ކުޅުދުއްފުށި ސިޓީ ލޮކްޑައުންގެ މުއްދަތު އިތުރުކޮށްފި

ކުޅުދުއްފުށި ސިޓީގައި ކޮވިޑް-19 ފެތުރުމުގެ ބިރު ބޮޑުވެފައި ވާތީ އެ ސިޓީގެ ކޮވިޑް-19 ޓާސްކު ފޯހުން ފުރަބަންދުގެ މުއްދަތު 7 ދުވަހަށް އިތުރުކޮށްފިއެވެ.

ކުޅުދުއްފުށި ސިޓީގައި ފުރަތަމަ ލޮކްޑައުން ކުރީ އޭޕްރީލް މަހުގެ 21 ވަނަ ދުވަހު 03 ވަނަ ދުވަހުގެ ނިޔަލަށެވެ. އެ މުއްދަތު ދެވަނަ ފަރަހަށް އިތުރުކުރީ 1 މެއިގެ މެންދުރު 12:00 އަށެވެ. އަދި މިހާރު 7 ދުވަސް އިތުރު ކޮށްފައިވާއިރު، ފުރަބަންދުގެ މުއްދަތު ހަމަވާނީ މެއި މަހުގެ 7 ވާ ބުރާސްފަތި ދުވަހުގެ ނިޔަލަށެވެ.

Advertisement

ކުޅުދުއްފުށި ކައުންސިލުން ބުނީ ކޮވިޑް-19 ރޯގާގެ ބިރުވެރިކަން ރާއްޖޭގައި އިންތިހާއަށް ބޮޑުވެފައިވާއިރު، އުތުރުގެ ބައެއް ރަށްރަށުން ބައްޔަށް ޕޮޒިޓިވްވެފައިވާ މީހުން ފެނި ބަލި އިތުރަށް ފެތުރެމުންދާ ކަމަށެވެ.

ކުޅުދުއްފުއްޓަކީ އުތުރުގެ ޞަރަޙައްދުގެ އިޤުތިޞާދީ، ޞިއްޙީ އަދި ދަތުރުފަތުގެ ނާރެސްކަމުން ޒަރޫރީ ބޭނުންތައް ފުރިހަމަ ކުރުމަށް ގިނަ ޢަދަދެއްގެ މީހުން ކުޅުދުއްފުއްޓަށް ދަތުރުކުރަން ޖެހިފައިވާތީ، ބަލިން ރައްކާތެރި ވުމުގެ ގޮތުން އެ ޞަރަޙައްދުގެ ޙާލަތަށް ރިޢާޔަތް ކޮށް އަޅާ ފިޔަވަޅެއްގެ ގޮތުން 23 އޭޕްރިލް 2020 ކުޅުދުއްފުށި ފުރަބަންދު ކުރި އިޢުލާނުގައިވާ ބަދަލު ތަކަކާއެކު ފުރަބަންދު ދަމަހައްޓަން ކުޅުދުއްފުށި ކޮވިޑް-19 ޓާސްކް ފޯސްއިން ނިންމާފައިވާ ކަމަށަ ބަޔާނުގައިވެއެވެ.

އެގޮތުން 01 މެއި އިން 07 މެއިގެ ނިޔަލަށް ޒަރޫރީ ބޭނުންތަކަށް ހުއްދަ ހޯދުމަކާ ނުލާ ހެނދުނު 06:00ން ހަވީރު 03:30ށް ނުކުމެ އުޅެވޭގޮތައް ހަމަޖައްސައި މި ނޫން ގަޑިތަކުގައި ކުޅުދުއްފުށި ސިޓީގައި ހުއްދަ ހޯދުމަކާއި ނުލާ ބޭރަށް ނުކުމެ އުޅުމަކީ މަނާ ކަމެއް ކަމަށް ކައުންސިލުން ބުނެއެވެ.

