އިންޑޮނީޝިއާއިން އައި ފަޔަރ ފައިޓަރުންނަށް މަރުހަބާ ކިޔާފައިވަނީ ޝަރަފުގެ ކުރުނީހަކުން
ރާއްޖެއައިސް ފައިވަނީ 18 ފަޔަރ ފައިޓަރުން
އިންޑޮނީޝިއާއިން އައި 18 ދިވެހިން ވެލާނާ އިންޓަރނޭޝަނަލް އެއަޕޯޓުގައި
ތަމްރީނުތަކެއް ފުރިހަމަ ކުރުމަށްފަހު އިންޑޮނީޝިއާއިން ރާއްޖެއައި ދިވެހި ފަޔަރ ފައިޓަރުންނަށް މަރުހަބާ ކިޔުމަަށް ޝަރަފުގެ ކުރުނީހެއް އަރުވައިފިއެވެ.
ރާއްޖެއިން ބޭރުގައި ދިރިއުޅެމުންދާ ދިވެހިން ރާއްޖެ ގެނައުމަށް ސަރުކާރުން ކުރަމުންދާ މަސައްކަތްތަކުގެ ތެރެއިން އިންޑޮނޭޝިއާގައި ތިބި 18 ފަޔަރ ފައިޓަރުން ރާއްޖެ ގެނެސްފައިވަނީ ހުކުރު ދުވަހުގެ ރޭގެ ވަގުތެއްގައެވެ.
މޯލްޑިވްސް އެއަރޕޯޓު ފަޔަރ އެންޑް ރެސްކިއު އިން ކުރި ޓުވީޓެއްގައި ވަނީ ބޯޑަރުތައް ބަންދުކޮށްފައިވަނީ އެމީހުން ތަމްރީނުތަކެއް ފުރިހަމަކުރުމަށް އިންޑޮނީޝިއާގައި ތިއްބާކަމަށެވެ. ބޯޑަރުތައް ބަންދުކުރުމާއި އެކު އެމީހުން އެގައުމުގައި ހަފްތާތަކެއް ވަންދެން ތާށިވި ކަމަށެވެ.
މޯލްޑިވްސް އެއަރޕޯޓު ފަޔަރ އެންޑް ރެސްކިއު އިން ބުނީ އެ މީހުންނަށް މަރުހަބާ ކިޔުމުގެ ގޮތުން ޝަރަފުގެ ކުރުނީހެއް އެރުވުނު ކަމަށެވެ. އެއަރޕޯޓު ފަޔަރ އިން ވަނީ މެލޭޝިއާގައި ހުންނަ ރާއްޖޭގެ ހައިކޮމިޝަނުން އެފަރާތްތައް ގެނައުމަށްޓަކައި ކުރި މަސައްކަތަށް ޝުކުރުއަދާ ކޮށްފައެވެ.
ކޮވިޑް-19 ދުނިޔޭގެ އެކި ޤައުމުތަކުގައި ފެތުރެމުންދިއުމާއެކު، ރާއްޖެއިން ބޭރުގައި ދިރިއުޅެމުންދާ ދިވެހިން ރާއްޖެ ގެނައުމުގެ މަސައްކަތް ސަރުކާރުން ދަނީ ކުރަމުންނެވެ. އެގޮތުން މީގެ ކުރިންވެސް ބައެއް ޤައުމުތަކުން ދިވެހިން ރާއްޖެ ގެނެސްފައިވެއެވެ.
