ކޮވިޑް-19: މިހާރު މިއޮތީ ޓްރީޓޮޕް ހޮސްޕިޓަލް ބޭނުންކުރަންޖެހޭ ހާލަތަށް އައިސްފައި: މަބްރޫކް
1 މެއި 2020 | ހުކުރު 07:57ޓްރީޓޮޕް ހޮސްޕިޓަލް ބޭނުންކުރާނީ 200 އެނދުގެ އައިސީޔޫ ފެސިލިޓީއަކަށް
ހުޅުމާލޭގައި ހުންނަ ޓްރީޓޮޕް ހޮސްޕިޓަލް
ކޮވިޑް-19އަށް ޕޮޒިޓިވްވާ މީހުން ދުވަހަކަށްވުރެ ދުވަހެއް އިތުރުވެ، މިހާރު މިއޮތީ ޓްރީޓޮޕް ހޮސްޕިޓަލް ބޭނުންކުރަން ޖެހޭ ހާލަތުގައި ކަމަށް ކޮވިޑް-19ގެ ޓާސްކްފޯސްގެ ތަރުޖަމާނު މަބްރޫކު އަޒީޒު ވިދާޅުވެއްޖެއެވެ.
ބުރާސްފަތި ދުވަހުގެ ރޭ ނޭޝަނަލް އިމަޖެންސީ އޮޕަރޭޝަން ސެންޓަރުގައި ބޭއްވި ނޫސްވެރިންގެ ބައްދަލުވުމުގައި ނޫސްވެރިޔަކު ކުރި ސުވާލަކަށް ޖަވާބު ދެއްވަމުން މަބްރޫކް ވިދާޅުވީ، ރާއްޖޭގެ ހާލަތު މިހާރު މިވަނީ ޓްރީޓޮޕް ހޮސްޕިޓަލް "އެކްޓިވޭޓް" ކުރަންޖެހޭ ހާލަތުގައި ކަމަށެވެ.
މީގެކުރިން ބޭއްވި ނޫސްވެރިންގެ ބައްދަލުވުންތަކުގައި ވެސް މަބްރޫކް ވަނީ ހުޅުމާލޭގައި ހުންނަ ޓްރީޓޮޕް ހޮސްޕިޓަލަކީ ނޭޝަނަލް އިމެޖެންސީ އޮޕަރޭޝަން ސެންޓަރު ބޭނުން ކުރަން ޖެހުމުން، ބޭނުން ކުރެވޭގޮތަށް ހަމަޖެހިފައިވާ ހޮސްޕިޓަލެއް ކަމަށެވެ.
ޓްރީޓޮޕް ހޮސްޕިޓަލް ބޭނުންކުރާއިރު، ސަރުކާރުން، ހަރަދުކުރަންޖެހޭނީ ސިއްހީ ހިދްމަތްތެރިންނާއި ބޭނުންވާ ބޭސް ފަަދަ ތަކެތިކަމަށް މަބްރޫކް ވިދާޅުވި އެވެ. އެތަނުގައި ހުރި ވަސީލަތްތަކުގެ ބޭނުންކުރެވޭގޮތަށް މަޝްވަރާ ކުރެވިފައިވާ ކަމަށް މަބްރޫކް ވިދާޅުވި އެވެ.
މަބްރޫކް ވިދާޅުވީ، ޓްރީޓޮޕް ނޭޝަނަލް އިމަޖެންސީ އޮޕަރޭޝަން ސެންޓަރަށް ނަގާއިރު، އެ ހޮސްޕިޓަލުގައި ފަރުވާ ދެމުންދާ ފަރާތްތައް އެހެންތަނަކަށް ބަދަލު ކުރަންޖެހޭ ކަމަށެވެ. އެގޮތުން އެތަން އައިޖީއެމްއެޗު ތެރޭގައި ހަދައިދޭ ގޮތަށް ނިންމާފައިވާ ކަމަށް ވެސް މަބްރޫކު ވިދާޅުވި އެވެ.
ކޮވިޑް-19 ގެ ހާލަތު އިތުރަށް ގޯސްވާނަމަ، ޓްރީޓޮޕް ހޮސްޕިޓަލް ބޭނުންކުރާނީ 200 އެނދުގެ އައިސީޔޫ ފެސިލިޓީއެއްގެ ގޮތުގައި ކަމަށް ކޮވިޑް-19 ޓާސްކްފޯހުން ވަނީ މީގެ ކުރިން ނިންމާފައެވެ.
