ކޮވިޑް-19އާ ގުޅިގެން ޕާކިސްތާނުން ވަޒީފާ ގެއްލިފައިވާ މީހުންނަށް ފައިސާ ލިބޭނެ މަގެއް ފަހިކޮށްދީފި
29 އެޕްރީލު 2020 | ބުދަ 13:04އެކި ސަހަރައްދުތަކުގައި ގަސް އިންދުމުގެ މަސައްކަތް ދަނީ ކުރަމުން
ޕާކިސްތާނުގެ ގިނަ ރައްޔިތުން ދަނީ ގަސްއިންދުމުގެ މަސައްކަތް ކުރަމުން
ކޮވިޑް-19އާ ގުޅިގެން ޕާކިސްތާނުން ވަޒީފާ ގެއްލިފައިވާ އެތައް ހާސް މީހުންނަށް ފައިސާ ލިބޭނެ މަގެއް ފަހިކޮށްދީފިއެވެ.
އަލްޖަޒީރާގައި ރިޕޯޓުކޮށްފައިވާ ގޮތުގައި ޕާކިސްތާން ސަރުކާރުން އެގައުމުގެ އެކި ހިސާބުތަކުގައި ގަސް އިންދުމުގެ ޚާއްސަ ޕްރޮގްރާމެއް ވަނީ ފަށާފައެވެ. އެގޮތުން ކްލައިމެޓް ޗޭންޖާއި ދެކޮޅަށް ފަށާފައިވާ މިމަސައްކަތުގައި ޕާކިސްތާނުގެ އެކި ސަހަރައްދުތަކުގައި މީހުން ދަނީ ގަސް އިންދުމުގެ މަސައްކަތްތައް ކުރަމުންނެވެ.
މިގަސްތައް އިންދުމުގެ މަސައްކަތުގައި ހަރަކާތްތެރިވާ މީހުންނަށް ޕާކިސްތާނުގެ ސަރުކާރުން ފައިސާ ދެއެވެ. އަދި އެމީހުން ކުރާ މަސައްކަތުގެ ހަމައަގު ދޭނެ ކަމަށް ސަރުކާރުން ހާމަކޮށްފައިވެއެވެ.
ޕާކިސްތާނުގެ ސަރުކާރުން ވަނީ ދިހަ ބިލިއަން ގަސް އިންދުމަށް އަމާޒު ހިފާފައެވެ. މިޕްރޮގްރާމް އަކީ 2018 ވަނަ އަހަރު ބޮޑުވަޒީރު އިމްރާން ޚާން ފައްޓަވައިދެއްވި ޕްރޮގްރާމެކެވެ. އަދި ކުރިއަށް އޮތް 5 އަހަރު މިޕްރޮގްރާމް ކުރިއަށް ގެންދިއުމަށް ވަނީ ނިންމާފަައިއެވެ. މިޕްރޮގްރާމްގެ ސަބަބުން ފަސްދޮޅަސް ތިން ހާހަށްވުރެ ގިނަ މީހުންނަށް ވަޒީފާ ލިބިފައިވެއެވެ.
