އެންމެ ފަހުން ރިއްދިމާއަށް މަންމަ ކައިރިއަށް މުމްބާއީއަށް ދެވިއްޖެ
3 މެއި 2020 | އާދީއްތަ 04:50މުމްބާއި ދެވިފައިވަނީ ހޮނިހިރު ދުވަހުގެ ރޭ
ރިޝީ ކަޕޫރު، ރިއްދިމާ ކަޕޫރު އަދި ނީތޫ ކަޕޫރު
މިދިޔަ ބުރާސްފަތި ދުވަހު މަރުވި ބޮލީވުޑް ފިލްމީތަރި ރިޝީ ކަޕޫރުގެ އަންހެން ދަރިފުޅު ރިއްދިމާ ކަޕޫރަށް އޭނާގެ ބައްޕަގެ ޖަނާޒާގައި ބައިވެރިވެ ނުވެވެއެވެ.
މުމްބާއީ ގައި ރިޝީގެ ޖަނާޒާ ކުރިއަށް ދިޔައިރު ރިއްދިމާ ހުރީ ނިއު ދިއްލީގައެވެ. އޭނާއަށް އެދުވަހު މުމްބާއީއަށް ނުދެވުނީ ކޮވިޑް-19 އާ ގުޅިގެން އިންޑިއާ ފުރަބަންދުކުރުމާއި ގުޅިގެން އެއްސިޓީން އަނެއް ސިޓީއަށް އަރާ ފޭބުން މަނާކޮށްފައިވާތީއެވެ.
އޭގެ އެއްދުވަސް ފަހުން ހުއްދަ ލިބުމާއެކު އޭނާ މިހާރު ވަނީ ދަރިފުޅު ސަމާރާ އާއެކު މަންމަ ނީތޫ ކަޕޫރާއި، ކޮއްކޮ ރަންބީރު ކަޕޫރުގެ ކައިރިއަށް މުމްބާއީ އަށް ހޮނިހިރު ދުވަހުގެ ރޭ ގޮސްފައެވެ. ޖަނާޒާގައި ބައިވެރި ނުވެވުމުން، ރިޝީގެ ޖަނާޒާ ކުރިއަށް ދިޔަ ވަގުތު ރަންބީރުގެ ލޯބިވެރިޔާ އާލިއާ ބަޓް ވަނީ ރިއްދިމާއަށް ފޭސްޓައިމް މެދުވެރިކޮށް ޖަނާގައި ބައިވެރި ކޮށްދީފައެވެ.
ރިޝީ މަރުވުމާއި ގުޅިގެން ރިއްދިމާ އޭނާގެ އިންސްޓަގްރާމްގައި ކޮށްފައިވާ ޕޯސްޓްގައި ބައްޕަ ދެކެ ވަރަށް ލޯބިވާކަމަށާއި ވަރަށް ހަނދާންވާނެ ކަމަށް ބުނެފައިވެއެވެ. އަދި އެންމެ ފަހުވަގުތު ކައިރީގައި ހުރެވޭނެ ނަމައޭ ހިތަށް އަރާކަމަށާއި، ބައްޕަގެ ފޭސްޓައިމް ކޯލްސް މަތިން ވަރަށް ހަނދާން ވާނެ ކަމަށްވެސް އޭނާ ބުނެފައިވެއެވެ.
2018 ވަނަ އަހަރުން ފެށިގެން ރިޝީ ވަނީ ނިއުޔޯކްގައި ކެންސަރަށް ފަރުވާ ހޯދާފައެވެ. އަދި އޭނާ އެނބުރި މުމްބާއީ އަށް ގޮސްފައިވަނީ މިދިޔަ އަހަރުގެ ސެމްޓެންބަރު މަހުގެ ތެރޭގައިއެވެ.
އެނބުރި އިންޑިއާއަށް އައުމަށްފަހު ރިޝީ ވަނީ ޖޫހީ ޗައުލާ އާއި އެކު "ޝަރްމާޖީ ނަމްކީން" ކިޔާ ފިލްމެއްގެ ޝޫޓިން ވެސް ފަށާފައެވެ. ނަމަވެސް ރިޝީގެ ޞިއްޙީ ޙާލަތު ގޯސްވުމުން ފިލްމުގެ މަސައްކަތް ވަނީ ފަހުން މެދުކަނޑާލާފައެވެ.
