ތިމާގެ އަމިއްލަ މަޞްލަޙަތަށް ވުރެ އަނެކުންނަށް އިސްކަން ދިނުމަށް މިއަދުގެ ހުުކުރު ޚުތުބާގައި ގޮވާލައިފިއެވެ.

އިޙްސާންތެރިވުމަށް ހުކުރު ޚުތުބާގައި ގޮވައިލީ، އިސްލާމް ދީން ގޮވާލަނީ އެއްބަޔަކު އަނެއްބަޔަކަށް އެހީތެރިވެ އަޅައިލުމަށް ކަމަށް ވީހިނދު، ޚާއްސަކޮށް މުޞީބާތާއި ތަކުލީފުގެ ވަގުތުގައި، އެހެން މީހުންނަށް އެހީތެރިވެ ޙަމްދަރުދީވެ، އެމީހުންގެ ހިތާމަތަކުގައި ބައިވެރިވާންޖެހޭ ކަމަށެވެ.

މުސްލިމުންނަކީ، ފޭރާމެއްގެ ރޮދި ތަކެއް ފަދައިން ވަރަށް ގިނަ ގޮތްގޮތުން، އެކަކު އަނެކަކާއި ގުޅި ލާމެހިފައިވާ ބައެއްކަން ސިފަކޮށްދެމުން، ޚުތުބާގައި ބުނީ އަޚުވަންތަކަމާއި އެއްބަނޑުއެއްބަފާކަން މުސްލިމުންގެ މެދުގައި އޮންނަންޖެހޭ ކަމަށާއި، ތިމާގެ އަމިއްލަ މަޞްލަޙަތަށް ވުރެން އަނެކުންނަށް އިސްކަން ދޭންޖެހޭ ކަމަށެވެ.

ކޮންމެ މުސްލިމަކީ އިސްލާމީ އުޚުއްވަތްތެރިކަމުގެ ހަށިގަނޑުގައި ހިމެނޭ، އެއާ ވަކިނުކުރެވޭނެ ގުނަވަނެއްކަން ފާހަގަކޮށް، ޚުތުބާގައި ބުނީ އެ ހަށިގަނޑު އުފުލަންޖެހޭ ކޮންމެ ތަކުލީފަކާއި ވޭނެއްގައި، ހުރިހައި ގުނަވަންތައް ބައިވެރިވާ ކަމަށެވެ.

ޚުތުބާގައި ބުނެފައިވަނީ، މިއަދު މުޅި ދުނިޔެއާ ކުރިމަތިވެފައި މިވަނީ ނުރައްކާތެރި އެހާމެ ހިތާމަވެރި ދަތި ދުވަސްތަކެއް ކަމަށާއި، މިއަދު މުޅި ދުނިޔެވަނީ ބަލިމަޑުކަމާއި، ތަދުމަޑުކަމުގެ ތޫފާނެއްގެ ތެރޭގައި ކަމަށެވެ.

މިދަނޑިވަޅުގައި ވެސް މިއިސްލާމީ މުޖުތަމައުގައި ވެސް، އެހީތެރިކަމާއި އަޅައިލުން ބޭނުންވާ ބަޔަކު އެބަ ތިބި ކަމަށާއި، އެއީ ކުލުނުގެ ނަޒަރަކުން ބަލައިލަން ޖެހޭ ބައެއް ކަަމަށް ޚުތުބާގައި ބުނެފައިއެވެ.

ޚުތުބާގައި ބުނީ ޚާއްސަ އެހީއަށް ބޭނުންވާ މީހުންނަށާއި، ޔަތީމު ކުދިންނަށާއި އަޅާލާނެ ބަޔަކު ނެތް ކުދިންނަށް އޯގާތެރިކޮށް ހިތަން ޖެހޭ ކަމަށާއި، ޚާއްސަ ގޮތެއްގައި، ލޭއަޅަން ޖެހިފައިވާ، ތެލަސީމިޔާ ކުދިންނަށް އެހީތެރިކަމާއި އަޅައިލުން ކޮންމެހެން ދޭންޖެހޭ ކަމަށެވެ.

ހާލުގެ ދުލުން އެހީއަށް ގޮވަމުންދާއިރު، އެހީގެ އަތްތައް ގިނަކުރުމަށްވެސް ޚުތުބާގައި ގޮވާލާފައިވެއެވެ. އަދި އެހީތެރިވުމަކީ އިންސާނިއްޔަތުކަމުގެ އިތުރުން، މުސްލިމުންގެ އީމާންކަމާއި ވެސް ގުޅިފައިވާ ކަމެއް ކަމުގައި މިއަދުގެ ޚުުތުބާގައި ބުނެފައިވެއެވެ.