ވިިޔަފާރި އުސޫލުން ޚިދުމަތް ދޭން ހުއްދަދީފައިވާ ފަރާތްތައް ބެލޭނެ ގޮތް ހަދަނީ
ފުރަތަމަ މަސައްކަތް ފެށިއިރު މާބޮޑަށް އޯގަނައިޒް ނުކުރެވޭ
ކޮންމެހެން ބޭރަށް ނުކުރަން ޖެހިގެން ނޫނީ ނުނިކުތުމަށް ކަމާބެހޭ ފަރާތްތަކުން ދަނީ އިތްލިމާސްކުރަމުން
މާލެ ސިޓީގައި ވިިޔަފާރި އުޞޫލުން އެކި ޚިދުމަތްތައް ދިނުމަށް ހުއްދަ ދީފައިވާ ފަރާތައް ފުލުހުންނަށް ބެލޭނެ އިންތިޒާމު ހަމަޖެއްސުމުގެ މަސައްކަތް ކުރަމުން އަންނަކަމަށް އެސިސްޓެންޓް ކޮމިޝަނަރ އޮފް ޕޮލިސް ޢަބްދުﷲ ފައިރޫޝް ވިދާޅުވެއްޖެއެވެ.
ބުދަ ދުވަހުގެރޭ ބޭއްވި ނޫސްވެރިންގެ ބައްދަލުވުމުގައި ފައިރޫޝް ވިދާޅުވީ ޒަރޫރީ އެކިއެކި ބޭނުންތަައް ފުއްދަން ބޭރަށް ނުކުތުމަށް ހުއްދަ މިހާރު ދޫކުރަމުން އަންނަ އުޞޫލުގެ ތެރެއިން ހިލޭ ތަކެތި ފޯރުކޮށްދޭ ފަރާތްތަކަށާއި، ވިޔަފާރި ކުރުމަށް މިހާތަނަށް ދޫކުރަމުން އައި ހުއްދަ ދޫކުރުމަށް ނިންމާ އެ އިންތިޒާމު ހަމަޖެއްސުމުގެ މަސައްކަތް ކުރަމުންދާ ކަމަށެވެ.
ފައިރޫޝް ވިދާޅުވީ ހުއްދަދިނުމުގެ މަސައްކަތް ފެށިއިރު ކަންކަން ކުރިިޔަށްދިޔައީ އެހާ ބޮޑަށް ރޭވިގެން ނޫންކަމަށެވެ. އަދި މިހާރު ދޫކޮށްފައިވާ ހުއްދަތަކުގެ ބޭނުން އެކަށީގެންވާ ގޮތެއްގައި ނުހިފާކަން ފައިރޫޝް ފާހަގަކުރެއްވިއެވެ.
ފައިރޫޝް ވިދާޅުވީ، އެކިބޭނުންތަކައް ދޫކުރާ ހުއްދަތައް ބަލައި، އެއީ ކޮންފަރާތަކައް ދޫކުރެވިފައިވާ ހުއްދަ އެއްތޯ މަގުމަތީގައި ޙަރަކާތްތެރިވާ ފުލުހުންނަށް ބެލޭނެ އިންތިޒާމު ހަމަޖެއްސުމުގެ މަސައްކަތް މިހާރު ފުލުހުންގެ އިދާރާއިން ކުރަމުން އަންނަކަމަށެވެ.
ފައިރޫޝް ވިިދާޅުވީ މިބަދަލާއެކު މިހާތަނަށް ދޫކޮށްފައިވާ ހުރިހާ ހުއްދަތަކެއް ބާޠިލުވާނެ ކަމަށެވެ. 48 ގަޑިއިރަށްފަހު މިހާރު ހުއްދަދީފައިވާ ފަރާތްތަކަށް އަލުން ހުއްދައަށް އެދެވޭނެކަމަށާއި، އަލަށް ދޫކުރާ ހުއްދައާއެކު، ޢާންމު ރައްޔިތުންނަށް ހުއްޓުމެއްނެތި މިހާރުވެސް ދޭ އުޞޫލުން ޚިދުމަތް ދެވޭނެ ކަމަށެވެ.
ވިޔަފާރި އުޞޫލުން ޚިދުމަތް ދިނުމަށް މިހާރު ދޫކޮށްފައިވާ ހުއްދަ ބުރާސްފަތި ދުވަހުގެ 12:00އިގެ ނިޔަލަށް ބާޠިލުވާނެކަން ފައިރޫޝް ވިދާޅުވިއެވެ.
ފައިރޫޝް ވިދާޅުވީ ކޮވިޑް-19 ފެތުރެމުންދާ މިދަނޑިވަޅުގައި ކޮންމެހެން ބޭރަށް ނުކުންނަން ޖެހިގެން ނޫނީ ނުދިއުމަށް އެދޭ ކަމަށެވެ. އަދި ފުލުހުން ކުރަމުންދާ މަސައްކަތްތަކުގައި ޢާންމު ރައްޔިތުންގެ އެއްބާރުލުން ދިނުމަށް ފައިރޫޝް އެދިވަޑައިގެންނެވިއެވެ.
