ބިދޭސީންނަށް އެހީވާން ހުޅުވި ފަންޑަށް ލައްކައަކަށް ވުރެ ގިނަ ރުފިޔާ
3 މެއި 2020 | އާދީއްތަ 10:21ވެބް ސައިޓް މެދުވެރިކޮށް ފައިސާ ހަދިޔާ ކުރެވޭނެ
އާދިއްތަ ދުވަހު މޯލްޑިވިއަން ރެޑް ކްރެސެންޓުން ބޭއްވި ނޫސްވެރިންގެ ބައްދަލުވުމުގެ ތެރެއިން
ކޮވިޑް-19 އާ ގުޅިގެން ހާލުގައި ޖެހިފައިވާ ބިދޭސީންނަށް އެހީތެރިކަން ފޯރުކޮށް ދިނުމަށްމޯލްޑިވިއަންރެޑް ކްރެސެންޓު(އެމްއާރްސީ) ފަންޑެއް ހުޅުވައިފިއެވެ.
އާދިއްތަ ދުވަހު ނެޝަަނަލް އިމަރޖެންސީ އޮޕަރޭޝަން ސެންޓަރ ގައި ބޭއްވި ނޫސްވެރިންގެ ބައްދަލުވުމުގައި އެ ޖަމިއްޔާގެ ރައީސް އަލީ ނާޝިދު ވިދާޅުވީ، ކޮވިޑް-19 އާ ގުޅިގެން އިގްތިސާދީ އަދި އިޖްތިމާއި ހީނަރުކަމުގެ ސަބަބުން ހާލުގައި ޖެހިފައިވާ ބިދޭސީންނަށް އެހީތެރިކަން ފޯރުކޮށް ދިނުމުގެ ގޮތުން ''ކޮވިޑް-19 މައިގްރެންޓު ރިލީފް ފަންޑު'' ގެ ނަމުގައި ފަންޑެއް މޭ މަހުގެ އެއްވަން ދުވަހު ހުޅުވާފައިވާ ކަމަށެވެ. ނާޝިދު ވިދާޅުވީ، މިހާތަނަށް އެ ފަންޑަށް އެއް ލައްކަ އަށް ވުރެ ގިނަ ރުފިޔާ ލިބިފައިވާ ކަމަށެވެ.
ފަންޑަށް ފައިސާ ހަދިޔާ ކުރެެވޭނީ ދިވެހި ރެޑް ކްރެސެންޓުގެވެބްސައިޓްމެދުވެރިކޮށެވެ. ވެބްސައިޓްގައިވާ ބޭންކު އެކައުންޓްތައް މެދުވެރިކޮށްވެސް ފައިސާ ހަދިޔާ ކުރެވޭނެ އިންތިޒާމް ވަނީ ހަމަޖައްސާފައެވެ. އެމްއާރްސީން ބުނީ، ފަންޑަށް ޖަމާވާ ފައިސާގެ އަދަދު ހާމަކުރަމުންދާނެ ކަމަށެވެ.
ނާޝިދު ވިދާޅުވީ، ބިދޭސީންނަށް އެހީތެރިކަން ފޯރުކޮށް ދިނުމަށްކުރާ ކަންތައްތަކުގެ ތެރެއިން، އެ ފަރާތްތަކަށް ކާނާ ފޯރުކޮށް ދިނުމާއި، ކައްކާ ކެއުމުގެ އިންތިޒާމް ހަމަޖެހިފައިވާ ތަންތަނުގައި ދިރިއުޅޭ ބިދޭސީންނަށް ކާޑުގެ އިތުރުން ޒަރޫރީ ބޭނުންވާ ތަކެތި ފޯރުކޮށް ދިނުން ހިމެނޭ ކަމަށެވެ.
އެމްއާރްސީން ބުނީ، ކަރަންޓީނުގެ އިތުރުން އައިސޮލޭޝަން ގައި ތިބި ބިދޭސީންނަށް ހައިޖީނިިކް ކިޓް ފޯރުކޮށް ދިނުމުގެ މަސައްކަތްވެސް ކުރަމުންދާ ކަމަށެވެ.
ކޮވިޑް-19 އާ ގުޅިގެން ތޮއްޖެހިން ދިރިއުޅޭ ބިދޭސީން އެހެންތަނަކަށް ބަދަލު ކުރުމުގެ މަސައްކަތް ސަރުކާރުން ވަނީ ފަށާފައެވެ. އެގޮތުން ބައެއް ބިދޭސީންތައް ވަނީ މިހާރު ގުޅީފަޅަށް ބަދަލުކޮށްފައެވެ. އަދި ކުރިޔަށް އޮތް ދުވަސްތަކުގައި އިތުރު ބިދޭސީންތަކެއް އެހެން ދިމަދިމާލަށް ބަދަލު ކުރުމުގެ މަސައްކަތް ދަނީ ކުރަމުންނެވެ.
