މީހަކު ބަލިވާ ހިސާބުން ފަރުވާދޭން ފަށާނެ، ނަތީޖާ ލިބެންދެން މަޑެއް ނުކުރާނެ: ޑރ.އަފްޒަލް
ދެވޭ ޓުރީޓްމަންޓަކަށް ބަދަލެއް ނާންނާނެ
ބުރާސްފަތި ދުވަހުގެ ރޭގެ ނޫސްވެރިންގެ ބައްދަލުވުމުގެ ތެރެއިން
ކޮވިޑް-19ގެ އަލާމާތެއް ފެނިގެން ރިޕޯޓުކުރާ ހިސާބުން ފަރުވާ ދޭން ފަށާނެ ކަަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)ގެ އެޕިޑެމިއޮލޮޖިސްޓް ޑރ. އިބްރާހީމް އަފްޒަލް ވިދާޅުވެއްޖެއެވެ.
ބުރާސްފަތި ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި ޑރ. އަފްޒަލް ވިދާޅުވީ ކޮވިޑް-19ގެ އަލާމަތްތައް ފެނި، މީހަކު ބަލިވާ ހިސާބުން ނަތީޖާ ލިބެންދެން މަޑުނުކޮށް، ފަރުވާދޭން ފަށާނެ ކަމަށެވެ. އަދި ވިދާޅުވީ ނަތީޖާ ލިބުނު ކަމުގައި ވިޔަސް ކުރިން ދެމުންއައި ފަރުވާއަށް ބަދަލު ނުގެންނަ ކަމަށެވެ.
ކޮވިޑް-19އަށް ޕޮޒިޓިވްވެފައިވާކަން ކަށަވަރުވާ ހިސާބުން ކޮވިޑް-19ގައި ޢަމަލުކުރާ ޕްރޮސީޖަރގެ ދަށުން ހުރިހާ ކަމެއް ކުރިއަށްދާނެ ކަމަށާއި، އަލާމަތްތައް ރަނގަޅުވިއަސް އެމީހަކު ބަހައްޓާނީ އައިސޮލޭޝަންގައި ކަމަށް ޑރ. އަފްޒަލް ވިދާޅުވިއެވެ. 14 ދުވަހުގެ މުއްދަތަށް ފަހު ދެފަހަރެއްގެ މަތިން ކޮވިޑް-19އަށް ޓެސްޓު ކުރެވޭނެ ކަމަށާއ، ދެ ޓެސްޓުގެ ނަތީޖާ ނެގެޓިވް ވުމުން ނޫނީ އެމީހަކު ދޫނުކުރާ ކަމަށް ޑރ. އަފްޒަލް ވިދާޅުވިއެވެ.
ކޮވިޑް-19 ނައްތާލުމަށް ގިނަ މަސައްކަތްތައް ކުރަމުންދާކަން ފާހަގަކުރައްވާ ޑރ. އަފްޒަލް ވިދާޅުވީ، މިމަސައްކަތުގައި ޢާންމު ރައްޔިތުންގެ އެއްބަރުލުން ބޭނުންވާ ކަމަށެވެ.
އެގޮތުން އިޖްތިމާއި ގައިދުރުކަން ބެހެއްޓުމާއި، ސާފުތާހިރުކަން އިތުރުކުރުމާއި، ޑެލިވަރީގެ ޚިދުމަތް ހޯދާއިރު ވެސް ވީހާ ވެސް ދުރުން މުޢާމަލާތްކޮށް ގެއަށް ގެންނަ މުދާ އެއީ ދޮވެވޭ އެއްޗެހި ކަމުގައިވާނަމަ އެކަން ވެސް ކުރުމަށް ޑރ. އަފްޒަލް އިލްތިމާސް ކުރެެއްވިއެވެ.
