕަވައިޒް ކުރަންޖެހޭ ކަމަށް ސާކިއުލަރގައި ބުނެފައިވެއެވެ.

ސާކިއުލަރގައި ބުނީ ކާރިސާގެ ޙާލަތުގައި ދައުލަތަށް ހޯދާ ޚިދުމަތާއި ތަކެތި ދައުލަތަށް ހޯދަނީ، ރައްޔިތުންގެ ފުރާނައާއި، ސަލާމަތާއި ރައްކާތެރިކަން ޔަގީންކުރުމުގައި، އާންމު މަސްލަހަތު އިސްކުރެވި، ކާރިސާގެ ވަގުތަށް ބަލާފައި އެކަށީގެންވާ އަގެއްގައިކަން ކަށަވަރުކުރަންޖެހޭ ކަމަށެވެ.

ކުއްލި ޙާލަތުގައި ކުރެވޭ ޕްރޮކިއުމަންޓުގައި ދައުލަތުގެ މާލިއްޔަތުގެ ގަވާއިދާ އެއްގޮތްވާ ގޮތުގެ މަތީން ޢަމަލުކުރުމުގެގޮތުން ކޮންޓްރެކްޓެއް ޙަވާލުކުރުމުގެ ކުރިން އެކަމަށް ހުއްދަ ހޯދަންޖެހޭ ފަރާތެއްގެ ހުއްދަ ހޯދުމާއި، ލިބެން އޮތް އެންމެ ބޮޑު ވާދަވެރިކަމެއް ހޯދުމާއި، ހޯދަން ބޭނުންވާ އެއްޗެއްގެ އަދަދު ނުވަތަ ކުރަންބޭނުންވާ މަސައްކަތް އެވަގުތަކު ދިމާވެފައިވާ ކުއްލި ޙާލަތުގައި ކޮންމެހެން ބޭނުންވާ މިންވަރަށް ވުރެ އިތުރުނުކުރުމަށް ވެސް ބުނެފައިވެއެވެ. ބީލަމެއް ހަވާލުކުރުމަށްފަހު، މާލިއްޔަތު ގަވާއިދުގެ 10.53 ވަނަ މާއްދާއާއި އެއްގޮތްވާގޮތުގެ މަތިން އެ އިދާރާއެއްގެ ވެބްސައިޓުގައި އެކަން ޝާއިއު ކުރުމަށް މިނިސްޓްރީގެ މިސާކިއުލަރގައި ބުނެފައިވެއެވެ.