މާލެ ސިޓީ ސަރަހައްދުގައި އޮތް ލޮކްޑައުންގެ މުއްދަތު އިތުރުކުރި އެއް ސަބަބަކީ މާލޭގައި ތޮއްޖެހިގެން އުޅޭ މަސައްކަތްތެރިންނާއި އެހެން މީހުންގެ ތޮއްޖެހުން ކުޑަކުރުމަށް އިތުރު މަސައްކަތްތަކެއް ކުރުމަށްކަމަށް ކޮވިޑް-19 ޓާސްކް ފޯހުގެ ތަރުޖަމާން މަބްރޫކް އަޒީޒު ވިދާޅުވެއްޖެ އެވެ.

ރާއްޖޭގައި މިހާތަނަށް 468 މީހުން ޕޮޒިޓިވް ވެފައިވާއިރު މީގެތެރެއިން 323 މީހުންނަކީ ބިދޭސީންނެވެ. އަދި މީގެތެރެއިން ގިނަ މީހުންނަކީ ބަންގްލަދޭޝް މީހުންނެވެ. ބަންގްލަދޭޝްގެ 252 މީހަކު މިހާތަނަށް އައިއިރު ޕޮޒިޓިވް ވެފައިވާއިރު މީގެތެރޭގައި ބާޒާރު މައްޗާއި ކުދިކުދި ތަންކޮޅުގައި އުޅޭ ގިނަ އަދަދެއްގެ ބިދޭސީން ހިމެނެ އެވެ. އެއާއެކު ސަރުކާރުން ގެންދަނީ މާލެ ސަރަހައްދުގައި އުޅޭ ބިދޭސީން ކަރަންޓީނު ފެސިލިޓީތަކަށް ގެންދިޔުމުގެ މަސައްކަތް ކުރަމުންނެވެ.

އެގޮތުން ހުޅުމާލެ ، ގުޅީފަޅު އަދި ވިލިވަރުގައި ކަރަންޓީނު ފެސިލިޓީތަކެއް ހެދި އެމީހުން އެތަންތަނަށް މިހަފްތާތެރޭގައި ބަދަލުކުރެވޭނެ ކަމަށް މީގެކުރިން ބޭއްވި ނޫސްވެރިންގެ ބައްދަލުވުމެއްގައި ޓޫރިޒަމް މިނިސްޓަރ އަލީ ވަހީދު ވަނީ ވިދާޅުވެފަ އެވެ.

މަބްރޫކް ވިދާޅުވީ މިކަމުގައި އިސްކޮށް ހަރަކާތްތެރިވާ ޓެގް ޓީމުން ލަފާދީފައިވަނީ ލޮކްޑައުންގެ ހާލަތުގައި މާލޭގައި މީހުންގެ ތޮއްޖެހުން މަދުކުރުމަށް އިތުރު މަސައްކަތްތަކެއް ކުރުމަށް ރާވާ ނިންމާފައިވާތީ ލޮކްޑައުންގެ މުއްދަތު އިތުރުކުރުމަށް ކަމަށެވެ. މީގެއިތުރުން ލޮކްޑައުންގެ މުއްދަތު އިތުރުކުރި ދެ ވަނަ ސަބަބެއްކަމަށް މަބްރޫކް ވިދާޅުވީ ފެންނަން ހުރި ކުލަސްޓަރ ތަކުގެ ތެރެއިން ޑައިރެކްޓް ކޮންޓެކްސްޓްސް ގެ ގޮތުގައި އަދިވެސް ގިނަ ޕޮޒިޓިވް ކޭސްތައް ފެންނަމުން ދިޔުމެވެ. ކްލަސްޓަރތައް ފެތުރުނަ ނުދީ ހިފެހެއްޓިއްޖެ ކަމަށްވާނަމަ މިކަމުން ލުއި މަގެއް ފެނިދާނެކަމަށް ޓެގް ޓީމަށް ފެންނަކަމަށް މަބްރޫކް ވިދާޅުވި އެވެ.

މާލެ ސިޓީ އެންމެ ފުރަތަމަ ލޮކްޑައުން ކޮށްފައިވަނީ އޭޕްރީލް މަހުގެ 15 ވަނަ ދުވަހު މާލެއިން ކޮވިޑް-19 އަށް ޕޮޒިޓިވްވި މީހެއް ފެނުމާއެކުގަ އެވެ. އޭގެފަހުން އޭޕްރީލް 17 ވަނަ ދުވަހު އޭޕްރީލް 30 އާ ހަމައަށް ލޮކްޑައުންގެ މުއްދަތު އިތުރުކުރިއެވެ. އަދި އެފަހުން މެއި މަހުގެ 14 ވަނަ ދުވަހާ ހަމައަށް ލޮކްޑައުންގެ މުއްދަތު ވަނީ އިތުރުކޮށްފަ އެވެ.