އެމްޕީއެލްގެ ސްޓަފެއް ކޮވިޑް-19 އަށް ޕޮޒިޓިވްވެފައިވާކަމަށް އެމްޕީއެލްގެ މެނޭޖިންގް ޑިރެކްޓަރ ޝާހިދު އަލީ ވިދާޅުވެއްޖެއެވެ.

ޝާހިދުމިހެން ވިދާޅުވީ ހުކުރު ދުވަހު މެންދުރު ފަހު ކުރިޔަށް ދިޔަ ނޫސްވެރިންގެ ބައްދަލުވުމުގައެވެ.

ނެޝަނަލް އިމަޖެންސީ އޮޕަރޭޝަން ސެންޓަރުގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޝާހިދު ވިދާޅުވީ، މިހާތަނަށް އެމްޕީއެލްގެ 1 މުވައްޒަފަކު ކޮވިޑް-19 އަށް ޕޮޒިޓިވްވެފައިވާކަން އެނގިފައިވާކަމަށާއި އެ މުވައްޒަފު ޕޮޒިޓިވްވެފައިވަނީ މީގެ 5 ދުވަސް ކުރިންކަމަށެވެ. އަދި އެންމެ ފަހުން އެ މުވައްޒަފު އެމްޕީއެލްގައި މަސައްކަތްކޮށްފައިވަނީ، އޭޕްރީލް މަހުގެ 18 ވަނަ ދުވަހުގައި ކަމަށެވެ.

ޝާހިދު ވިދާޅުވީ ޕޯޓުގެ މަސައްކަތަކީ މި ދަނޑިވަޅުގައި ވަރަށް މުހިންމު މަސައްކަތެއްކަމަށާއި ރާއްޖެއަށް އެތެރެކުރާ މުދަލުގެ ބޮޑު ޕަރސެންޓޭޖެއް ގެންނަނީ މާލޭގެ ކޮމާރޝަލް ހާބަރުގެ ތެރެއިންކަމަށެވެ. އެގޮތުން، މި ހާލަތުގައި ވެސް އޮޕަރޭޝަން ހުއްޓުމެއްނެތި ކުރިޔަށް ގެންދިޔުމަށް އެކި ދާއިރާތަކުގައި މަސައްކަތް ކުރާ 168 މުވައްޒަފުން ޕޯޓް ތެރޭގައި ލޮކްޑައުންވެގެން މަސައްކަތްކުރަމުންދާކަމަށެވެ. އަދި ކޮވިޑް-19 އަށް ޕޮޒިޓިވް ވި މުވައްޒަފަކީ މި 168 މީހުންނާއި އެކު ލޮކްޑައުންވި މުވައްޒަފެއް ނޫންކަމަށެވެ.

ޝާހިދު ވިދާޅުވީ އޭނާއަކީ އާންމުކޮށް ޑިއުޓީއަށް ނުކުންނަ އުސޫލުން ވަޒީފާ އަދާކުރާ މީހެއްކަމަށާއި އެގޮތުން އެންމެ ފަހު ޑިއުޓީއަށް ނިކުމެފައިވަނީ އޭޕްރީލް 18 ގައި ކަމަށެވެ. އަދި އެ ކޭސްއަށް ފަހު އެމްޕީއެލްގެ އިތުރު އެއްވެސް މުވައްޒަފެއް ބައްޔަށް ޕޮޒިޓިވް ވެފައިވާކަމުގެ މައުލޫމާތެއް ލިބިފައިނުވާކަމަށް ޝާހިދު ވިދާޅުވިއެވެ. ޝާހިދު ވިދާޅުވީ މުވައްޒަފުންގެ ސަލާމަތާއި ރައްކާތެރިކަން ކަށަވަރުކުރުމަށް ގިނަ މަސައްކަތް ކުރަމުންދާކަމަށެވެ.