ރާއްޖެއިން ފުރަތަމަ ފަހަރަށް ކޮވިޑް-19 ޖެހިފައިވާ މީހަކު ނިޔާވެއްޖެ އެވެ.
މަޢުލޫމާތު ލިބިފައިވާ ގޮތުގައި އެ މީހާ މަރުވެގެން އައިޖީއެމްއެޗަށް ގެންދިޔައީ ބުދަ ދުވަހު ހަވީރުގެ ވަގުތެއްގައެވެ. އަދި އޭނާއަކީ މޮނީޓަރިންގ ޙާލަތަށް ލެވިފައިވާ ގެއެއްގައި ދިރިއުޅެމުން ދިޔަ ފަރާތެކެވެ.
ނިޔާވީ އުމުރުން 83 އަހަރުގެ އައިމިނަތު އާދަމެވެ. އޭނާ ދެމިއޮތުމުގެ ޢާލަމަށް ދަތުރުކޮށްފައިވަނީ ބުދަ ދުވަހުގެ ހަވީރު 7:10 ގައެވެ. ނިޔާވި މީހާގެ މަޢުލޫމާތު ހިއްސާކުރުމަށް އެންއީއޯސީގައި ބޭއްވި ނޫސްވެރިންގެ ބައްދަލުވުމެއްގައި، ހެލްތު މިނިސްޓަރު ޢަބްދުﷲ އަމީން ވަނީ މަރުޙޫމާގެ ޢާއިލާއަށް ތަޢުޒިޔާ ދަންނަވާފައެވެ.
އައިމިނަތު އާދަމަކީ ކުރިން ޕޮޒިޓިވްވި ފަރާތެއް ކަމުގައިވާ MV0126 އާ ގުޅުންހުރި ފަރާތެކެވެ. އަދި އެ ޢާއިލާގެ އިތުރު ބަޔަކަށްވެސް ވަނީ ކޮވިޑް-19 ޖެހިފައެވެ. MV0126 އަކީ އެމްއެޗްއެފް ކްލަސްޓަރ އަށް ނިޞްބަތްވާ 52 އަހަރުގެ ދިވެހި ފިރިހެނެކެވެ. އޭނާ ޕޮޒިޓިވްވީ ކަމަށް ރިޕޯޓުކުރެވިފައިވަނީ 24 އޭޕްރިލް ގައެވެ.
މަރުޙޫމާ އަށް ބަލިޖެހިފައިވާކަމަށް ބެލެވޭތީ، އޭނާގެ ސާމްޕަލް ނަގާފައިވަނީ އޭޕްރިލް 27 ގެ ދަންވަރުއެވެ. ޓެސްޓުގެ ނަތީޖާ ލިބުނުއިރު، އައިމިނަތު އާދަމް ވަނީ ދެމިއޮތުމުގެ ޢާލަމަށް ދަތުރުކޮށްފައެވެ. މަޢުލޫމާތު ލިބިފައިވާގޮތުގައި އޭނާ ހޮސްޕިޓަލަށް ގެންދިޔައީ ނޭވާލުމުގައި ދަތިތަކެއް ހުރެގެންނެވެ.
