މާލެއިން ރަށަށް ދާން ބޭނުންވާ 80 މީހަކަށް ދަތުރު ހަމަޖައްސައިދީފި
ރިސޯޓުތަކުގައި އެބަތިބި 1،000 އެއްހާ މީހުން، ރަށަށް ދާން ބޭނުންވޭ
ޓޫރިޒަމް މިނިސްޓަރ އަލީ ވަހީދު އެންއޯއީސީ ޕްރެސްއެއްގައި ވާހަކަފުޅު ދައްކަވަނީ
ކޮވިޑް-19 ރޯގާ މާލޭ ޞަރަޙައްދުގައި ފެތުރެންފެށުމާއެކު މާލެ ޞަރަޙައްދު ފުރަބަންދު ކުރުމާގުޅިގެން ރަށަށް ނުދެވި މާލޭގައި ތާށިވެފައި ތިބި 80 މީހަކަށް ރަށަށް ދެވޭނެ އިންތިޒާމު ހަމަޖައްސަވާފައިވާ ކަމަށް ޓޫރިޒަމް މިނިސްޓަރ ޢަލީ ވަހީދު ވިދާޅުވެއްޖެ އެވެ.
ދައުލަތުގެ މީޑިއާ ޕީއެސްއެމް ނިއުސްގެ ކޮވިޑް-19 ކޮވަރޭޖްގައި ވާހަކަފުޅު ދައްކަވަމުން މިނިސްޓަރު ޢަލީ ވަހީދު ވިދާޅުވީ ރަށަށް ނުދެވު މާލޭގައި ތިބި ފަރާތްތައް ރަށަށް ފޮނުވުމުގެ މަސައްކަތް މިހާރު ފަށާފައިވާ ކަމަށެވެ. އެގޮތުން، ލިސްޓުގައި ތިބި 80 މީހަކު ރަށްރަށަށް ފޮނުވުމުގެ އިންތިޒާމުތައް ހަމަޖެހިފައިވާ ކަމަށާއި، ޓޫރިޒަމް މިނިސްޓްރީގައި ރަށަށް ދާން ބޭނުންވެގެން ރަޖިސްޓަރީ ކުރި މީހުންގެ ލިސްޓު ޖެންޑަރ މިނިސްޓްރީއަށް ފޮނުވާ ދަތުރުފަތުރުގެ ކަންކަން ހަމަޖައްސަމުންދާކަމަށް މިނިސްޓަރު ޢަލީ ވަހީދު ވިދާޅުވިއެވެ.
ޢަލީ ވަހީދު ވިދާޅުވީ، މިދަތުރުތައް ހަމަޖައްސާނީ ސިފައިންނާއި، ނޭޝަނަލް އިމަރމަޖެންސީ އޮޕަރޭޝަން ސެންޓަރު ގުޅިގެން ކަމަށެވެ. އަދި ކުރިއަށް އޮތްތަނުގައި އިތުރު މީހުންނަށް ރަށްރަށަށް އަނބުރާ ދެވޭނެ އިންތިޒާމު ހަމަޖައްސަވަމުން ގެންދަވާނެކަމަށްވެސް މިނިސްޓަރު ވިދާޅުވިއެވެ.
ޢަލީ ވަހީދު ވިދާޅުވީ ރިސޯޓުތަކުގައި ތިބި މީހުންނަށް އެމީހުންގެ ރަށްރަށަށް ދެވޭނެ ޚާއްޞަ އިންތިޒާމުތަކެއް ހަމަޖެއްސުމަށް މަސައްކަތް ކުރަމުންދާ ކަމަށެވެ. ޕްލައިޓް ދަތުރުތައް ހުއްޓާލުމާއި ގުޅިގެން ރިސޯޓުތަކުގައި ގިނަ ޢަދަދެއްގެ މުއައްޒަފުންވަނީ ތާށިވެފައެވެ.
ޢަލީ ވަހީދު ވިދާޅުވީ، 1،000 އެއްހާ މީހުން ރިސޯޓުތަކުގައި ވެސް ރަށަށްދާން ބޭނުންވެގެން އެދިފައިވާ ކަމަށެވެ. އެގޮތުން އެފަރާތްތަކަށް ގޮތެއް ހަމަޖެއްސުމަށް ރިސޯޓުތަކުގެ މެނޭޖްމަންޓާއި، އައިލެންޑް އޭވިއޭޝަނާއެކު މަޝްވަރާ ކުރެވެމުންދާ ކަމަށެވެ. ރިސޯޓުތަކުގައި ތިބި ފަރާތްތައް މާލެއަށް ގެނައުމުގެ ބަދަލުގައި ސީދާ ހުޅުލެއަށް ގޮސް، ރަށްރަށަށް ދެވޭނެ ގޮތަށް ދަތުރުތައް ހަމަޖެއްސުމުގެ މަސައްކަތް ކުރަމުންދާކަމަށް ވެސް މިނިސްޓަރު ވިދާޅުވި އެވެ.
ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ވަނީ ރަށްރަށަށް އަނބުރާ ދާން ބޭނުންވާ މީހުން ރަށްރަށަށް ގެންދިއުމާއި، ރަށްރަށަށް ދާ މީހުން ޢަމަލު ކުރަންޖެހޭނެ އުޞޫލު ކަނޑައަޅާފަ އެވެ. އަދި މާލެއިން އަނބުރާ ރަށަށްދާ މީހުން، ރަށަށް ދިއުމަށް ފަހު 14 ދުވަހުގެ އައިސޮލޭޝަން ފުރިހަމަ ކުރަންޖެހޭ ގޮތަށް ވެސް އެޗްޕީއޭއިން ވަނީ ކަނޑައަޅާފައެވެ.
