ދައުލަތުގެ އިދާރާތަކުގެ ހާމަކަން މިހާރަށް ވުރެ ބޮޑުވާންޖެހޭ: ފިޔާޒް
ރައްޔިތުންނަށް މަޢުލޫމާތު ލިބޭނެ ގޮތްތައް ފަސޭހަކުރަންޖެހޭ: ފިޔާޒް
\" މާއްދާ 29، މިވެސް ހައްގެއް \" ކެމްޕެއިންގައި އިންފޮމޭޝަން ކޮމިޝަނަރ ހުސެއިން ފިޔާޒް މޫސާ ވާލަހަދައްކަވަނީ
ދައުލަތުގެ އިދާރާތަކުގެ ހާމަކަން މިހާރަށް ވުރެ ބޮޑުވާންޖެހޭ ކަމަށް އިންފޮމޭޝަން ކޮމިޝަނަރ ހުސެއިން ފިޔާޒް މޫސާ ވިދާޅުވެއްޖެއެވެ.
ނޫސްވެރިކަމުގެ މިނިވަންކަމުގެ ދުވަހުގެ މުނާސަބުތުގައި އިންފޮމޭޝަން ކޮމިޝަނަރުގެ އޮފީހުން ނެރުނު ބަޔާނުގައި ވަނީ ރައްޔިތުންނަށް މަޢުލޫމާތު ލިބޭނެ ގޮތްތައް ފަސޭހަކުރަންޖެހޭ ކަމަށެވެ. އަދި ދައުލަތުގެ އިދާރާތަކުގެ ހާމަކަން މިހާރަށް ވުރެ ވެސް ބޮޑުވާންޖެހޭކަމަށެވެ. ނޫސްވެރިން ބިނާކުރަންޖެހޭ ކަން ފާހަގަކުރައްވާ ފިޔާޒް ވިދާޅުވީ އިތުރު ތަމްރީނުތައް ދޭންޖެހޭ ކަމަށެވެ.
ނޫސްވެރިކަމުގެ މިނިވަންކަމާއި، ޚިޔާލުފާޅުކުރުމުގެ މިނިވަންކަމާއި، މަޢުލޫމާތު ހޯދައިލިބިގަތުމުގެ ޙައްޤަކީ ގުޅިލާމެހިފައިވާ ޙައްޤުތަކެއްގެ ގޮތުގައި ސިފަކުރައްވާ ފިޔާޒް ވިދާޅުވީ ދައުލަތުގެ މަޢުލޫމާތުގެ ޙަޤީޤީ މިލްކުވެރިންނަކީ ރައްޔިތުންކަމަށެވެ.
އެހެންކަމުން، މަޢުލޫމާތު ހޯދައިލިބިގަތުމުގެ ޙައްޤުގެ ބޭނުން ނޫސްވެރިންނާއި ރައްޔިތުން މިހާރަށް ވުރެ ބޮޑަށް ހިފުމަށް ވަނީ ގޮވާލައްވާފައެވެ. ފިޔާޒް ވިދާޅުވީ ސުވާލުކުރުމާއި މަޢުލޫމާތު ހޯދަން އެދުމަކީ އާދައަކަށް ހަދައިފިނަމަ ދައުލަތެއްގެ ގޮތުގައި ލިބޭނެ އުފާވެރިކަން މާ ބޮޑު ކަމަށެވެ. އަދި ކޮންމެ ފަރުދަކުވެސް ދޮގު މަޢުލޫމާތު ހުއްޓުވުމަށް މަސައްކަތްކުރުން މުހިއްމު ކަމަށެވެ.
ދިވެހިރާއްޖެ އާއި މުޅި ދުނިޔެއަށް ކުރިމަތިވެފައިވާ ކޮވިޑް-19 އަށް އަލިއަޅުއްވާލައްވާ ފިޔާޒް ވަނީ މި ބިރުވެރި ޙާލަތުގައި ވެސް، ނޫސްވެރިން ގޭގައި ތިބެގެންނާއި، ޢާއިލާއާ ދުރުގައި އޮފީހުގައި ބަންދުވެ ތިބެގެން އަދި ކަން ހިނގަމުންދާގޮތާއި މަންޒަރުތައް ގެނެސްދިނުމަށްޓަކައި ބިރެއް ނެތި ހިތްވަރާއެކު ބޭރަށް ނުކުމެ ކުރަމުން އަންނަ ބުރަ މަސައްކަތަށް ޝުކުރުއަދާކުރައްވާފައެވެ.
ކޮވިޑް-19 އިން، ނޫސްވެރިކަމަށް ކުރިމަތިވެފައިވާ ހާސްކަމާއި ނުތަނަވަސްކަން ފާހަގަަކުރައްވާ ފިޔާޒް ވިދާޅުވީ މިދަނޑިވަޅުގައި މީޑިއާތަކަށް ޚާއްޞަ ލޯނެއް ސަރުކާރުން ތަޢާރަފުކުރުމަކީ، ޙާލަތުގެ ސަބަބުން ލިބޭ ގެއްލުން ކުޑަވެގެންދާނެ ކަމެއް ކަމަށް ފެނިވަޑައިގަންނަވާކަމަށެވެ.
