ކޮވިޑަށް ފަރުވާދެމުންދާ އެކަކުގެ ފުރަތަމަ ސާމްޕަލްގެ ނަތީޖާ ނެގެޓިވް
ފަރުވާދެނީ ހަ މީހަކަށް
ދަރުމަވަނަތް ހޮސްޕިޓަލްގެ 11 ވަނަ ފަންގިފިލާގައި މިހާރު 5 މީހަކަށް ދަނީ ފަރުވާދެމުން
ކޮވިޑް-19 ޖެހިގެން ދަރުމަވަންތަ ހޮސްޕިޓަލުގެ 11 ވަނަ ފަންގިފިލާގައި ފަރުވާދެމުން އަންނަ ބަލި މީހުންގެ ތެރެއިން އެކަކުގެ ފުރަތަމަ ސާމްޕަލްގެ ނަތީޖާ ނެގެޓިވްވެ، އެމީހާ ޑީއެޗް-17 އަށް ބަދަލުކޮށްފިއެވެ.
ރާއްޖެއިން ކޮވިޑް-19 ބަލި ޖެހުނު މީހުންގެ ތެރެއިން ހަ މީހަކަށް ދަނީ ދަރުމަވަންތަ ހޮސްޕިޓަލުގައި ފަރުވާދެމުންނެވެ. އެއީ ފަސް ދިވެހިންނާއި، ބިދޭސީއެކެވެ.
ހޮނިހިރު ދުވަހު ނެޝަނަލް އިމަރޖެންސީ އޮޕަރޭޝަން ސެންޓަރ (އެންއީއޯސީ) ގައި ބޭއްވި ނޫސްވެރިންގެ ބައްދަލުވުމުގައި ޑރ. މުހައްމަދު އިސްމާއިލް ވިދާޅުވީ، ވޯޑަށް ބަދަލުކުރި މީހާގެ މިހާރު ހުރީ ''ފުރަމޭ'' ގެ މައްސަލައެއް ކަމަށެވެ. އޭނާ ވިދާޅުވީ، އެމީހާގެ ފުރަތަމަ ސާމްޕަލް ނެގެޓިވްވެފައިވާ ކަމަަށާއި، ދެވަނަ ސާމްޕަލްގެ ނަތީޖާ އަދި ނުލިބޭކަމަށެވެ.
ޑރ. މުހައްމަދު އިސްމާއިލް ވަނީ އިތުރު ބަލި މީހުންގެ މަޢުލޫމާތުވެސް ހިއްސާކުރައްވާފައެވެ. އެގޮތުން، ފަރުވާދެމުންދާ 88 އަހަރުގެ މީހާގެ ޙާލު އެހާ ރަނގަޅު ނޫން ކަމަށާއި، އެ މީހާގެ ޙާލަތު އިތުރަށް ގޯސްވުމުގެ ފުރުޞަތު އޮތުމުން، އަދިވެސް އެ މީހާގެ ޙާލަތު ބަލަމުންދާ ކަމަށް ވިދާޅުވިއެވެ. އުމުރުން 49 އަހަރުގެ ޕާކިސްތާނުގެ ފިރިހެން މީހާއާއި ބެހޭ ގޮތުން ޑޮކްޓަރ ވިދާޅުވީ، އެމީހާގެ ހުން އެބަހުރި ކަމަށާއި، ނޭވާލުމުގެ މައްސަލައެއް ހުރުމުން އޮކްސިޖަން ގެ ފަރުވާ ދެމުން އަންނަކަމަށެވެ.
ޑޮކްޓަރު ވިދާޅުވީ، ފަރުވާދެމުންދާ މީހުންގެ ތެރެއިން 58 އަހަރުގެ މީހާ ހޮސްޕިޓަލުގައި އެޑްމިޓްކޮށްފައިވާތާ ހަ ދުވަސް ވެއްޖެ ކަމަށާއި، ބައެއް ބޭސްތައް ދިނުން ހުއްޓާލާފައިވާ ކަމަށެވެ. ކުރިޔަތް އޮތް 10 ދުވަހު އިތުުރު ބޭސްތައް ދިނުމަށް ނިންމަވާފައިވާކަމަށްވެސް ވިދާޅުވިއެވެ.
ޑޮކްޓަރު މުހައްމަދު އިސްމާއިލް ވިދާޅުވީި، ޞިއްޙީ ގިނަ މައްސަލަތަކާއި ގުޅިގެން ފަރުވާދެމުންދާ 80 އަހަރުގެ މީހަކު ހޮސްޕިޓަލުގައި ފަރުވާދެމުންދާތާ 12 ދުވަސް ވެދާނެ ކަމަށާއި، އެމީހާގެ ބެކްޓީރިއަލް ނިއުމޯނިޔާ އެބަހުރި ކަމަށެވެ. އަދި އެމީހާގެ ބަލި ޙާލަތު ކުރިޔަށްވުރެ ރަނގަޅު ކަމަށާއި، ކުރިޔަށް އޮތް ތަނުގައި އިތުރު ބޭސްތަކެއް ދިނުން އެކަށީގެންވާ ކަމަށް ޑޮކްޓަރ ވިދާޅުވިއެވެ.
ރާއްޖެއިން ކޮވިޑް-19 އަށް މިހާތަނަށް 491 މީހަކު ވަނީ ކޮވިޑް-19 އަށް ޕޮޒިޓިވްވެފައެވެ. ބަލިން 17 މީހަކު ރަނގަޅުވެފައިވާއިރު، ބަލި ޖެހިގެން އެކަކު ވަނީ ރަނގަޅުވެފައެވެ.
