ރާއްޖެޓީވީގެ އަބުރު ފަންޑަށް އެމްޑީޕީގެ ލީޑަރޝިފުން އެހީދެއްވައިފި
ބޮޑެތި އަދަދުތަކުން ރާއްޖެޓީވީ ޖުރިމަނާ ކުރަމުންދަނީ މިނިވަން މީޑިއާ ނައްތާލުމަށް: ރާއްޖެޓީވީ
އަބުރު ފަންޑަށް އެމްޑީޕީން އެހީތެރިވުން
ރާއްޖޭގެ އެކި މުއައްސަސާތަކުން ރާއްޖެޓީވީ އާއި ރާއްޖެޓީވީގެ ނޫސްވެރިން ބޮޑެތި އަދަދުތަކުން ޖޫރިމަނާކުރަމުން ދާތީ އެ ފައިސާ ދެއްކުމަށްޓަކައި ހުޅުވާފައިވާ "އަބުރު ފަންޑަށް" އެމްޑީޕީގެ ލީޑަރޝިޕްގައި ހިމެނިވަޑައިގަންނަވާ ބޭފުޅުން އެހީތެރިކަން ފޯރުކޮށްދެއްވައިފިއެވެ.
ހުކުރު ދުވަހު މެންދުރު ފަހު ރާއްޖެޓީވީގައި ބެހެއްޓި މި ފަންޑު ހުޅުވުމާ އެކު ގިނަ އަދަދެއްގެ ބަޔަކު އަންނަނީ ފަންޑަށް ފައިސާ ހަދިޔާކުރަމުންނެވެ.
އެގޮތުން އަންގާރަ ދުވަހު ހަވީރު އެމްޑީޕީގެ ޗެއަރޕާސަން ހަސަން ލަތީފް އާއި އެމްޑީޕީގެ ޗެއަރޕާރސަންގެ ނައިބް އަލީ ނިޔާޒްއާއި އެޕާޓީގެ ލީޑަރޝިޕްގެ އިސްވެރިން ރާއްޖެޓީވީއަށް ވަޑައިގެން ފަންޑަށް އެހީ ދެއްވާފައެވެ.
ރާއްޖެޓީވީއާއި ވާހަކަދައްކަވަމުން ހަސަން ލަތީފް ވިދާޅުވީ މިއީ އެމްޑީޕީގެ ގައުމީ މަޖިލީހުގެ އިސްނެންގެވުމުގެ މަތިން ލީޑަރޝިޕްގައި ހިމެނިވަޑައިގަންނަވާ މެމްބަރުންގެ އަމިއްލަ ހައިސިއްޔަތުން ދެއްވި އެހީއެއް ކަމަށެވެ.
ރާއްޖެޓީވީގެ މެނޭޖްމެންޓުން މިފަދަ ފަންޑެއް ބެހެއްޓުމަށް ނިންމީ އަބުރުގެ ގާނޫނުގެ ދަށުން ރާއްޖެޓީވީ 200،000ރ. އިން ޖޫރިނަމާކޮށް، އަދި ރާއްޖެޓީވީގެ ކުރީގެ ނޫސްވެރިޔަކު 50،000ރ. އިން އަންގާރަ ދުވަހު ޖޫރިމަނާ ކުރުމާ ގުޅިގެންނެވެ. އަދި ފުލުހުންގެ ވާޖިބަށް ހުރަސްއެޅިކަން ސާބިތުކޮށް، ރާއްޖެޓީވީގެ ނޫސްވެރިޔާ ލީވާން އަލީ ނާސިރު އާއި މުހައްމަދު ވިސާމް، ކޮންމެ މީހަކު 28،800ރ. އިން ޖޫރިމަނާކޮށްފައި ވާތީ އެވެ.
މީގެ އިތުރުން ރާއްޖެޓީވީގެ ކެމެރާމަން އާދަމް ޒަރީރުގެ މައްޗަށް ކްރިމިނަލް ކޯޓުގައި ކުރި ޝަރީއަތަށް ފަހު ވެސް ވަނީ 3،000 ރުފިޔާއިން ޖޫރިމަނާކޮށްފަ އެވެ.
މިފަންޑަށް އެހީތެރިވުމުގެ ގޮތުން ރާއްޖޭގެ އެކި ކަންކޮޅުތަކުގައި ދަނީ ފަންޑު ފޮށި ބަހައްޓައިގެން އެހީތެރިކަން ފޯރުކޮށްދެމުންނެއެވެ.
