ކޮރޯނާވައިރަސް (ކޮވިޑް-19) އާ ގުޅިގެން ދިމާވާ މާލީ ގޮންޖެހުންތަކުން އަރައިގަތުމަށް މެމްބަރު ގައުމުތަކަށް 205 މިލިއަން ޕައުންޑުގެ އެހީއެއް ދޭން ޔުއެފާ އިން ނިންމައިފި އެވެ.

އެގޮތުން ޔުއެފާ އިން ވަނީ މެމްބަރު 55 އެސޯސިއޭޝަނަށް އެހީވާން ނިންމާފަ އެވެ. ޔުއެފާ އިން ބުނީ ކުރިއަށް އޮތް ދުވަސްތަކުގައި މި ފައިސާ ދޫކުރާނެ ކަމަށާއި، އެގޮތުން ކޮންމެ އެސޯސިއޭޝަނަކަށް ދޭނީ 3.75 މިލިއަން ޕައުންޑް ކަމަށެވެ. އަދި މިއީ ކޮވިޑް-19 އާ ގުޅިގެން ދިމާވެފައިވާ ދަތިތަކުން އަރައިގަތުމަށް އެހީވުމުގެ ގޮތުން ދޭ ފައިސާ އެއް ކަމަށާއި، މި ފައިސާ ހޭދަކުރާނެ ގޮތެއް ކަނޑައަޅާނީ އެ ގައުމެއްގެ އެސޯސިއޭޝަނަކުން ކަމަށެވެ.

ޔުއެފާގެ ރައީސް ރައީސް އަލެކްސަންޑަ ކެފެރިން ވިދާޅުވީ ކޮވިޑް-19 އާ ގުޅިގެން ޔޫރަޕްގެ ފުޓްބޯޅައަށް ވެސް ވަރަށް ބޮޑަށް އަސަރު ކޮށްފައިވާ ކަމަށާއި ޔުއެފާގެ ބޭނުމަކީ މެމްބަރު ގައުމުތަކަށް އެންމެ ރަނގަޅަށް އެހީވުން ކަމަށެވެ. އެގޮތުން ކޮންމެ މެމްބަރު ގައުމަކަށް 3.75 މިލިއަން ޕައުންޑްގެ އެހީތެރިކަން ފޯރުކޮށްދޭން ނިންމީ ފުޓްބޯޅައިގެ ކަންކަން އަލުން ބިނާކުރުމަށް ގައުމުތަކަށް އެހީވުމުގެ ގޮތުން ކަމަށްވެސް ވިދާޅުވި އެވެ.

މީގެ ކުރިން ފީފާ އިން ވަނީ ކޮވިޑް-19 އާ ގުޅިގެން ދިމާވާ މާލީ ގޮންޖެހުންތަކުން އަރައިގަތުމަށް މެމްބަރު ގައުމުތަކަށް 150 މިލިއަން ޑޮލަރުގެ އެހީއެއް ދޭން ނިންމާފަ އެވެ. އެގޮތުން ފީފާ އިން ވަނީ މެމްބަރު 211 އެސޯސިއޭޝަނުގެ ތެރެއިން، ކޮންމެ އެސޯސިއޭޝަނަކަށް ފަސް ލައްކަ ޑޮލަރު ދޭން ނިންމާފަ އެވެ.

ޔުއެފާގެ މެމްބަރު ގައުމުތަކަށް މާލީ އެހީތެރިކަން ފޯރުކޮށްދޭން ނިންމިއިރު، މީގެ ކުރިން ޔުއެފާ އިން ވަނީ ލީގުތައް ކެންސަލް ކުރުމުގެ ހުއްދަ ދީފައެވެ. އެއާއެކު ނެދަލެންޑްސް އިން ޗެމްޕިއަނެއް ކަނޑަނާޅައި ނެދަލެންޑްސް ފުޓްބޯޅަ ލީގު ކެންސަލް ކުރިއިރު، ފްރެންޗު ލީގު ކެންސަލް ކުރަން ވަނީ ޖެހިފައެވެ. އަދި ބެލްޖިއަމް އާއި ސްކޮޓްލެންޑުން އަންނަނީ ލީގު ކެންސަލް ކުރުމަށް މަސައްކަތް ކުރަމުންނެވެ.