ޔޫއޭއިން ކޮވިޑް-19އަށް ބޭނުންކުރާ ސްޓެމް-ސެލް ފަރުވާއިން ވައިރަސް މަރައެއް ނުލެވޭ

ޔުނައިޓެޑް އެރަބް އެމިރޭޓްސް (ޔޫއޭއީ)އިން ކޮވިޑް-19 އަށް ބޭނުންކުރާ ސްޓެމް-ސެލްގެ ފަރުވާއިން ވައިރަސް މަރާ ނުލާ ކަމަށް މީޑިއާ ރިޕޯޓުތައް ބުނެފިއެވެ.

މީޑިއާތަކުގައި ރިޕޯޓުކޮށްފައިވާ ގޮތުގައި ޔޫއޭއީއިން ކޮވިޑް-19 އަށް ބޭނުންކުރާ ސްޓެމް-ސެލް ފަރުވާއިން ވައިރަސް މަރާ ނުލެވޭ ކަމަށާއި، އެ ފަރުވާ ބޭނުންކުރަނީ ބަލީގެ އަލާމާތްތަކަށް ލުއި ދިނުމަށެވެ.

ޝައިޚް ޚަލީފާ މެޑިކަލް ސިޓީގެ ހީމަޓޮލޮޖީ އަދި އޮންކޮލޮޖީގެ އިސްވެރިޔާ ފާޠިމާ އަލް-ކާބީއާ ޙަވާލާދީ ބުނެފައިވަނީ ސްޓެމް ސެލް ފަރުވާދިނުމުން ބަލި މީހާގެ ޢަލާމާތްތައް ފަސޭހަވެ، ބަލިން ފަސޭހަވާ ކަމަށެވެ. ސްޓެމް-ސެލްގެ ފަރުވާއިން ވައިރަސް މަރާނުލެވޭކަމަށް މީޑިއާތަކުން ރިޕޯޓުކޮށްފައިމިވަނީ ކޮވިޑް-19 އަށް ފަރުވާއެއް ހޯދިއްޖެ ކަމަށް އެ ޤައުމުން އިޢުލާނުކޮށްފައިވަނިކޮށެވެ.

ހުކުރު ދުވަހު އެޤައުމުން އިޢުލާނުކުރީ، އަބޫ ދާބީ ސްޓެމް ސެލް ސެންޓަރުން ފުއްޕާމޭގެ ސެލްތައް އަލުން ދިރުވާ، އިންސާނާގެ ދިފާޢީ ނިޒާމަށް ބުރަ ކުޑަ ވާނެ ފަދަ ފަރުވާއެއް ހޯދިފައިވާކަމަށެވެ. މި ފަރުވާ ދޭ ގޮތާ ބެހޭ ގޮތުން އިތުރަށް ބުނެފައިވަނީ، ބަލިމީހާގެ ލެއިން ސްޓެމްސެލް ވަކި ކުރުމަށް ފަހު، ނޭވާލާ ނިޒާމުގެ ތެރެއިން އަލުން އެ ސްޓެމްސެލްތައް ފުއްޕާމެއަށް ފޯރުކޮށްދެނީ ކަމަށެވެ.

އެޤައުމުގެ މިނިސްޓްރީ އޮފް ފޮރިން އެފެއަރޒް ގެ ޑިރެކްޓަރ އޮފް ސްޓްރެޓީޖިކް ކޮމިއުނިކޭޝަންސް ހިންދު އަލް އުޘައިބާ ވިދާޅުވިގޮތުގައި ކޮވިޑް-19 ޖެހިފައިވާ 73 މީހުންނަށް ކާމިޔާބުކަމާއެކު ފަރުވާދީ އެމީހުން ބަލިން ގަދަވީއިރު، ފަރުވާގެ އެއްވެސް "ސައިޑް އިފެކްޓެއް" ނުފެނެއެވެ.

ފަރުވާ ދިން މީހުންގެ ތެރޭގައި ހިމެނެނީ ބަލީގެ އަސަރު މެދުމިންވަރަކަށް ކޮށްފައިވާ މީހުންނާއި ވަރަށް ބޮޑަށް ބަލީގެ އަސަރު ކޮށްފައިވާ މީހުންނެވެ. ބަލިން ގަދަވި މީހުންގެ ތެރޭގައި އިންޓެންސިވް ކެއަރ ޔުނިޓުގައި ފަރުވާ ދެމުން ދިޔަ މީހުންވެސް ހިމެނެއެވެ.

ފަރުވާގެ ކާމިޔާބު ކަން ދެނެގަތުމަށް އެޤައުމުގެ ސައިންސްވެރިން އަންނަނީ އިތުރު ދިރާސާތައް ކުރަމުންނެވެ.