ފަލަމަސްގަނޑަށް ލިބުނު އަނިޔާއިން ކޭން ރަނގަޅުވެއްޖެ: މޮރީނިއޯ

ޓޮޓެންހަމް ހޮޓްސްޕާގެ ފޯވާޑް ހެރީ ކޭން އަށް ލިބުނު އަނިޔާއިން އޭނާ މިހާރު އެއްކޮށް ރަނގަޅުވެފައިވާ ކަމަށް އެޓީމުގެ ކޯޗު ހޯސޭ މޮރީނިއޯ ބުނެފި އެވެ.

އުމުރުން 26 އަހަރުގެ ކޭންގެ ފައިގެ ފަލަމަސްގަނޑާއި ކުޑަ ހުޅަށް އަނިޔާވީ ޖެނުއަރީ މަހުގެ ކުރީކޮޅުގައި އިނގިރޭސި ޕްރިމިއާ ލީގުގައި ސައުތެމްޓަނާ ދެކޮޅަށް ކުޅުނު މެޗުތެރެއިންނެވެ. އަނިޔާވުމުން ކޭން ވަނީ އޮޕަރޭޝަނެއް ކޮށްފަ އެވެ.

މީގެ ކުރިން ޓޮޓެންހަމްގެ ކޯޗު ހޯސޭ މޮރީނިއޯ ބުނީ ކޭން އަށް ލިބިފައިވާ އަނިޔާ ހީކުރި ވަރަށް ވުރެން ގޯސްވުން އެކަށީގެންވާ ކަމަށެވެ.

ކޮވިޑް-19 އާ ގުޅިގެން މާޗު މަހުގެ 13 ވަނަ ދުވަހުން ފެށިގެން އިނގިރޭސި ޕްރިމިއާ ލީގު މެދުކަނޑާލާފައިވާއިރު، ލީގު އަލުން ފެށުމަށް މަސައްކަތް ކުރަމުން އަންނަނީ ޖޫން މަހުގެ 8 ވަނަ ދުވަހު އެވެ.

ދާދި ފަހުން މޮރީނިއޯ ބުނީ ކޭން އަށް ލިބުނު އަނިޔާ އިން އޭނާ މިހާރު އެއްކޮށް ރަނގަޅުވެފައިވާ ކަމަށާއި، އެކަމަކު އޭނާ އަށް ކުޅުމުގެ ތެރެއަށް އާދެވޭނީ ރަނގަޅަށް ފަރިތަކޮށްގެން ކަމަށެވެ.

މީގެ ކުރިން ޓޮޓެންހަމުން ވަނީ ކުޅުންތެރިން އެކަނި ތަމްރީނުތައް ހަދަން އެ ކްލަބުގެ ޓްރެއިނިން ސެންޓަރު ހުޅުވާލާފައެވެ. ކޭންގެ އިތުރުން އެޓީމުގެ މޫސާ ސިސޯކޯ އާއި ސްޓީވެން ބާގްވެއިން ވެސް ވަނީ އަނިޔާ އިން ރަނގަޅުވެފައެވެ.

މޮރިނިއޯ ބުނީ ލީގުގައި ބާކީ އޮތް ނުވަ މެޗަށް ޓީމުގެ ގިނަ ކުޅުންތެރިން ފިޓްވުމަކީ އެޓީމަށް ލިބޭނެ ފައިދާއެއް ކަމަށާއި، އެކަމަކު މި ކުޅުންތެރިންނަށް އެއްކޮށް ފިޓްވުމަށް ހުރިހާ ކުޅުންތެރިން އެކުގައި ތަމްރީނުތައް ހަދަން ޖެހޭނެ ކަމަށެވެ.

މާޗު މަހުގެ 13 ވަނަ ދުވަހު ޕްރިމިއާ ލީގު މެދުކަނޑާލިއިރު، ޓޮޓެންހަމް އޮތީ ތާވަލުގެ އަށްވަނައިގައި 29 މެޗުން 41 ޕޮއިންޓާއެކު އެވެ.