މަސައްކަތްކުރަނީ ކޮންމެ ވަގުތެއްގަވެސް ކޮވިޑް-19 ވައިރަސްހުރި މީހަކު އައިސްދާނެ ކަމަށް ބަލައިގެން: އައިޖީއެމްއެޗް
އައިޖީއެމްއެޗްގެ ހުރިހާ މުވައްޒަފުން މަސައްކަތްކުރާނީ ރައްކާތެރި ފިޔަވަޅުތަކާއެކު
އައިޖީއެމްއެޗުން ވަނީ ކޮވިޑް-19 އާއި ގުޅިގެން ރައްކާތެރިކަމުގެ ފިޔަވަޅު އަޅާފައި
ސަރުކާރުގެ މައި ހޮސްޕިޓަލް ކަމަށްވާ އިންދިރާ ގާނދީ މެމޯރިއަލް ހޮސްޕިޓަލް(އައިޖީއެމްއެޗު)ގެ ހުރިހާ މުވައްޒަފުންވެސް މަސައްކަތް ކުރަމުންދަނީ، ކޮވިޑް-19 ވައިރަސްހުރި މީހަކު ކޮންމެ ވަގުތެއްގައިވެސް ހޮސްޕިޓަލަށް އައިސްދާނެ ކަމަށް ވިސްނައިގެން ކަމަށް އެ ހޮސްޕިޓަލިމް ބުނެފިއެވެ.
ނޭޝަނަލް އިމަރޖެންސީ އޮޕަރޭޝަން ސެންޓަރުގައި އައިޖީއެމްއެޗުން ބޭއްވި ނޫސްވެރިންގެ ބައްދަލުވުމުގައި ނޫސްވެރިޔަކު ކުރި ސުވާލަކަށް ޖަވާބު ދެއްވަމުން އައިޖީއެމްއެޗްގެ މެޑިކަލް ޑައިރެކްޓަރ، ޑރ. ޢަލީ ނަޒީމް ވިދާޅުވީ އައިޖީއެމްއެޗުގެ ހުރިހާ މުވައްޒަފުންގެ ވެސް މަސައްކަތް ކުރަމުންދާނީ، އެ ހޮސްޕިޓަަލަށް ކޮވިޑް-19 ރޯގާހުރި މީހަކު ކޮންމެ ވަގުތެއްގައި ވެސް އައިސްދާނެ ކަމަށް ވިސްނައިގެން، ރައްކާތެރިކަމުގެ ފިޔަވަޅުތައް އަޅައިގެން ކަމަށެވެ. އެގޮތުން ޕަރސަނަލް ޕްރޮޓެކްޓިވް އިކުއިޕްމަންޓް ބޭނުންކުރަމުންދާ ކަމަށްވެސް ޑރ. ނަޒީމް ވިދާޅުވިއެވެ.
ނަޒީމް ވިދާޅުވީ ނ. މަނަދޫ އުމުރުން 80 އަހަރުގެ މީހާ އައިޖީއެމްއެޗަށް އައީ ކޮވިޑް-19ގެ އަލާމާތެއް ހުރެގެން ފަރުވާ ހޯދަން ނޫންކަމަށާއި އޭނާ ފަރުވާ ހޯދަން އައީ ބަނޑުގައި ރިއްސާތީ ކަމަށެވެ. އެހެންވެސް ގައިންގަޔަށް އަރާ ނުރައްކާތެރި ބައްޔެއް ފެތުރެމުންދާ ދުވަސްވަރެއްކަމަށްވާތީ، ފަރުވާ ހޯދަން އަންނަ މީހުން އެފަދަ ބައްޔެއް ހުރިތޯ، ނުވަތަ މިހާރު ފެތުރެމުންދާ ކޮވިޑް-19 ރޯގާއަށް ޓެސްޓް ކުރުމަށް ސާމްޕަލް ނަގަމުންދާނެ ކަމަށެވެ. އެގޮތުން، އެހާ އުމުރުން ދުވަސްވީ މީހަކު އައިޖީއެމްއެޗަށް ފަރުވާ ހޯދަށް އައުމުން، އެ އުސޫލްގެ ދަށުން އޭނާގެ ސާމްޕަލް ނެގީކަމަށް ވެސް އައިޖީއެމްއެޗުން ބުނެއެވެ.
ނަޒީމް ވިދާޅުވީ، އޭނާއަށް ފަރުވާ ދިނުމަށްފަހު، ދޫކޮށްލިއިރު، އޭރު އަދި ކޮވިޑް-19 އަށް ނެގި ސާމްޕަލްގެ ޓެސްޓުގެ ނަތީޖާ ނުލިބޭ ކަމަށެވެ. އެ ސާމްޕަލްގެ ނަތީޖާ ލިބުނީ އޭނާއަށް ފަރުވާ ދިނުމަށްފަހު، ގެއަށް ފޮނުވާލިފަހުން ކަމަށްވާތީ، ދެން އައިޖީއެމްއެޗުން އެކަމުގައި ޢަމަލު ކުރަމުންދާ އުޞޫލުގެ ދަށުން ކަންކަން ކުރަމުންދާ ކަމަށްވެސް ނަޒީމް ވިދާޅުވިއެވެ.
ނަޒީމް ވިދާޅުވީ އައިޖީއެމްއެޗްގެ މުވައްޒަފުންގެ ރައްކާތެރިކަމަށް ވަރަށް ބޮޑަށް އިސްކަން ދެއްވާ ކަމަށެވެ.
