މި ހާލަތުގައި މަސައްކަތް މިކުރަނީ ގިނަ ގޮންޖެހުންތަކާއި އެކު: ޝާހިދު
މަސައްކަތް ކުރަނީ ލިމިޓެޑް މުވައްޒަފުންތަކެއް
އެންއީއޯސީގައި ބޭއްވި ޕްރެސްގައި އެމްޕީއެލްގެ ސީއީއޯ ޝާހިދު އަލީ، :1 މެއި 2020
ކޮވިޑް-19 ފެތުރުން ހުއްޓުވުމުގެ ގޮތުން މާލޭގައި އިއުލާން ކޮށްފައިވާ ލޮކްޑައުންގެ ހާލަތުގައި ވިޔަފާރި ބަނދަރުގެ މަސައްކަތް ކުރިޔަށް ދަނީ ބޮޑެތި ގޮންޖެހުންތަކަކާއި އެކު ކަމަށް މޯލްޑިވްސް ޕޯޓްސް ލިމިޓެޑު (އެމްޕީއެލް) ގެ މެނޭޖިން ޑިރެކްޓަރ ޝާހިދު އަލީ ވިދާޅުވެއްޖެއެވެ.
އެމްޕީއެލުން ކުރަމުންދާ މަސައްކަތުގެ ތަފްސީލުތައް މީޑިއާތަކަށް ހިއްސާ ކުރުމަށް ހުކުރު ދުވަހު ނެޝަނަލް އިމަރޖެންސީ އޮޕަރޭޝަން ސެންޓަރ (އެންއީއޯސީ) ގައި ވާހަކަ ދައްކަމުން އެމްޕީއެލްގެ އެމްޑީ ވިދާޅުވީ، ޕޯޓުގެ މަސައްކަަތަކީ މުހިއްމު މަސައްކަތަކަށްވާއިރު، އޮޕަރޭޝަން ހުއްޓުމެއް ނެތި ކުރިޔަށް ގެންދިޔުމަށް ވަރަށް ގިނަ މަސައްކަތްތައް މިހާރުވެސް ކުރެވެމުންދާ ކަމަށެވެ.
މާލެ ލޮކްޑައުން އާއި ރަމަޟާން މަހާއި ގުޅިގެން އެމްޕީއެލްގެ ގަޑިތަކަށް ވަނީ ބަދަލުތަކެއް ގެނެސްފައެވެ. އެގޮތުން މިހާރު ޕޯޓުން ހިދުމަތްދެމުން ދަނީ ހެނދުނު 8:30 އިން 16:00 އަށެވެ. މުދާ އަރުވާ ބެލުމުގެ މަސައްކަތް ކުރަނީ ހެނދުނު 08:30 ފެށިގެން ރޭގަނޑު 13:00 އެވެ. ޕޯޓުގެ މަސައްކަތަށް އެންމެ މުހިއްމު 168 ސްޓާފުން ސައިޓްތަކުގައި ލޮކްޑައުންގައި އެބަތިއްބެވެ.
ޝާހިދު ވިދާޅުވީ، އެމްޕީއެލްގެ އާއްމު ހަލަތާއި އެއްގޮތަށް މަސައްކަތް ކުރިޔަށްދާ ކަމަށް ނުދަންނަވާނެ ކަމަށާއި، މަދު އަދަދެއްގެ މުވައްޒަފުންނާއި އަދި ރޯދަ މަހުގެ ވަގުތުތަކާއި އަދި މަސައްކަތް ކުރަން ޖެހޭ ގޮތުން ބޯޓު ތެރެއިން ކާގޯ ކްލިއަރ ކުރުމުގެ މަސައްކަތްދަނީ ވަރަށް ލަސްކޮށް ކަމަށެވެ.
ޝާހިދު ވިދާޅުވީ، އާއްމުކޮށް މަސައްކަތް ކުރާ ސްޕީޑުގައި މަސައްކަތް ނުކުރެވޭތީ އިތުރު ފިޔަވަޅުތަކެއް އަޅަން ނިންމާފައިވާ ކަމަށެވެ. އެ ފިޔަވަޅުތަކަކީ ބޯޓުތައް އައުމުގައި ޝެޑިއުލްތަކެއް ހަމަޖެއްސުން ކަމަށް ވިދާޅުވިއެވެ.
