ކޮވިޑް-19: މީޑިއާތަކަށް އަމާޒުކޮށް، ލޯނެއް ހަމަޖައްސައިފި
2 މެއި 2020 | ހޮނިހިރު 06:324 ޕަސެންޓް އިންޓަރެސްރޭޓާއެކު 6 އަހަރުން ދައްކާގޮތަށް
ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު: ރައީސް އޮފީހުގައި އޮތް ނޫސްވެރިންގެ ބައްދަލުވުމަކަށްފަހު، ނޫސްވެރިންނާއެކު ސެލްފީއެއް ނަންގަވަނީ (ފައިލް ފޮޓޯ)
މިހާރު ދުނިޔޭގައި ހަލުވިކަމާއެކު ފެތުރެމުންދާ ކޮވިޑް-19 އާ ގުޅިގެން ވިޔަފާރިތަކަށް ބޭނުންވާ މާލީ އެހީތެރިކަން ފޯރުކޮށް ދިނުމަށް އެސްއެމްއީ ޑިވެލޮޕްމަންޓް ފައިނޭންސް ކޯޕަރޭޝަން (އެސްޑީއެފްސީ) އިން ކުރާ މަސައްކަތްތަކުގެ ތެރެއިން، މިހާރު ހިނގަމުންދާ މީޑިއާތަކަށް ޢަމާޒުކޮށްގެން، "ކޮވިޑް-19 ވިޔަފާރި އެހީ- މީޑިއާ ޕެކޭޖް"ގެ ނަމުގައި އިތުރު ލޯނެއް ތަޢާރަފުކޮށްފި އެވެ.
އޭޕްރީލް 30 ވަނަ ދުވަހު އެސްޑީއެފްސީން ނެރެފައިވާ ނޫސްބަޔާނެއްގައި ބުނެފައިވަނީ، މި ލޯނަކީ މިހާރު ހިނގަމުންދާ މީޑިއާތަކަށް ދުވަހުން ދުވަހަށް ބޭނުންވާ ޚަރަދުތައް ހަމަޖައްސައި ދިނުމަށާއި އެ ވިޔަފާރިތައް ދެމެހެއްޓުމަށް ޢަމާޒުކޮށް، ތަޢާރަފުކުރި ލޯނެއް ކަމަށެވެ.
މި ލޯނު ދޫކުރުމަށް ހަމަޖެހިފައިވަނީ %4 އިންޓްރެސްޓް ރޭޓްގައި ގިނަވެގެން 6 އަހަރު ދުވަހުގެ މުއްދަތުގެ ތެރޭގައި އަދާކުރާ ގޮތަށެވެ.
މި ލޯނުގެ ޝަރުޠުތަކުގެ ތެރޭގައި މި ޙާލަތާއި ގުޅިގެން އަދި ލޯނު އެހީދޭ މުއްދަތުގެ ތެރޭގައި ވެސް އެއްވެސް ދިވެހި މުވައްޒަފެއް ވަކިނުކުރުން ހިމެނެއެވެ.
މި ލޯނަށް އެދުމުގެ ފުރުޞަތު މިއަދުން ފެށިގެން ވަނީ ހުޅުވާލާފައެވެ. މި ލޯނަށް އެދި ހުށަހަޅާ ފޯމު އެސްޑީއެފްސީގެ ވެބްސައިޓު މެދުވެރިކޮށް ލިބެން ހުންނާނެއެވެ.
އެސްޑީއެފްސީން ބުނީ މި ލޯނާއި ގުޅިގެން މީޑިއާތަކަށް ދިމާވާ މާލީ ދަތިތަކަށް ލުޔެއް ލިބި، އެ މީޑިއާތައް ދެމެހެއްޓުމަށް އިތުރު ފުރުޞަތުތަކެއް ލިބިގެންދާނެ ކަމަށެވެ.
އެ ލޯނަށް އެދުުގެ ފުރުޞަތު މެއި މަހުގެ ފުރަތަމަ ދުވަހުން ފެށިން ހުޅުވާލާފައިވާއިރު، އެކަމަށް އެދޭ ފޯމު އެސްޑީއެފްސީގެ ވެބްސައިޓުން (www.sdfc.mv) ލިބެންހުންނާނެ ކަމަށާއި އަދި ފޯމު ހުށަހެޅޭނީ އެކޯޕަރެޝަންގެ އީމެއިލް (application@sdfc.mv) މެދުވެރިކޮށް ކަމަށް ވެސް ބުނެފައި ވެއެވެ.