މިގޮތައް އެންގީ ކޮވިޑް-19 ފެތުރުމުގެ ފުރުޞަތު އޮތް މިންވަރަށާއި، ޙާލަތަށް ރިޢާޔަތްކޮށް އެއްވެ އުޅުން ހުއްޓުވުމަށާއި އިޖްތިމާޢީ ގައިދުރުކަން ޤާއިމު ކުރުމަށް ފިޔަވަޅު އެޅުމަށް ޑިރެކްޓަރ ޖެނެރަލް އޮފް ޕަބްލިކް ހެލްތު މައިމޫނާ އަބޫބަކުރު ކައުންސިލަށް ދެއްވާފައިވާ ބާރުގެ ދަށުން ކަމަށް ކައުންސިލުން ބުނެއެވެ.

ލޮކްޑައުން ކޮށްފައިވާ ވަގުތު ތަކުގައި ހުއްދަ ނެތި ބޭރަށް ނުކުމެ އުޅުމަކީ މަނާ ކަމެކެވެ. މި އެންގުމާއި ޚިލާފުވާ މީހުންނާ މެދު (ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ޤާނޫނު)ގެ 143 މާއްދާއާއި ޙަވާލާދީ ކައުންސިލުން ކުރާ ޢަމުރަށް ނުކިޔަމަންތެރިވާ މީހުންނާ މެދު ޢަދަބެއްގެ ގޮތުގައި މައްސަލައިގެ ކުޑަ ބޮޑުމިނަށް ބަލާ 500 ރުފިޔައާއި 5000 ރުފިޔާއާ ދެމެދުގެ ޢަދަދަކުން ޖޫރިމަނާ ފިޔަވަޅު އެޅުމަށް ލިބިދޭ ބާރުގެ ދަށުން ޢަމަލު ކުރުމުގެ އިޚުތިޔާރު ކައުންސިލަށް ލިބިފައިވެއެވެ.

ކޮވިޑް-19 ޓާސްކް ފޯސްގެ ފަރާތުން ބަލި ކޮންޓްރޯލް ކުރަން އަޅަމުން ގެންދާ ފިޔަވަޅުތަކަށް ކުޅުދުއްފުށި ރައްޔިތުންގެ ފަރާތުންނާއި، ޞަރަޙައްދުގެ ރަށްތަކުން ލިބޭ އެއްބާރުލުން ފާހަގަކޮށް ކައުންސިލުން ބުނީ ބަލި ކޮންޓްރޯލް ކުރުމަކީ ބަލިން ރައްކާތެރިވުމަށް ތިބުމަށް އެޅޭނެ އެންމެ މުހިންމު އެއް ފިޔަވަޅު ކަމަށެވެ.

މިދަނޑިވަޅުގައި ޢާންމު ސާފުތާހީރުކަމަށާއި، ޢާންމު ދިރިއުޅުމުގައި އިޖްތިމާޢީ ގައިދުރުކަން ހިފެހެއްޓުމަށާއި، ދިރިއުޅުމުގެ ހުރިހާ ކަމެއްވެސް ދުރާލާ ރާވާ، ބޭރަށް ނުކުމެ އުޅުން މަދުކުރުމާއި މުޖުތަމަޢުގެ ޢާންމު މަޞްލަޙަތު ގެއްލޭ ފަދަ އެންމެހައި ކަންކަމުން ދުރުހެލިވެ ތިބުމަށް ކައުންސިލުން އިލްތިމާސްކޮށްފައިވެއެވެ.

ލޮކްޑައުން އަދި ކޮވިޑް-19ގެ މި ނުރައްކާތެރި ޙާލަތުގައި އެކަކު އަނެއްކަކަށް އެހީތެރިވުމާއި ފަޤީރުން، މިސްކީނުން، ޢާއިލާ މެންބަރުން އަދި ރަށަށް އެކި ޚިދުމަތް ކޮށްދިނުމަށް އެހެން ޤައުމުތަކުން ޒިޔާރަތްކޮށް ރަށުގައި ދިރިއުޅޭ ފަރާތްތަކުގެ ޙާލު ބަލާ އެހީތެރިކަން ފޯރުކޮށްދިނުމަށް ވެސް ނަޞޭޙަތްތެރިވެފައިވެއެވެ. އަދި ގޭގައި ތިބޭއިރު ދުޅަހެޔޮކަމަށް ޚާއްޞަ ސަމާލުކަމެއް ދިނުމަށް ކައުންސިލުން އެދިފައިވެއެވެ.