ކުރިއަށް އޮތް ލޯކަލް ކައުންސިލް އިންތިޚާބުގައި މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ޓިކެޓްގައި ހދ. ހަނިމާދޫ ކައުންސިލަށް ވާދަ ކުރާ ކެނޑިޑޭޓް ހުސްނުބާން އަަބްދުއް ރަހުމާން ނިޔާވުމާއި ގުޅިގެން އެޕާޓީން އޭނާގެ ޢާއިލާއަށް ތައުޒިޔާ ކިޔަފިއެވެ.
ހުކުުރު ދުވަހުގެ ރޭ އެމްޑީޕީން ކޮށްފައިވާ ޓްވީޓްގައި ވަނީ ހުސްނުބާންގެ ޢާއިލާއަށް ލިބިފައިވާ ފުން ހިތާމައިގައި ބައިވެރިވާ ކަމަށެވެ. އަދި އޭނާއަށް ސުވަރުގޭގެ ދާއިމީ ނިޢުމަތް މިންވަރު ކުރެއްވުމަށް ދުޢާ ކުރާ ކަމަށް ޓްވީޓްގައި ވެއެވެ.
ހުސްނުބާން ނިޔާ ވުމާއި ގުޅިގެން ޕާޓީގެ ރައީސް، ރައީސް މުޙައްމަދު ނަޝީދުވެސް ވަނީ ހުސްނުބާންގެ ޢާއިލާއަށް ތައުޒިޔާ ވިދާޅުވެފައެވެ.
ރައީސް ނަޝީދު ވިދާޅުވެފައިވަނީ އެމްޑީޕީގެ ޙަރަކާތްތަކުގައި އިސްކޮށް އުޅުއްވި ހުސްނުބާން ނިޔާވި ޚަބަރު އެއްސެވީ ފުން ހިތާމައާއި އެކުގައި ކަމަށެވެ. އަދި މި ދަނޑިވަޅުގައި ޢާއިލާއަށް އިޚުލާޞްތެރި ތަޢުޒިޔާ ދަންނަވާ މަރުޙޫމާއަށް ސުވަރުގެ މިންވަރު ކުރެއްވުމަށް އެދި ދުޢާ ދަންނަވާ ކަމަށް ރައީސް ނަޝީދު ވިދާޅުވެފައިވެއެވެ.
ރައީސް ނަޝިދުގެ އިތުރުން ވެސް ޕާޓީގެ ނައިބު ރައީސް މުޙައްމަދު ޝިފާޒާއި، ޕާޓީގެ ލީޑަރޝިޕްގެ މެންބަރުން ވަނީ ހުސްނުބާންގެ ޢާއިލާއަށް ތަޢުޒިޔާ ދަންނަވާފައެވެ.
ކައުންސިލް އިތިޚާބުގައި ވާދަ ކުރާ ކެނޑިޑޭޓަކު ނިޔާވެފައިވާއިރު، ކައުންސިލް އިންތިޚާބު އެންމެ ފުރަތަމަ ބާއްވަން ނިންމާފައިވަނީ މިދިޔަ އެޕްރީލް މަހުގެ ހަތަރެއްގައެވެ. ނަމަވެސް ރާއްޖޭގައި ކޮވިޑް 19 ފެތުރެން ފެށުމާއި ގުޅިގެން އިންތިޚާބު ބާއްވާ ތާރީޚް ވަނީ އެޕްރީލް 18ށް ފަސްކޮށްފައެވެ.
ރާއްޖޭގައި ޢާންމު ޞިއްޙަތުގެ ކުއްލި ނުރައްކަލުގެ ޙާލަތު އިޢުލާނުކުރުމާއި ގުޅިގެން ޤާނޫނުގައި ބަޔާންކުރާ މުއްދަތުގައި އިންތިޚާބު ނުބޭއްވޭނެ ކަމަށް އިލެކްޝަންސް ކޮމިޝަނުން ވަނީ އިޢުލާނު ކޮށްފައެވެ.
އަދި އެ ކޮމިޝަނުން ވަނީ މުއްދަތެއް ނެތް ގޮތެއް އިންތިޚާބު ފަސް ކުރުމަށް ހައިކޯޓަށް މައްސަލަ ހުށަހަޅާފައެވެ.
