މިއީ މަސައްކަތްތެރިންނަށް އެންމެ ކުޑަ އުޖޫރަ ކަނޑައަޅަން އެންމެ މުހިންމުވަގުތުކަމަށް ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު ވިދާޅުވެއްޖެއެެވެ.

ރާއްޖޭގައި ހަލުވިކަމާއެކު ކޮވިޑް-19 ފެތުރެމުންދިއުމާއި ގުޅިގެން އިޤުތިޞާދަށް އައިސްފައިވާ ހީނަރުގެ ސަބަބުން ވަރަށް ގިނަ ފަރާތްތަކެއްގެ ވަޒީފާ ވަނީ ގެއްލިފައެވެ. މި ދަނޑިވަޅުގައި، މަސައްކަތްތެރިންގެ ދުވަހުގެ ތަހުނިޔާ ދަންނަވައި ހުކުރު ދުވަހު ކޮށްފައިވާ ޓުވީޓެއްގައި ރައީސް ނަޝީދު ވިދާޅުވީ، މިއީ އެންމެ ކުޑަ އުޖޫރަ ކަނޑައެޅުމާއި ވަޒީފާ ނެތް ފަރާތްތަކަށް އެލެވެންސް ކަނޑައެޅުމަށް އެންމެ މުހިންމު ވަގުތުކަމަށް ދެކެވަޑައިގަންނަވާކަމަށެވެ.

ކޮވިޑް-19 އާ ގުޅިގެން އިޤުތިޞާދަށް އަންނަ ލޮޅުންތަކާއެކު ޕްރައިވެޓް ސެކްޓަރ ގައި މަސައްކަތްކުރާ ގިނަ ބައެއްގެ ވަޒީފާ ގެއްލި މުސާރަ ކުޑަކުރުމާއި، މުސާރަ ނުހިނގާގޮތައް ގެއަށް ފޮނުވާލުމުގެ ކަންކަން ވަނީ ހިނގާފަ އެވެ. އެއާއެކު ސަރުކާރުން ވަނީ ޖޮބް ސެންޓަރެއް ޤާއިމުކޮށް އެފަދަ ފަރާތްތަކުން ރަޖިސްޓަރީ ވުމަށް ހުޅުވާލާފައެވެ. އެގޮތުން މިހާތަނަށް ގިނަ ޢަދަދެއްގެ ފަރާތްތަކެއް ވަޒީފާ ގެއްލިގެން ޖޮބްސެންޓަރަށް ޝަކުވާ ހުށަހަޅާފައިވާއިރު، ބަލިމަޑުކަމާއި ގުޅިގެން ވަޒީފާ އިން ވަކިކުރި، މުސާރަ ނުހިނގާގޮތައް ގެއަށް ފޮނުވާލާފައިވާ އަދި އެކަށީގެންވާ ވަރަށް ވުރެ މުސާރަ ކުޑަކުރި މީހުންނަށް ކުރިޔަށް އޮތް 3 މަސް ދުވަހު ކޮންމެ މަހަކު 5000 ރުފިޔާ ދިނުމަށް ސަރުކާރުން ވަނީ ނިންމާފައެވެ.

މަސައްކަތްތެރިންގެ ދުވަހުގެ ގޮތުގައި ފާހަގަ ކުރަމުން އަންނަނީ ކޮންމެ އަހަރެއްގެ ވެސް މެއި މަހުގެ 1 ވަނަ ދުވަހެވެ. މަސައްކަތްތެރިންގެ ދުވަސް ފާހަގަކުރާއިރު، މަސައްކަތްތެރިން އެންމެ ބޭނުންވާ އެއް ކަމަކީ މިނިމަމް ވޭޖް، ނުވަތަ އެންމެ ދަށް މުސާރަ ކަނޑައެޅުން ކަމަށް ވާއިރު، ދުނިޔޭގައި ހަލުވިކަމާއެކު ކޮރޯނާވައިރަސް ފެތުރެމުންދާއިރު، މި ދަނޑިވަޅަކީ މިނިމަމް ވޭޖް ކަނޑައެޅުމަށް އެންމެ ރަނގަޅު ދަނޑިވަޅެއް ކަމަށް ޤަބޫލުނުކުރައްވާ ކަމަށް އެންމެ ކުޑަ އުޖޫރާ ކަނޑައެޅުމަށް ރައީސް އިބްރަހީމް މުޙައްމަދު ޞާލިޙު އުފައްދާފައިވާ މިނިމަމް ވޭޖް ބޯޑުގެ ޗެއަރމަން މަރިޔަމް ޚާލިދާ ވަނީ މީގެކުރިން ވިދާޅުވެފައެވެ.