ޑަބްލިއު ޑަބްލިއު އީ ރެސްލަރ އަދި ހޮލީވުޑް އެކްޓަރ ޖޯން ސީނާ ވަނީ ދާދި ފަހުން މަރުވި ބޮލީވިޑްގެ ދެ ތަރިން ކަމަށްވާ އިރްފާން ޚާން އާއި ރިޝީ ކަޕޫރުގެ ޕޮޓޯ އޭނާގެ އިންސްޓަގްރާމްގައި ހިއްސާކޮށްފައެވެ.
ޖޯންގެ އިންސްޓަގްރާމްގައި ހިއްސާކޮށްފައިވަނީ ރިޝީގެ ހިނިތުން ވެފައި ހުރި ފޮޓޯ އަކާއި އިރްފާން ޚާން ކުޅެފައިވާ ފިލްމް "ލައިފް އޮފް ޕައި" ގެ ޝޫޓިންގެ ތެރެއިން ނަގާފައިވާ އިރުފާންގެ ފޮޓޯއެކެވެ.
ޖޯންގެ މި ޓްރިބިއުޓްގައި އެއްވެސް ފޮޓޯއެއްގެ ކެޕްޝަންއެއް ލިޔެފައެއް ނުވެއެވެ. އެހެންކަމުން ޖޯން ގިނަ ފޭނުން ވަނީ ބޮލީވުޑް ފިލްމްތައް އޭނާ ބަލާނީ ކަމާއިމެދު ސުވާލު އުފެދިފައެވެ.
މީގެކުރިންވެސް ޖޯން ވަނީ ވަކިވަކި ސެލެބްރިޓީންގެ ފޮޓޯ އާއި މިމީސް އޭނާގެ އިންސްޓަގްރާމްގައި އެއްވެސް ކެޕްޝަންއެއް ނުޖަހާ ޕޯސްޓްކޮށްފައެވެ. އެ ފޮޓޯތައް ހިއްސާކުރުމުގެ ސިއްރަކީ ކޮބައިކަން ހޯދުމަށް ފޯލޯވަރުންނަށް ވަނީ ދޫކޮށްލާފައެެވެ.
އުމުރުން 53 އަހަރުގެ އިރުފާން މަރުވީ ކޮލޯން އިންފެކްޝަނަކާ ގުޅިގެން މުމްބާއީގެ މުމްބާއީ ކޮކީލާބެން ދިރުބާއީ އަމްބާނީ ހޮސްޕިޓަލްގައި ފަރުވާ ދެމުން ދަނިކޮށް މިދިޔަ ބުދަ ދުވަހުއެވެ. ޖެހިގެން އައި ދުވަހު އުރުން 67 އަހަރުގެ ރިޝީ ކަޕޫރުވެސް ވަނީ މުމްބާއީގެ އެޗްއެން ރިލަޔަންސް ހޮސްޕިޓަލްގައި ކެންސަރު ބައްޔަށް ފަރުވާ ދެމުން ދަނިކޮށް މަރުވެފައެވެ.
މި ދެތަރިންގެ މަރު ވެގެން ގޮސްފައިވަނީ މުޅި އިންޑިއާ ސިއްސިވާލި އަދި ބޮލީވުޑަށް ލިބިގެންދިޔަ ފުން ހިތާމައަކަށެވެ.
