ޕީސީއަށް ފާޑުކިޔުމުން އެންމެ ފަހުން އޭނާގެ މަންމަ ރައްދު ދީފި

ދެފައި ހާމައަށް ފެންނަ ވަރުގެ ހެދުން ލައިގެން އިންޑިއާގެ ބޮޑުވަޒީރު ނަރެންދުރަ މޯދީއާ ބައްދަލު ކުރުމުން ޕްރިޔާންކާ ޗޮޕްޅާ (ޕީސީ) އަށް ފާޑުކިޔާފައި ވަނީ މިދިޔަ މެއި މަހުގެ ތެރޭގައެވެ.

އެއަށް އެއްވެސް ރައްދެއް ޕްރިޔަންކާ ވެސް އަދި އޭނާގެ އާއިލާގެ ފަރާތުން ވެސް މިހާތަނަށް ދީފައެއް ނުވެއެވެ.

އެހެން ނަމަވެސް ޕްރިޔަންކާގެ މަންމަ މަދޫ ޗޮޕްޅާ ވަނީ އެއާ ބެހޭ ގޮތުން ދާދި ފަހުން ވާހަކަ ދައްކާފައެވެ.

އެގޮތުން މޯދީއާ ބައްދަލުކުރަން އޭނާގެ ދަރިފުޅު ޕީސީ ދިޔައީ އޭނާ "ބޭވޮޗް" ގެ ޕްރޮމޯޝަންގައި ވަރަށް ބިޒީކޮށް އުޅުމުގެ ތެރޭގައި ކަމަށާއި އޭނާއަށް އޭރު ލައިގެން ހުރި ހެދުން ބަދަލުކުރަން ވަގުތެއް ނުވީ ކަމަށެވެ.

މޯދީ އާއި ޕްރިޔަންކާގެ ބައްދަލު ވުމަކީ ކުރިން ރޭވިގެން ކުރެވުނު ބައްދަލުވުމެއް ނޫން ކަމަށް ވެސް މަދޫ ބުންޏެވެ. މަދޫ ބުނެފައި ވަނީ ޕީސީއަށް ރަނގަޅާއި ނުބައި ވަރަށް ރަނގަޅަށް އޭނާ ދަސްކޮށްދީފައި ވާނެ ކަމަށެވެ.

އަދި ގޯސްކަމެއް ނުކުރެވޭ ހާ ހިނދެއްގައި އޭނާ ބިރުގަންނަން ނުޖެހޭނެ ކަމަށް ވަރަށް ރަނގަޅަށް ދަސްކޮށްދީފައިވާނެ ކަމަށް މަދޫ ބުންޏެވެ.

ނިވާކަން ކުޑަ ހެދުމެއް ލައިގެން މޯދީއާ ބައްދަލުކުރުމާ ގުޅިގެން އޭނާއަށް ސޯޝަލް މީޑިއާގައި ފާޑު ކިޔާފައި ވީނަމަވެސް އޭނާ އެއްވެސް ރައްދެއް ދީފައިނުވާއިރު، ހަމަ އެކަނި ކޮށްލާފައިވަނީ އޭނާގެ މަންމަ އާއި އޭނާއާ ދެމީހުން ފައި ފެންނަ ފޮޓޯއެކެވެ. އިންސްޓަރގްރާމަށް ލާފައިވާ އެ ފޮޓޯގައި ޕްރިޔަންކާ ކެޕްޝަންގައި ޖަހާފައިވަނީ"ލެގްސް ފޯ ޑޭސް"އެވެ.